ދަތުރުފަތުރުގެ ނިޒާމް ހަރުދަނާކޮށް އާ އުސްމިންތަކަކަށް ގެންދެވުމަށް ރައީސް ކުރައްވަމުން ގެންދަވަނީ ބުރަ މަސައްކަތްޕުޅެއް - ނަހުލާ

ރާއްޖޭގެ ދަތުރުފަތުރުގެ ނިޒާމް ހަރުދަނާކޮށް އާ އުސްމިންތަކަކަށް ގެންދެވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކުރައްވަމުން ގެންދަވަނީ ބުރަ މަސައްކަތްޕުޅެއް ކަމަށް ވިދާޅުވެ، ޓްރާންސްޕޯޓް މިނިސްޓަރު އާއިޝަތު ނަހުލާ ރައީސްއަށް ތައުރީފް އޮއްސަވާލައްވައިފިއެވެ.

ފަރެސްމާތޮޑާ އެއަރޕޯޓް ހުޅުވުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ނަހުލާ ވިދާޅުވީ އުތުރާއި ދެކުނު ހިމެނޭ ގޮތުން، މުޅިރާއްޖެ ތަރައްޤީ ކުރުމުގެ ތަސައްވުރެއް ގެންގުޅުއްވައި، ޒަމާނުންސުރެ ރާއްޖޭގައި ދަތުރުފަތުރު ކުރުމުގައި، ދިވެހި ރައްޔިތުން އުފުލަމުން ދިޔަ ތަކުލީފު މިއަދު މިވަނީ މާޒީ ވެފައި ކަމަށެވެ. އެންމެނަށް ދަތުރު ފަތުރުގެ ލުއި ފަސޭހަކަން ލިބިފައި ކަމަށާއި، މިއަދު ރާއްޖޭގެ ދަތުރުފަތުރުގެ ނިޒާމަށް މިވަނީ އިންގިލާބީ ބޮޑު ބަދަލެއް އައިއްސަފައި ކަމަށެވެ.

އަދި އަތޮޅުތަކުގެ ރަށްރަށުން ފަސޭހަ ކަމާއެކު ދަތުރުފަތުރު ކުރެވޭނެ ނިޒާމެއް މިވަނީ ގާއިމުކުރެވިފައި ކަމަށެވެ. ރާއްޖޭގެ ދަތުރުފަތުރުގެ ނިޒާމް ހަރުދަނާކޮށް އާ އުސްމިންތަކަކަށް ގެންދެވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކުރައްވަމުން ގެންދަވާ ބުރަ މަސައްކަތްޕުޅުން ރާއްޖޭގެ އުތުރާއި ދެ ކުނުގެ ސަރަހައްދީ ވައިގެ ބަނދަރުތަކުން ގިނަ ބަޔަކަށް ވަޒީފާގެ ފުރުސަތުތައް ލިބިއްޖެ ކަމަށް މިނިސްޓަރު ނަހުލާ ވިދާޅުވިއެވެ.

މިނިސްޓަރު ނަހުލާ ވިދާޅުވީ ރާއްޖޭގެ ރައްޔިތުންނަށް ފަހި ދިރިއުޅުމެއް ހޯއްދަވައިދެއްވާ، ގައުމު ބިނާކުރުމުގައި ރައީސް ޞާލިހު ދައްކަވާ ސާބިތުކަމަށާއި "އަޅުގަނޑުމެންނަށް" ދެއްވާ ހިއްވަރަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިޙަށް، ދިވެހި ރައްޔިތުންގެ ނަމުގައި، ފަށްފަށުން ޝުކުރު ދަންނަވާ ކަމަށެވެ.

މިނިސްޓަރު ވިދާޅުވީ ހުވަދު އަތޮޅަކީ، މިހާރުވެސް އޮޕަރޭޝަންގައި 2 އެއާރޕޯޓް އޮންނަ އަތޮޅަކަށް ވާއިރު، ފަރެސްމާތޮޑާ އެއާޕޯޓާއެކު، އެއް އަތޮޅެއްގައި އެންމެ ގިނަ އެއާޕޯޓް ހުޅުވުނު އަތޮޅު ކަމުގައި ވެގެންދާނެ ކަމަށެވެ. އަދި ފަތުރުވެރިކަމަކީ ރާއްޖޭގެ އިގްތިސާދުގައި އެންމެ މުހިންމު ރޯލެއް އަދާ ކުރާ ދާއިރާ ކަމަށް ވާއިރު، މިއީ ހުވަދުއަތޮޅުގެ އިގްތިސާދަށް، މިކަމުގެ ސަބަބުން ހެޔޮ ބަދަލްތަކެއް އަންނާނެ ކަމެއް ކަމުގައި ދެކެވަޑައިގަންނަވާ ކަމަށް މިނިސްޓަރު ވިދާޅުވިއެވެ.

މިނިސްޓަރު ނަހުލާ ވިދާޅުވީ ވުޒާރާއާއި ހަވާލުވެވަޑައިގެންނެވިއިރު، މި ދާއިރާގައި ވަރަށް ބޮޑު ގޮންޖެހުންތައް ހުރި ކަމަށެވެ. ނަމަވެސް ހުރި ގޮންޖެހުމަކާއި އެކުވެސް ރާއްޖޭގެ ވައިގެ ދަތުރުފަތުރު ކުރިއެރުވުމަށް ދުރު ރާސްތާގެ ސިޔާސަތެއް ފުރަތަމަ ފަހަރަށް ކަނޑައެޅި، ރާއްޖޭގެ ވައިގެ ދަތުރުފަތުރުގެ ސިޔާސަތެއް އެކުލަވާލެވުނު ކަމަށެވެ.

އަދި އެއްގަމާއި ކަނޑާއި ވައިގެ ދަތުރުފަތުރުގެ ސަލާމަތާއި ރައްކާތެރިކަމަށްޓަކައި އަދި ރައްޔިތުންގެ ދިރިއުޅުމުގެ ހާލަތާއި އެއްގޮތްވާގޮތުގެ މަތިން ބައްޓަންކުރެވިފައިވާ، ލުއިފަސޭހަކަމާއެކު އެއްތަނުން އަނެއްތަނަށް ދަތުރުކުރެވޭނެ، ދެމެހެއްޓެނިވި ދަތުރުފަތުރުގެ ނިޒާމެއް ޤާއިމްކުރުމަށް، ގައުމީ ފެންވަރުގައި އަދި ބައިނަލްއަގުވާމީ ފެންވަރުގައިވެސް، ގިނަ ގުނަ މަސައްކަތްތަކެއް ކުރެވި އަދި ކުރަމުން ދާކަމަށް މިނިސްޓަރު ވިދާޅުވިއެވެ.