ޖޭޕީން ނިންމީ ދެވަނަ ބުރުގައި އެއްވެސް ކޮޅަކަށް ނާރަން

ކުރިއަށް އޮތް ރިޔާސީ އިންތިޚާބުގެ ދެވަނަ ބުރުގައި ވާދަކުރައްވާ ދެ ކެންޑިޑޭޓުންގެ ތެރެއިން އެއްވެސް ކެންޑިޑޭޓަކަށް ތާއީދު ނުކުރުމަށް ޖުމްހޫރީ ޕާޓީ (ޖޭޕީ) އިން ނިންމައިފިއެވެ.

އެ ޕާޓީން މިގޮތަށް ނިންމާފައިވަނީ ހޮނިހިރު ދުވަހު ކުރިއަށްގެންދިޔަ ޕާޓީގެ ކައުންސިލް ބައްދަލުވުމުގައެވެ. މަޝްވަރާތަކަށްފަހު އެ ޕާޓީން ނިންމީ އެއްވެސް ކެންޑިޑޭޓަކަށް ދެވަނަ ބުރުގައި ތާއީދު ނުކޮށް ޕާޓީ ކުރިއެރުވުމަށް މަސައްކަތް ކުރުމަށެވެ. އެގޮތުން އެ ބައްދަލުވުމުގައި ބައިވެރިވި 68 މެމްބަރުން ވަނީ ދެވަނަ ބުރުގައި އެއްވެސް ކެންޑިޑޭޓެއް ފަހަތަށް ނޭރުމަށް ވޯޓު ދީފައެވެ.

ޖޭޕީން މިގޮތަށް ނިންމާފައިވާއިރު ދެވަނަ ބުރުގައި ވާދަކުރައްވާ ދެ ކެންޑިޑޭޓުންގެ ފަރާތުން ވެސް ވަނީ އެ ޕާޓީގެ ލީޑަރު ގާސިމް އިބްރާހިމާ މަޝްވަރާތައް ކުރައްވާފައެވެ. އެގޮތުން، ޕީއެންސީގެ ކެންޑިޑޭޓް ޑރ. މުޙައްމަދު މުއިއްޒުގެ ރަނިންގ މޭޓު ހުސައިން މުޙައްމަދު ލަތީފު އޭނާއާ މި މަހުގެ 12 ވަނަ ދުވަހު ބައްދަލުކުރައްވާފައިވާއިރު ރައީސުލްޖުމްހޫރިއްޔާ އަދި އެމްޑީޕީގެ ކެންޑިޑޭޓް އިބްރާހިމް މުޙައްމަދު ޞާލިހު ވަނީ މިދިޔަ ބުދަ ދުވަހު އޭނާއާ ބައްދަލުކުރައްވާ މަޝްވަރާކުރައްވާފައެވެ.

މި ބައްދަލުކުރެއްވުމަށްފަހު ނޫސްވެރިންނާ ވާހަކަދައްކަވަމުން ގާސިމް ވިދާޅުވީ އިންތިޚާބުގެ ދެވަނަ ބުރުގައި އޭނާ އެއްވެސް ކެންޑިޑޭޓަކަށް ވޯޓުނުލައްވާނެ ކަމަށެވެ.

ރިޔާސީ އިންތިޚާބުގެ ފުރަތަމަ ބުރުގައި ގާސިމް ވާދަކުރައްވާފައިވާއިރު އޭނާއަށް ލިބިވަޑައިގެންނެވީ 5460 ވޯޓެވެ. މިއީ އޭނާއަށް މިހާތަނަށް ރިޔާސީ އިންތިޚާބެއްގައި އެންމެ މަދުން ވޯޓު ލިބިވަޑައިގެންނެވި ފަހަރެވެ. މީގެ ކުރިން 2008 އަދި 2013 ގައި ވެސް ގާސިމް ވާދަކުރައްވާފައި ވެއެވެ.