ފަރެސްމާތޮޑާ އެއާޕޯޓްގެ ގިނަ މަސައްކަތް ނިމުމަކަށް
11 ޖޫން 2022 | ހޮނިހިރު 02:42ފަޔަރ ބިލްޑިން އިމާރާތުގެ މަސައްކަތުގެ 87 އިންސައްތަ މަސައްކަތް ވަނީ ނިމިފައި
ގދ ފަރެސްމާތޮޑާ އެއާޕޯޓްގެ މަސައްކަތް ކުރިޔަށްދަނީ
ފަރެސްމާތޮޑާ އެއާޕޯޓް އެޅުމުގެ މަސައްކަތްކުރަމުން އަންނަ އެމްޓީސީސީ އިން އެމަސައްކަތްގޮސްފައިވާ ހިސާބުގެ އެންމެ ފަހުގެ މައުލޫމާތު ހިއްސާކޮށްފިއެވެ.
އެގޮތުން އެމްޓީސީސީ އިން ބުނީ އެމަޝްރޫޢުގެ 55 އިންސައްތަ މަސައްކަތް މިހާރު ނިމިފައިވާކަމަށެވެ. އެގޮތުން އެންމެ ފުރަތަމަ ފެށި ފަޔަރ ބިލްޑިން އިމާރާތުގެ މަސައްކަތުގެ 87 އިންސައްތަ މަސައްކަތް ވަނީ މިހާރު ނިމިފައެވެ. އަދި ރަންވޭގައި ތާރު އެޅުމުގެ މަސައްކަތް މިދިޔަ މަހު ފަށާފައިވާއިރު، މި މަސައްކަތުގެ 70 އިންސައްތަ މިހާރު ވަނީ ނިމިފައެވެ.
މީގެއިތުރުން ފަރެސްމާތޮޑާގައި އަޅާ އެއަރޕޯޓް އާއި ފަރެސްމާތޮޑާ އާއި ދެމެދު އަޅާ ކޯޒްވޭގެ މަސައްކަތްވެސް ވަނީ މިދިޔަ މަހު ފަށާފައެވެ. މިމަސައްކަތުގެ ދަށުން 19،200 އަކަމީޓަރުގެ ސަރަހައްދެއް ހިއްކާއިރު، ހިއްކާ ސަރަހައްދު ހިމާޔަތްކުރުމަށް 120 މީޓަރުގެ ރިވެޓްމަންޓް ޖަހާނެއެވެ. މި ކޯޒަވޭ އަޅާނީ އެއާޕޯޓްގެ މައި މަގުތަކާ ގުޅޭ ގޮތަށް ކޯޒްވޭގެ ދަށުން އޮއެ ދެމޭ ގޮތަށެވެ.
މި މަޝްރޫއުގެ ދަށުން 4456.87 އަކަމީޓަރުގެ މަގު ހަދާނެއެވެ. މިއީ 44.2 މިލިއަން ރުފިޔާގެ މަޝްރޫއެކެވެ. ފަރެސްމާތޮޑާ އެއަރޕޯރޓްގެ މަސައްކަތް އެމްޓީސީސީއާ ހަވާލުކޮށްފައިވަނީ 10 ނޮވެމްބަރ 2020ގައެވެ. މި މަޝްރޫއުގެ ދަށުން، ރަންވޭގެ ސަބްގްރޭޑް އަދި ސަބްބޭސް މަސައްކަތްކުރުމާއި، ޓެކްސީވޭއަކާއި، އޭޕްރަންއަކާއި، ފަޔަރ ޕެޑް އަދި ފަޔަރ ރޯޑެއް ގާއިމުކުރުމާއި، ފަޔަރ ބިލްޑިންގ އެއް އިމާރާތްކުރުމުގެ އިތުުރުން ޓަރމިނަލް ބިލްޑިންގ އިމާރާތްކުރުމުގެ މަސައްކަތް އެމްޓީސީސީއާ ވަނީ ހަވާލުކޮށްފައެވެ.
ފަރެސްމާތޮޑާ ގައި އަޅާ އެއަރޕޯޓްގެ މަސައްކަތް މިއަހަރުގެ ނޮވެމްބަރ މަހުގެ 11 ގެ ކުރިން ނިމޭނެކަމަށް އެމްޓީސީސީގެ ސީއީއޯ އާދަމް އާޒިމް ވަނީ މީގެކުރިން ވިދާޅުވެފައެވެ.
