މެންޗެސްޓާ ޔުނައިޓެޑްގެ ކެޕްޓަންކުރުމަށް ޕޯޗުގަލްގެ ބުރީނޯ ފެނާންޑޭޒްއަކީ ކަމުދާ ކުޅުންތެރިއެއްނޫން ކަމަށް ފުޓްބޯޅައިގެ ތަޖުރިބާކާރުން ބުނަން ފަށައިފި އެވެ.

ޕްރެމިއާ ލީގުގައި ލިވަޕޫލް އަތުން އިއްޔެރޭ ޔުނައިޓެޑް 7-0އިން ބަލިވިއިރު ކެޕްޓަން ބޭންޑު އަޅައިގެން ހުރީ ފެނާންޑޭޒެވެ. މި ބައްޔަކީ 1931ގެ ފަހުން އެކުލަބުގެ އެންމެ ބޮޑު ބައްޔެވެ. މި މެޗުގައި ފެނާންޑޭޒް ބައެއް ފަހަރު ދަނޑުމަތީގައި މަސައްކަތްނުކޮށް ހުއްޓި ހުންނަތަން ފެނުނެވެ. އަދި ފަހު ހާފުގައި ޓީމު މޮޅަށް މާގިނަ ގޯލު ޖަހަން ފެށުމުން ދަނޑުން ފޭބުމަށްޓަކައި ބަދަލުކޮށްދޭން ބެންޗުގައި އެދުނު ކަމަށް ވެސް ދަނީ ތުހުމަތު ކުރެވެމުންނެވެ.

ނަމަވެސް ކެޕްޓަނެއްގެ ޒިންމާ އޭނާ އަދާނުކުރާ ކަމަށް ބުނެ ޔުނައިޓެޑްގެ ކުރީގެ ދެ ކެޕްޓަނުން ކަމަށްވާ ރޯއި ކީން އާއި ގެރީނެވިލް ވަނީ ފާޑުކިޔައިފަ އެވެ. ކީން އާއި ނެވިލް އަކީ ޔުނައިޓެޑްގެ އެންމެ ކާމިޔާބު ދުވަސްވަރު ޓީމުގެ ކެޕްޓަންކަން ކުރި ދެ ކުޅުންތެރިންނެވެ.

މި ދެ ކުޅުންތެރިންގެ އިތުރުން މިކަމަށް ފެނާންޑޭޒް އަށް ފާޑުކިޔާފައިވަނީ ލިވަޕޫލްގެ ކުރީގެ ފޯވަޑް ކްރިސް ސްޓޮން އެވެ. އޭނާ ބުނީ ދަނޑުމަތީގައި އިދިކޮޅު ކުޅުންތެރިޔާ އަށް ބޭނުންގޮތަކަށް އުޅެން ފުރުސަތު ދީގެން ހުންނަ މީހަކަށްވުރެ ޔުނައިޓެޑްގެ ކެޕްޓަންކަން ކުރަން މާ އެކަށީގެންވާ ކުޅުންތެރިން ޓީމުގައި އެބަތިބި ކަމަށެވެ.

މީގެ ދެ އަހަރު ކުރިން ޔުނައިޓެޑާ ގުޅުނު ފެނާންޑޭޒް ވަނީ މިހާތަނަށް ކުޅުނު 166 މެޗުން 57 ގޯލު ޖަހާދީފަ އެވެ. އޭނާ މިވަގުތު ކެޕްޓަން ބޭންޑު އަޅަނީ ޓީމުގެ ކެޕްޓަން ހެރީ މެގުއާ ފުރަތަމަ 11 އަށް ނާރާތީވެ ވައިސް ކެޕްޓަނެއްގެ ގޮތުންނެވެ.

ޔުނައިޓެޑްގެ ކުރީގެ ކެޕްޓަން ރިއޯ ފާޑިނަންޑް ބުނެފައިވަނީ ފެނާންޑޭޒް އަކީ މޮޅުވާން މަސައްކަތް ކުރާ ކުޅުންތެރިއެއް ކަމަށާއި ނަމަވެސް ކޮންމެ މީހަކީ ލީޑަރެއްނޫން ކަމަށެވެ.