ގދ. ފަރެސްމާތޮޑާ އެއަރޕޯޓާއެކު ރައްޔިތުންނަށް ލިބޭނީ ހަމައެކަނި ދަތުރުފަތުރުގެ ލުއި ފަސޭހަ ނޫން ކަމަށާއި އިޤްތިސާދީ ކުރިއެރުން ވެސް ލިބިގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
ގދ. ފަރެސްމާތޮޑާ އެއަރޕޯޓު ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ އެއަރޕޯޓާއެކު ވަޒީފާގެ އިތުރު ފުރުސަތުތައް ހުޅުވިގެން ހިނގައްޖެ ކަމަށާއި ރަށުގައި ދެން އެންމެ އަވަހަށް ފުޅާވާނެ ކަމަށް ބެލެވެނީ ޓެކްސީގެ ޙިދުމަތް ކަމަށެވެ.
ރައީސް ވިދާޅުވީ އެއަރޕޯޓާއެކު ފަތުރުވެރިންނަށް ރާއްޖޭގެ އެކި ކަންކޮޅުތަކަށް ދަތުރުކުރަން ފަސޭހަވެ، އެ ފުރުސަތު ހުޅުވިގެންދާނެ ކަމަށެވެ.
އެއަރޕޯޓުގެ މަސައްކަތް ފެށީ ކޮވިޑުގެ ބަލިމަޑުކަމުގައިކަން ފާހަގަކުރައްވާ ރައީސް ވިދާޅުވީ އެ ދަނޑިވަޅުގައި ވެސް އެއަރޕޯޓްގެ މަސައްކަތް ފެށުމަކީ ޒުވާނުންނަށް ލިބުނު ރަނގަޅު ފުރުސަތެއް ކަމަށެވެ. އެއީ އޭރު ވެސް ވަޒީފާގެ ފުރުސަތު ތަނަވެސް ވެގެން ދިޔުމުން ކަމަށް ވިދާޅުވިއެވެ.
އެއަރޕޯޓާއެކު ދެން ވަރަށް އަވަހަށް ކޯޒްވޭގެ މަސައްކަތް ވެސް ފެށިގެންދާނެ ކަމަށް ރައީސް ވިދާޅުވިއެވެ. މި ވައިގެ ބަނދަރުން ސިފަކޮށްދެނީ ޖަޒީރާގެ މަލަމަތި ކަމަށާއި މިތަނުގެ ޓާމިނަލް އިމާރާތް ތިމާވެއްޓާއި ރަށްޓެހި ކަމަށް ވެސް ވިދާޅުވިއެވެ.
މީގެ އިތުރުން އެއް އަތޮޅަށް އަންނަ ދިރުމުގެ އަސަރު އަނެއް އަތޮޅަށް ވެސް ކުރާނެ ކަމަށާއި އެކަމުގެ މަންފާ އެންމެނަށް ކުރާނެ ކަމަށް ވިދާޅުވިއެވެ. ރާއްޖޭގެ އެކި ކަންކޮޅުތަކުގައި އެއަރޕޯޓް ހުޅުވުމުން މުޅި ރާއްޖެއަށް އެތައް ގޮތަކުން ތަރައްޤީތައް އަންނާނެ ކަމަށް ވެސް ރައީސް ވިދާޅުވިއެވެ.
ސަރުކާރުގެ ތަރައްޤީގެ މަޝްރޫއުތައް ހިންގާ ކުރިއަށް ގެންދިޔުމުގައި އެމްޓީސީސީން ކުރަމުން ގެންދަނީ އިތުބާރު ފުރިހަމަ މަސައްކަތެއް ކަމަށާއި އެއަރޕޯޓުގައި ގަސް އިންދާ ފެހިކުރުމާއި ސާފުކުރުމުގައި ފަރެސްމާތޮޑާ ރައްޔިތުން ވަރަށް ބުރަ މަސައްކަތެއް ކުރެއްވި ކަމަށް ވެސް ރައީސް ވިދާޅުވިއެވެ. އަދި ރައީސް ވަނީ އެކަމަށް، އެ ރަށުގެ ރައްޔިތުންނަށް ޝުކުރު އަދާކުރައްވާފައެވެ.
ރަސްމިއްޔާތުގައި ވާހަކަފުޅު ދައްކަވަމުން ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވީ އެއަރޕޯޓުގެ ސަބަބުން ރައްޔިތުންނަށް ފޯރުންތެރި ދިރިއުޅުމެއް ލިބިގެންދާނެ ކަމަށާއި ފުދުންތެރި އިޤްތިސާދެއް ބިނާވެގެންދާނެ ކަމަށެވެ. އަދި މިއީ ރާއްޖޭގެ ދަތުރުފަތުރުގެ ދާއިރާ ކުރިއެރުވުމުގައި އިތުރުވެގެންދިޔަ އިތުރު ބޮޅެއް ކަމަށް ވެސް ވިދާޅުވިއެވެ.
ފަރެސްމާތޮޑާ އެއާޕޯޓަކީ ރާއްޖޭގެ އެހެން އެއާޕޯޓުތަކާ އަޅާބަލާއިރު ތަފާތު އެއާޕޯޓެކެވެ. މި އެއާޕޯޓް ތަފާތުވަނީ މި އެއާޕޯޓުގެ ޑިޒައިންގެ ސަބަބުންނެވެ. ރާއްޖޭގެ އިހުގެ "އޮޑިހަރުގެ" އެއްގެ ފަރުމާ ދައްކުވައިދޭ މި އެއާޕޯޓްގެ ރީތިކަމަށް ގިނަ ބަޔަކު އަންނަނީ ތައުރީފް ކުރަމުންނެވެ.
