ވިންޓާ އޮލިމްޕިކްސްގެ މެޑަލިސްޓް ފެނާންޑޭޒް މަރުވެފައި އޮއްވާ ފެނިއްޖެ

ވިންޓާ އޮލިމްޕިކްސްގެ މެޑަލިސްޓެއް ކަމަށްވާ ސްޕެއިންގެ ބްލަންކާ ފެނާންޑޭޒް އޮޗޯ މަރުވެފައި އޮއްވާ ފެނިއްޖެއެވެ.

އުމުރުން 56 އަހަރުގެ ފެނާންޑޭޒް މަރުވެފައި އޮއްވާ ބުދަ ދުވަހު ފެނުނީ މިދިޔަ އޯގަސްޓް މަހު 23 ވަނަ ދުވަހުން ފެށިގެން އޭނާ ހޯދުމަށް މަސައްކަތް ކުރަމުން އަންނަނިކޮށެވެ.

ފެނާންޑޭޒް ދުއްވި ކާރު އާދީއްތަ ދުވަހު މެޑްރިޑުގެ އަވަށަކުން ފެނިފައިވާއިރު، އޭނާ މަރުވެފައިވާ އޮއްވާ ފެނުނީ މެޑްރިޑުގެ ފަރުބަދަ ހިމެނޭ ސަރަހައްދަކުންނެވެ. އޭނާގެ މަރުގެ މައްސަލަ ކަމާބެހޭ ފަރާތްތަކުން ވަނީ ތަހުގީގު ކުރަން ފަށައިފައެވެ.

ފެނާންޑޭޒްގެ މަރާއެކު ސްޕެއިންގެ ސެކެޓްރީ އޮފް ސްޓޭޓް ފޯ ސްޕޯޓްސް މާރިއާ ހޮސޭ ރެއިންޑާ ވިދާޅުވީ، މިއީ ސްޕެއިންގެ ކުޅިވަރުގައި ހިތާމަވެރި ދުވަހެއް ކަމަށެވެ.

ފެނާންޑޭޒް ވަނީ 1992 ވަނަ އަހަރު ފްރާންސްގައި ކުރިޔަށްދިޔަ ވިންޓާ އޮލިމްޕިކްސްގައި ސްޕެއިންއަށް ރަން މެޑަލް ހޯދައިދީފައެވެ. އޭނާއަކީ ވިންޓާ އޮލިމްޕިކްސްގައި ސްޕެއިންއަށް ފުރަތަމަ ރަން މެޑަލް ހޯދައިދިން އަންހެން އެތުލީޓެވެ.

ފެނާންޑޭޒް ވަނީ ޖުމްލަ ހަތަރު ވިންޓާ އޮލިމްޕިކެއްގައި ބައިވެރިވެފައެވެ. އެއީ 1980 އިން ފެށިގެން 1992 ވަނަ އަހަރާ ހިސާބަށެވެ.