ސްޕޮންސަރުން ބޭނުންވާ ފޯމެޓް ކަމަކުނުދޭ: ބައްސާމް
ސްޕޮންސަރުން ބޭނުންވަނީ ހޯމް އެންޑް އަވޭ ކުޅެން
ރާއްޖެ އާއި ލަންކާ ސާފް ޗެމްޕިއަންޝިޕް 2021ގައި ކުޅުނު މެޗަށް ފަހު ފޭދޫ އިއްބެ ސަޕޯޓަރުންނާ ސަލާމްކުރަނީ
ސާފް ޗެމްޕިއަންޝިޕް ފުޓްބޯޅަ މުބާރާތް ބާއްވަން ސްޕޮންސަރުން ބޭނުންވާ ފޯމެޓް ރަނގަޅު ނޫން ކަމަށް އެފްއޭއެމުގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.
އޭއެފްސީ އެކްސްކޯގެ މަގާމެއްގައި ވެސް ހުންނެވި ބައްސާމް ވިދާޅުވީ ސާކްގެ ސަރަހައްދީ އެންމެ ބޮޑު ފުޓްބޯޅަ މުބާރާތުގެ މާކެޓިން ޕާޓްނަރު ސްޕޯޓްސް ޕާޓްނަރ އިންޓަނޭޝަނަލް ގްރޫޕުން ބޭނުންވަނީ ހޯމް އެންޑް އަވޭ އުސޫލުން ކަމަށެވެ.
ސާފް ޗެމްޕިއަންޝިޕް ކުރިއަށް އޮތް ޖޫން މަހު ބާއްވާނީ އިންޑިޔާގަ އެވެ. މި ގޮތުން ކޮންމެ ދެ މުބާރާތަކުން އެއް މުބާރާތް އެ ގައުމުގައި ބޭއްވުމަކީ ވެސް ސްޕޮންސަރުން ބޭނުންވާ ކަމެކެވެ.
ރާއްޖެ ވަނީ މި މުބާރާތް 2008 އާއި 2018ގައި ކާމިޔާބުކޮށްފަ އެވެ. މީގެ ތެރެއިން ފަހު ފަހު ފަހަރު ތަށި ހޯދީ ބައްސާމްގެ ލީޑަރޝިޕުގަ އެވެ. އޭނާ ވިދާޅުވީ މި އަހަރު އިންޑިޔާގައި ބާއްވާ މުބާރާތަށް ވެސް ރާއްޖެ ކުރިމަތިލާނީ ތަށި ހޯދުމަށް ކަމަށެވެ.
