އިނގިރޭސި ޕްރިމިއަރ ލީގުގެ މިސީޒަންގެ އެންމެ މޮޅު ކުޅުންތެރިއަކީ ކާކު ހެއްޔެވެ؟ ސީޒަން ނިމެންދާއިރު ލީގު ޗެމްޕިއަންޓީމްއަކީ ކޮބައިތޯ އުފެދޭ ސުވާލާއެކު ދެން އޮތް އެންމެ ބޮޑު ސުވާލަކީ މިއީއެވެ.

ލީގުގައި އެއްވަނައިގައި އޮތް މެންޗެސްޓަރ ސިޓީއަށްވެސް އަދި ލިވަޕޫލަށްވެސް ބާކީ އޮތީ ދެ މެޗެވެ. ތިން ޕޮއިންޓްގެ ލީޑަކާއެކު އެއްވަނައިގައި އޮތީ ސިޓީއެވެ. ދެ މެޗުން ސިޓީއަށް ބޭނުންވަނީ ހަތަރު ޕޮއިންޓެވެ. ދެ މެޗުން ތިން ޕޮއިންޓް ހޯދައިގެންވެސް ސިޓީއަށް ލީގު ލިބިދާނެއެވެ. ލިވަޕޫލްއަށް ފުރުޞަތު އޮތީ ސިޓީ ބަލިވެގެންނެވެ. ލީގަށް ވާދަކުރާ ދެޓީމުންކުރެ ކޮންމެ ޓީމަކުން ދެ ކުޅުންތެރިން އަންނަނީ ލީގުގެ މޮޅު ކުޅުންތެރިޔާގެ އެވޯޑަށް ވާދަކުރަމުންނެވެ.

ސިޓީން އެވޯޑަށް ވާދަކުރަނީ މިޑްފީލްޑަރ ކެވިން ޑި ބުރައިނާއާއި, ޑިފެންޑަރ ކާންސޭލޯއެވެ. ލިވަޕޫލުން ވާދަކުރަނީ ފޯވާޑް މުޙައްމަދު ސަލާހުއާއި, ކަނާތު ބެކް 23 އަހަރުގެ އަލެގްޒެންޑަރ އާނޯލްޑްއެވެ. އެހެން ޓީމްޔަކުން އެވޯޑަށް ވާދަލުރަނީ ވެސްޓްހޭމްގެ ވިންގަރ ބޮވެން, އާސެނަލްގެ ފޯވާޑް ބުކާޔޯ ސާކާ, ޓޮޓެންހަމްގެ ފޯވާޑް ސޮން, ސައުތްހެމްޓަންގެ ކެޕްޓަން ޖޭމްސްއެވެ. މީގެތެރެއިން އެވޯޑަށް އެންމެ ބޮޑަށް ވާދަކުރާނެކަމަށް ބެލެވެނީ މީގެކުރިން މިއެވޯޑް ހޯދާފައިވާ ސިޓީގެ ޑި ބުރައިނާއާއި, ލިވަޕޫލްގެ ސަލާހުއެވެ.

ސަލާހު ހުރީ ލީގުގެ ލަނޑު ލިސްޓްގެ ކުރީގައެވެ. އޭނާ ރަންބޫޓްގެ ލިސްޓްގެ ކުރީގައި ހުރީ 22 ގޯލް ޖަހައިގެންނެވެ. އެކަމަކު ލަނޑެއްގެ ފަރަޤަކާއެކު ޓޮޓެންހަމްގެ ސޮން ދެވަނައިގައި ހުރުމުން ރަންބޫޓް އަދި ޔަޤީނެއް ނޫނެވެ. ޑި ބުރައިނާ ވަނީ ސީޒަންގައި 15 ގޯލް ޖަހާފައެވެ. އޭގެތެރޭގައި އެންމެ ފަހުން ވުލްވްސް ކޮޅަށް ޖެހި ހަތަރު ލަނޑު ހިމެނެއެވެ. 15 ގޯލް ޖެހުމުގެ އިތުރުން ހަތް ގޯލް ޖަހަން ފުރުޞަތު ފަހިކޮށްދިނެވެ. މިދިޔަ ސީޒަންގައި އެވޯޑް އުފުލާލީ ސިޓީގެ ޑިފެންޑަރ ރުބެން ޑިއާސްއެވެ. އެކަމަކު މިސީޒަންގައި އަނިޔާގެ ސަބަބުން އޭނާއަށް މެޗުތަކެއް ގެއްލުނެވެ.

އެވޯޑް ލިބޭ ކުޅުންތެރިއެއް ކަނޑައަޅާނީ ޓީމްތަކުގެ ކެޕްޓަނުންނާއި, ޕެނަލިސްޓުންގެ އިތުރުން ޢާއްމު ވޯޓުންނެވެ. ޢާއްމު ވޯޓް ދެނީ ޕްރިމިއަރ ލީގު ވެބްސައިޓް މެދުވެރިކޮށެވެ.