ކުރިޔަށްއަަށް އޮތް ރިޔާސީ އިންތިހާބުގެ ދެވަނަ ބުރުގައި ކޯލިޝަން ހެދުމާ މެދު ގާސިމް އިބްރާހީމު ވަރަށް އަވަހަށް ގޮތެއް ނިންމަވާނެ ކަމަށް ޖުމްހޫރީ ޕާޓީން ބުނެފިއެވެ.
ހޯމަ ދުވަހު ޖުމްހޫރީ ޕާޓީން ނެރުނު ބަޔާނެއްގައި ބުނީ، ޤައުމުގެ މަޞްލަޙަތަށް ވިސްނަވާ އިންތިޚާބުގެ ދެވަނަ ބުރާ ދޭތެރޭ ޖުމްހޫރީ ޕާޓީން ނިންމާ ގޮތެއް ޕާޓީގެ ކައުންސިލްގައި މަޝްވަރާކުރުމަށްފަހު، ވަރަށް އަވަހަށް އިޢްލާން ކުރާނެ ކަމަށެވެ.
އިންތިހާބުގެ ފުރަތަމަ ބުރުގައި ގާސިމަށް ހޯއްދެވުނީ 5460 ވޯޓެވެ. އެއީ ވޯޓުލީ މީހުންގެ 2.5 އިންސައްތަ ވޯޓެވެ. ފެހި ގާނޫނު އަސާސީއަށް ފަހު އެކުލަވާލެވުނު ކޮންމެ ސަރުކާރެއްގައި ވެސް ގާސިމު އިބްރާހީމުގެ ހިއްސާ އޮވެއެވެ.
ރިޔާސީ އިންތިޚާބުގެ ފުރަތަމަ ބުރުގައި ޖުމްހޫރީ ޕާޓީގެ ކެންޑިޑޭޓް ޤާސިމް އިބްރާހީމަށާއި، އެމަނިކުފާނުގެ ރަނިންގމޭޓް ޑރ. އަމީން އިބްރާހީމަށް ތާއީދު ކުރައްވައި ވޯޓުދެއްވި އެންމެހާ ފަރާތްތަކަށް އެޕާޓީން ވަނީ ޝުކުރު އަދާކޮށްފައެވެ
އަދި އިންތިޚާބުގައި ކޮންމެ ނަތީޖާއެއް ނުކުތްނަމަވެސް ޤައުމުގެ އިޞްލާހަށާއި، ރާއްޖޭގެ ރައްޔިތުންގެ ކުރިއެރުމާއި ފާގަތިކަމަށް އެ ޕާޓީން ކުރަމުންދާ މަސައްކަތްތައް ކުރުމުގައި ދެމިތިބޭނެ ކަމަށާއި، ޤައުމުގެ ހަމަޖެހުމާއި ސަލާމަތާއި، އިޤްތިޞާދީ ދުޅަހެޔޮކަމަށް ކުރަންޖެހޭ ކަންތައްތައް ކުރުމުގައި އެ ޕާޓީ ދެމިއޮންނާނޭ ކަމުގައި އެޕާޓިން ބުނެފައިވެއެވެ.
ދެވަނަ ބުރާ މެދު ގޮތެއް ނިންމާނެކަން ޖޭޕީން ހާމަކޮށްފައިވާއިރު އިންތިޚާބުގައި ވާދަކުރެއްވި ފާރިސް މައުމޫންވެސް ވަނީ ކޯލިޝަނާމެދު އަދި ގޮތެއް ނުނިންމަވާކަމަށާއި ނިންމަވާ ގޮތެއް ހާމަކުރައްވާނެކަމަށް ވިދާޅުވެފައެވެ. އަދި އަމިއްލަ ގޮތުން ވާދަކުރެއްވި ހަސަން ޒަމީލު ވަނީ ދެވަނަ ބުރުގައި އެއްވެސް ބަޔަކާއެކު ކޯލިޝަން ނުހަދާނެކަމަށް ވިދާޅުވެފައެވެ.
