2 މަސް ތެރޭގައި 350،000 އަށްވުރެ ގިނަ ފަތުރުވެރިން!

އަހަރުގެ ފުރަތަމަ 2 މަސް ނިމުނުއިރު 350،413 ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީން ހާމަކޮށްފިއެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން ޖެނުއަރީ މަސް ނިމުނުއިރު ރާއްޖެ އައިސްފައިވަނީ 172،499 ފަތުރުވެރިންނެވެ. އަދި ފެބްރުއަރީ މަސް ނިމުނުއިރު 177،914 ފަތުރުވެރިން އައިސްފައިވާކަމަށް މިނިސްޓްރީން ހާމަކުރެއެވެ. މިއާއެކު މިއަހަރު އައި ފަތުރުވެރިންގެ ޖުމްލަ 350،413 އަށް އަރާއިރު، މިއީ ފާއިތުވި އަހަރާ އަޅާ ބަލާއިރު 24.8 އިންސައްތަ އިތުރު އަދަދެކެވެ.

ފެބްރުއަރީ މަހު އެވަރޭޖުކޮށް ދުވާލަކު 6،354 ފަތުރުވެރިން އައިސްފައިވެއެވެ. ފެބްރުއަރީ މަހު އެންމެ ގިނަ ފަތުރުވެރިން އައިސްފައިވަނީ 11 ވަނަ ދުވަހުއެވެ. އެއީ 8،029 ފަތުރުވެރިންނެވެ. މިއަހަރު އެވަރޭޖުކޮށް ދުވާލެއްގެ މައްޗަށް އައިސްފައިވަނީ 5،939 ފަތުރުވެރިންނެވެ.

އަހަރުގެ މިހާތަނަށް އަިއއިރު ޓޮޕް މާކެޓުގެ ގޮތުގައި އޮތް ރަޝިއާއިން މިހާތަނަށް 44،748 ފަތުރުވެރިން ވަނީ އައިސްފައެވެ. ދެވަނައިގައި އިންޑިއާއ އޮތްއިރު އެގައުމުން 38،109 ފަތުރުވެރިން އައިސްފައިވެއެވެ. އިނގިރޭސިވިލާތުން 32،566 ފަތުރުވެރިން އައިސްފައިވެއެވެ. މީގެ އިތުރުން ޓޮޕް މާކެޓުތަކުގެ ތެރޭގައި ހިމެނެނީ އިޓަލީ، ޖަރުމަނު، ފްރާންސް، އެމެރިކާ، ޗައިނާ، ސްވިޒަރލޭންޑް އަދި ޕޮލެންޑެވެ.

ޓޫރިޒަމް މިނިސްޓްރީން ބުނީ 1،221 ޓޫރިސްޓު އެކޮމޮޑޭޝަން ފެސިލިޓީއެއް މިވަގުތު އޮޕަރޭޝަންގައި އެބައޮތް ކަމަށެވެ. އެއީ 168 ރިސޯޓާއި، 13 ހޮޓާ، 886 ގެސްޓްހައުސް އަދި 154 ސަފާރީ އުޅަނދެވެ. މި ފެސިލިޓީތަކުގައި ޖުމްލަ 60،138 އެނދުގެ ޖާގަ ހުރެއެވެ.

ޓޫރިޒަމް މިނިސްޓްރީން ބުނީ ރާއްޖޭގެ 20 އަތޮޅެއްގެ 117 ރަށެއްގައި ގެސްޓްހައުސް ހިންގަމުންދާކަަމަށެވެ. އެއީ 14،310 އެނދުގެ ކެޕޭސިޓީއެވެ.

ރިސޯޓުތަކެކޭ އެއްފަދައިން ލޯކަލް ޓޫރިޒަމް ކުރިއެރުވުމަކީ ސަރުކާރުން ޚާއްސަ އިސްކަމެއް ދޭ އެއް ކަންތަކެވެ. މިގޮތުން ގެސްޓްހައުސް ވިޔަފާރި ފުޅާކުރުމަށް ޚާއްސަ އިސްކަމެއް ދެއެވެ. އަދި މިކަމަށްޓަކާ ބޭނުންވާ އުމްރާނީ ވަސީލަތްތައް ގާއިމްކޮށް ރަށްރަށް ތަރައްގީކުރުމަށް މަސައްކަތްކުރެއެވެ.