މިވަގުތު ހުރިހާ ފޯކަސްއެއް ހުރީ ބެންފީކާ އަށް ކަމަށް އާޖެންޓީނާގެ ސެންޓަ މިޑްފީލްޑަރު އެންޒޯ ފެނާންޑޭޒް ބުނެފި އެވެ.

ފެނާންޑޭޒް މިހެން ބުނީ އޭނާގެ ކުރިމަގާ ގުޅޭ ގޮތުން އެކި މީޑިއާތަކުގައި ވާހަކަ ރިޕޯޓުކޮށްފައި ވަނިކޮށެވެ. ޑިސެމްބަރު މަހު ޤަތަރުގައި ނިމުނު ފީފާ ވޯލްޑް ކަޕް މުބާރާތް ދެކުނު އެމެރިކާގެ އާޖެންޓީނާ އިން ކާމިޔާބު ކުރުމުގައި ފެނާންޑޭޒްގެ ދައުރު ބޮޑެވެ. ޒުވާން ކުޅުންތެރިޔާ ވަނީ މުބާރާތުގައި މޮޅު ކުޅުމެއް ވެސް ދައްކާފަ އެވެ. އެގޮތުން މިއަހަރުގެ މުބާރާތުގެ އެންމެ މޮޅު ޒުވާން ކުޅުންތެރިޔަކަށް ވެސް ހޮވުނީ އޭނާ އެވެ. އެއާއެކު ފެނާންޑޭޒް ހޯދަން ބޭނުންވާ ކުލަބުތަށް އޮތް ކަމަށް ވެސް ރިޕޯޓުތައް ބުނެ އެވެ.

އެކަމާ ގުޅޭ ގޮތުން ފެނާންޑޭޒް ބުނީ އޭނާގެ މުސްތަޤުބަލާމެދު ވަކި އެއްޗެއް ބުނަން ނޭންގޭ ކަމަށެވެ. އަދި އިތުރު ކުލަބެއްގެ ހުށަހެޅުމެއް ވެސް އޭނާ އަށް އޮތް ކަމެއް ނޭންގޭ ކަމަށެވެ. ފެނާންޑޭޒް ބުނީ އެކަމުގެ ކަންކަން ބަލައި، އެކަމުގައި ކުރަން ޖެހޭ މަސައްކަތް ކުރާނީ އޭނާގެ އެޖެންޓް ކަމަށެވެ. މީގެ އިތުރުން ފެނާންޑޭޒް ބުނީ މިވަގުތު އެހެން ކަމަކަށް ވިސްނުން ދޫކޮށްލަން ބޭނުންނުވާ ކަމަށާއި، ފޯކަސް ހުރީ ބެންފީކާ އަށް ކަމަށެވެ. އަދި ހުކުރު ދުވަހު އޮތް މެޗުގައި މޮޅަށް ކުޅެ، ޓީމާއެކު މޮޅުވާން ވިސްނުން ހުރި ކަމަށެވެ.

އުމުރުން 21 އަހަރުގެ ޒުވާން ކުޅުންތެރިޔާ އޭނާގެ ސީނިއާ ކެރިއަރު ފެށީ 2019 ވަނަ އަހަރު އާޖެންޓީނާގެ ރިވާ ޕްލޭޓުންނެވެ. އެއަށްފަހު ލޯނު އެއްބަސްވުމެއްގެ ދަށުން ޑިފެންސާ އަށް އެއް އަހަރު ކުޅުމަށްފަހު، އޭނާ ބެންފީކާ އަށް ބަދަލުވީ މިއަހަރު އެވެ. ބެންފީކާ އަށް ބަދަލުވެ މިހާތަނަށް އެ ކުލަބަށް ކުޅެދިން 24 މެޗުގައި އޭނާ ވަނީ ތިން ލަނޑު ޖާހަފަ އެވެ. އާޖެންޓީނާގެ ޤައުމީ ޓީމުން ފެނާންޑޭޒް އަށް ޖާގަ ލިބުނީ ވެސް މިއަހަރު އެވެ. ޤައުމީ ޓީމަށް އޭނާ ވަނީ މިހާތަނަށް 10 މެޗު ކުޅެދީފަ އެވެ.