ކ. މާލެ
|
14 މާރޗް 2023 | އަންގާރަ 16:35
ފަރެސްމާތޮޑާ އެއަރޕޯޓަށް ޓެސްޓް ފްލައިޓް ޖައްސަނީ
ފަރެސްމާތޮޑާ އެއަރޕޯޓަށް ޓެސްޓް ފްލައިޓް ޖައްސަނީ
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ
ފަރެސްމާތޮޑާ އެއަރޕޯޓް
މާލެއިން ފަރެސްމާތޮޑާއަށް، ކޮޅަކަށް 1،624 ރުފިޔާ!
 
މި މަހުގެ 16-19 އަށް ޓިކެޓުގެ އަގު ހެޔޮވާނެ

ގދ. ފަރެސްމާތޮޑާ އެއަރޕޯޓު ރަސްމީކޮށް ހުޅުވުމަށް ތައްޔާރުވަމުން އަންނައިރު މިހާރު އެ އެއަރޕޯޓަށް ކުރާ ދަތުރުތަކުގެ ބުކިން އަށް ހުޅުވާލައިފިއެވެ.

އެ އަރޕޯޓަށް ދަތުރުތައް ކުރާނީ ޤައުމީ އެއަރލައިން، މޯލްޑިވިއަނުންނެވެ. އެ އެއަރލައިނުން މިހާރު ބުކިންއަށް ހުޅުވާލާފައިވާއިރު މި މަހުގެ 16 އިން 19 އަށް ހާއްސަ ފެއާއެއް ވަނީ ކަނޑައަޅައިފައެވެ. އެގޮތުން ހާއްސަ ފެއާގައި މި ތިން ދުވަހު ކޮޅަކަށް ޓިކެޓެއްގެ އަގަކީ 1،574 ރުފިޔާއެވެ.

ފުރަތަމަ ތިން ދުވަހަށް ހާއްސަ ފެއަރއެއްގައި ދަތުރު ކުރި ނަމަވެސް އެއަށްފަހު ކޮޅަކަށް ނަގާ އަދަދުން 50 ރުފިޔާ ބޮޑުވާނެ ކަމަށް މޯލްޑިވިއަނުން ބުނެފައި ވެއެވެ. އެހެންކަމުން ވެލާނާ އިންޓަރނޭޝަނަލް އެއަރޕޯޓުން ފަރެސްމާތޮޑާ އެއަރޕޯޓަށް ޓިކެޓެއްގެ އަސްލު އަގަކީ 1624 ރުފިޔާއެވެ.

ފަރެސްމާތޮޑާ އެއަރޕޯޓު ހުޅުވުމުގެ އެންމެ ފަހުގެ ތައްޔާރީތައް ވުމުގެ ގޮތުން ހޯމަ ދުވަހު ވަނީ ކާމިޔާބު ކަމާއެކު ޓެސްޓް ފްލައިޓު ޖައްސާފައެވެ. ހޯމަ ދުވަހުގެ ހަވީރު 5:28ގައި ފަރެސްމާތޮޑާ އެއަރޕޯޓުގައި ޖައްސާފައިވަނީ މޯލްޑިވިއަންގެ ފްލައިޓް Q2-6482 އެވެ. މިއީ، ޑޭޝް 8-300 މަރުކާގެ ބޯޓެކެވެ.

ފަރެސްމާތޮޑާ އެއަރޕޯޓް ތަރައްގީކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެންނެވެ. މި މަޝްރޫޢުގެ ދަށުން، ރަންވޭގެ ސަބްގްރޭޑް އަދި ސަބްބޭސް މަސައްކަތާއި، ޓެކްސީވޭއަކާއި، އޭޕްރަންއަކާއި، ފަޔަރ ޕެޑް އަދި ފަޔަރ ރޯޑެއް ގާއިމްކޮށް، ފަޔަރ ބިލްޑިންގ އެއް އިމާރާތް ކޮށްފައިވެއެވެ. އަދި އައު ޓާރމިނަލް ބިލްޑިންގ އެއް އިމާރާތް ކުރުމުގެ މަސައްކަތް ހިމެނެއެވެ.

ފަރެސްމާތޮޑާ އެއަރޕޯޓު ތަރައްގީ ކުރުމުގެ މަޝްރޫއުގެ ދަށުން އެ އެއަރޕޯޓުގެ ރަންވޭގައި ލައިޓު ހަރުކޮށް، ޑިސެމްބަރު މަހުގެ ތެރޭގައި ވަނީ ޓެސްޓްކޮށްފައެވެ. މިއީ އެ އެއަރޕޯޓަށް ރޭގަނޑު ވަގުތު ވެސް ފްލައިޓުތައް ދަތުރު ކުރެވޭ ގޮތް ހެދުމަށް ހަރުކޮށްފައިވާ ލައިޓުތަކެކެވެ.

އެ ކުންފުންޏާ މި މަޝްރޫއު ހަވާލު ކޮށްފައިވަނީ 144.8 މިލިއަން ރުފިޔާއަށް 2020 ވަނަ އަހަރުގެ ނޮވެމްބަރު މަހުގައެވެ. އެއަރޕޯޓްގައި ޤާއިމުކޮށްފައިވަނީ 1200 މީޓަރު ދިގު ރަންވޭއެކެވެ. އެއަރޕޯޓްގެ ޢަމަލީ މަސައްކަތްތައް ފެށީ 2021 ވަނަ އަހަރުގެ ކުރީކޮޅުއެވެ.

ފަރެސްމާތޮޑާ އެއަރޕޯޓަކީ ގދ. އަތޮޅުގައި ހުޅުވާ ތިންވަނަ އެއަރޕޯޓެވެ. މިހާރު އެ އަތޮޅުގައި އޮންނަނީ ކާޑެއްދޫ އެއަރޕޯޓާއި މާވަރުލު އެއަރޕޯޓެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: ފާޠިމަތު ޒުހައިރާ
0%
0%
0%
0%
0%
0%
ކޮމެންޓް
ގުޅުންހުރި