ދުނިޔޭގެ އެކި ކަންކޮޅުތަކުގައި މިހާރު ފެތުރެމުންދާ ކޮރޯނާވައިރަސް (ކޮވިޑް-19) ގެ ނުރައްކާ ސްޕެއިންގައި ބޮޑުވެފައިވުމާއިއެކު، ސްޕެއިންގެ ރެއާލް މެޑްރިޑްގެ ދަނޑު ކަމަށްވާ ސަންޓިއާގޯ ބާނަބައު، ބޭސް ރައްކާކުރާ ތަނަކަށް ބޭނުން ކުރުމަށް ދީފިއެވެ.

ރެއާލް މެޑްރިޑުން ބުނީ ސްޕެއިންގެ ހައި ކައުންސިލް ފޯ ސްޕޯޓްސް (ސީއެސްޑީ) އާއި ރެއާލުން ގުޅިގެން އެ ކްލަބުގެ ދަނޑު ކަމަށްވާ ސަންޓިއާގޯ ބާނަބައު، ބޭސް ރައްކާކުރާ ތަނެއްގެ ގޮތުގައި ބޭނުން ކުރަން ދީފައިވާ ކަމަށެވެ. މީގެ އިތުރުން ރެއާލުން ބުނީ އެކްލަބުގެ ފިހާރަތަކަށް ފައިސާ އާއި އަދި އެނޫންވެސް ތަކެތި ހަދިޔާ ކުރުމުން ކޮވިޑް-19 އާއި ދެކޮޅަށް ހަނގުރާމަ ކުރުމަށް އެފައިސާ ހަދިޔާ ކުރާނެ ކަމަށެވެ.

ކޮވިޑް-19 އާ ދެކޮޅަށް ހަނގުރުމާކުރުމަށް މަޝްހޫރު ގިނަ ފުޓްބޯޅަ ކުޅުންތެރިން އަންނަނީ އެހީތެރިވަމުންނެވެ. އެގޮތުން ކްރިސްޓިއާނޯ ރޮނާލްޑޯ އާއި ލިއޮނެލް މެސީ ވެސް ވަނީ މާލީގޮތުން އެހީތެރިކަން ފޯރުކޮށްދީފައެވެ. މީގެ އިތުރުން ދާދި ފަހުން ބާސެލޯނާ އަށް ކުރިން ކުޅުނު އަދި އެ ޓީމަށް ކުރިން އިރުޝާދުދިން މިހާރު މެންޗެސްޓާ ސިޓީގެ ކޯޗު ޕެޕް ގާޑިއޯލާ ވަނީ ކެޓަލޫނިއާގެ ހޮސްޕިޓަލްތަކަށް އެއް މިލިއަން ޔޫރޯ ހަރަދުކޮށްފައެވެ.

އަދި ހާއްސަ ވެބްސައިޓެއް މެދުވެރިކޮށް ޖަރުމަންގައި ހަދާފައިވާ ފަންޑަށް އެގައުމުގެ ބަޔާން މިއުނިކަށް ކުޅެމުން އަންނަ ޕޮލެންޑުގެ ފޯވާޑް ރޮބަޓް ލެވަންޑޯސްކީ އާއި ޖަރުމަން ގައުމީ ޓީމުގެ ކުޅުންތެރިން ގުޅިގެން ވަނީ 2.5 މިލިއަން ޔޫރޯއަށްވުރެ ގިނަ ފައިސާ ހޯދާފައެވެ.

އަދި ލިވަޕޫލްގެ ފޯވަރޑް ސަޑިއޯ މާނޭ ވަނީ އަމިއްލަ ގައުމު ކަމަށްވާ ސެނެގާލްގައި މިހާރު ފެތުރެމުންދާ ކޮވިޑް-19 އާއި ހަނގުރާމަކުރުމަށް އެ ގައުމުން ކަނޑައަޅާފައިވާ ގައުމީ ކޮމިޓީއަށް 45،000 ޔޫރޯ ހަދިޔާކޮށްފައެވެ. މީގެ އިތުރުން މަޝްހޫރު ފުޓްބޯޅަ ކުޅުންތެރިޔާ ޒަލަޓާން އިބްރަހިމޮވިޗް އާއި ޕޯލް ޕޮގްބާ ވެސް ވަނީ ފަންޑެއް ހުޅުވާފައެވެ.

އަދި ދާދި ފަހުން ދުނިޔޭގެ ފުޓްބޯޅައިގެ މައި އިދާރާ ފީފާއިން ވެސް ވަނީ 10 މިލިއަން ޑޮލަރުގެ އެހީއެއް ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އަށް ދީފައެވެ.

ކޮވިޑް-19 ގެ ސަބަބުން ދުނިޔޭގެ ފުޓްބޯޅަ ވަނީ ހުއްޓުމަކަށް އައިސްފައެވެ.