ރޮނާލްޑޯގެ ސަބަބުން ފެނާންޑޭޒްގެ ކުޅުން ދައްވާކަމަށް ބުނާ ވާހަކަތަކަށް އޭނާ ރައްދު ދީފި

ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ މެންޗެސްޓަރ ޔުނައިޓެޑަށް ބަދަލުވި ފަހުން، ބްރޫނޯ ފެނާންޑޭޒްގެ ކުޅުން ދަށްވާ ކަމަށް ދެކެވޭ ވާހަކަތަކަށް ފެނާންޑޭޒް ރައްދު ދީފިއެވެ.

ސްޕޯޓިން ދޫކޮށް ޔުނައިޓެޑަށް ބަދަލުވެ ފެނާންޑޭޒް ވަނީ މޮޅު ކުޅުމެއް ދައްކާފައެވެ. ޔުނައިޓެޑަށް ބަދަލުވި ފުރަތަމަ ސީޒަންގައި އޭނާ ވަނީ އެ ޓީމަށް ކުޅެދިން 22 މެޗުން 12 ލަނޑު ޖަހާފައެވެ. ޖެހިގެން އައި ސީޒަންގައި އޭނާ ވަނީ 28 ލަނޑު ޖަހާފައެވެ. ނިމުނު ސީޒަންގައި އޭނާ އަށް 10 ލަނޑު ޖެހުނުއިރު، މިހާރު ކުރިއަށް މި ދާ ސީޒަންގައި ފެނާންޑޭޒަށް އަދި ޖެހުނީ އެންމެ ލަނޑެކެވެ. ބައެއް ފަރާތްތަކުން ދެކޭ ގޮތުގައި އޭނާގެ ކުޅުން ދަށްވެގެން ދިޔައީ ނިމުނު ސީޒަންގައި ރޮނާލްޑޯ ޔުނައިޓެޑާ ގުޅުނު ހިސާބުންނެވެ.

ނަމަވެސް ފެނާންޑޭޒް ވަނީ އެ ވާހަކަތައް ދޮގުކޮށްފައެވެ. އޭނާ ފާހަގަކުރި ގޮތުގައި ނިމުނު ސީޒަންގައި އޭނާ އަށް ގިނައިން އެސިސްޓް ކުރެވިފައިވަނީ ރޮނާލްޑޯއަށް ކަމަށެވެ. އޭނާ ބުނީ މިދިޔަ ސީޒަނުގައި އޭނާ ކުޅުން ދަށްވެގެން ދިޔައީ ރޮނާލްޑޯގެ ސަބަބުންނޭ ބުނެވޭނެ އެއްވެސް ޖާގައެއް ނެތް ކަމަށެވެ. މީގެ އިތުރުން އޭނާ ބުނީ، ރޮނާލްޑޯ ޔުނައިޓެޑަށް ބަދަލުވުމުގެ ކުރިން އެ ޓީމަށް ލިބޭ ޕެނަލްޓީތައް ޖަހަނީ އޭނާ ކަމަށެވެ. ނަމަވެސް މިދިޔަ ސީޒަނުގައި އޭނާ އަށް ދެ ޕެނަލްޓީ ޖަހަން ފުރުސަތު ލިބުނުކަން ފާހަގަކޮށް ފެނާންޑޭޒް ބުނީ، އެ ދެ ޕެނަލްޓީ ވެސް ނާކާމިޔާބުވީ ކަމަށެވެ. އެހެންކަމުން ރޮނާލްޑޯ ޕެނަލްޓީ ޖެހުމަކުން އޭނާ އަށް ރޮނާލްޑޯ ކުށްވެރި ނުކުރެވޭނެ ކަމަށް ވެސް ފެނާންޑޭޒް ބުންޏެވެ.

މީގެ އިތުރުން އޭނާ ވަނީ ބައެއް މެޗުތަކުގައި ކަން ހިނގާފައިވާ ގޮތް ފާހަގަކޮށްފައެވެ. އެގޮތުން އާސެނަލާ ދެކޮޅަށް ކުޅުނު މެޗުގައި ރޮނާލްޑޯ އޭނާ އަށް ބޯޅަ ދިނުމަށްފަހު، ޕެނަލްޓީ ޖަހަން އެދުނު ކަމަށް އޭނާ ބުންޏެވެ. ނަމަވެސް އެ ޕެނަލްޓީ ނާކާމިޔާބުވިކަން ފާހަގަކޮށް އޭނާ ބުނީ، އޭނާ އަށް ވިސްނުނީ މުހިންމު ވަގުތުގައި ވެސް ރޮނާލްޑޯ އޭނާ އަށް އިތުބާރު ކުރާ ކަމަށެވެ. އޭނާ ބުނީ ރޮނާލްޑޯ ބެންޗުގައި އިނދެ ޕްރިމިއަރ ލީގުގައި އޭނާ ހަތަރު މެޗު ކުޅުނު އިރު، ޖެހުނީ އެންމެ ލަނޑެއް ކަމަށާއި، އެހެންކަމުން އެއީ ރޮނާލްޑޯގެ މައްސަލަ އޮންނަ ކަމެއް ނޫންކަން ސާފުވާ ކަމަށެވެ.

ފެނާންޑޭޒް ވަނީ ޕޯޗުގަލްގެ ޤައުމީ ޓީމުގައި ވެސް ރޮނާލްޑޯއާއެކު ކުޅެން ފަސޭހަކަން ފާހަގަކޮށްފައެވެ. އަދި އޭނާ ބުނި ގޮތުގައި ރޮނާލްޑޯ އަކީ އިދިކޮޅު ޓީމުން ޖެހިލުންވާވަރުގެ ކުޅުންތެރިޔެއް ކަމަށެވެ.