ޖުމްހޫރީ ޕާޓީން އަންނަ ސެޕްޓެމްބަރު މަހުގެ ރިޔާސީ އިންތިޚާބުގައި ވަކިން ވާދަކުރަން ނިންމުމާއެކު ރައީސް އޮފީހުގެ މިނިސްޓަރު އަހުމަދު ސަމީރު އެ ޕާޓީން އިސްތިއުފާ ދެއްވައިފިއެވެ.
ސަމީރު "ރާއްޖެ ޓީވީ" އަށް ވިދާޅުވީ އެގޮތަށް ނިންމެވީ ޖޭޕީގެ ނިންމުމާއެކު އެ ޕާޓީގައި ހުންނަން އޭނާ ޒަމީރު ގަބޫލު ނުކުރާތީ ކަމަށެވެ. އެއީ އެ ޕާޓީގެ ކެންޑިޑޭޓަކު އިންތިޚާބުގައި ވާދަ ކުރާއިރު ޕާޓީގައި ހުންނަވައިގެން އެހެން ޕާޓީއެއްގެ ކެނޑިޑޭޓަށް ވާދަކުރައްވަން ޖެހޭތީ ކަމަށް ވިދާޅުވިއެވެ.
ސަމީރު ވިދާޅުވި ގޮތުގައި މިއަހަރުގެ ރިޔާސީ އިންތިޚާބުގައި އޭނާ ތާއީދު ކުރައްވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށެވެ. އެކަން މިދިޔަ އަހަރުގެ ޖޫން މަހު ވެސް އާއްމުކޮށް އަންގާފައިވާނެ ކަމަށް އޭނާ ވިދާޅުވިއެވެ.
ސަމީރު އިސްތިއުފާ ދެއްވީ ޖޭޕީން ވަކިން ވާދަ ކުރުމަށް އަންގާރަ ދުވަހު އެ ޕާޓީގެ ކައުންސިލް ބައްދަލުވުމުގައި ނިންމުމާއެކު އެ ބައްދަލުވުމުގެ ތެރެއިންނެވެ. ހުށަހަޅަން ޖެހޭ ލިޔެކިޔުންތައް ރަސްމީކޮށް ހުށަހަޅުއްވާނެ ކަމަށް އޭނާ ވިދާޅުވިއެވެ.
