ފާއިތުވި ޑިސެންބަރު މަސް ނިމުނުއިރު، ރާއްޖޭގެ އިޤްތިސާދުގައި ހުރި ޖުމްލަ ފައިސާ އަދަދަކީ 30.5 ބިލިއަން ރުފިޔާ ކަމަށް އެމްއެމްއޭ އިން ހާމަކޮށްފި އެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާއްމުކޮށްފައިވާ އިގްތިސާދީ މުރާޖާ ރިޕޯޓުގައި ވަނީ އަހަރުން އަހަރަށް ބަލާއިރު ރާއްޖޭގެ އިގްތިސާދުގައި ޖުމްލަ ފައިސާ އިތުރުވި މިންވަރު 2016 ވަނަ އަހަރުގެ ނޮވެންބަރު މަސް ނިމުނު އިރު ތިން ޕަސެންޓް ދަށަށް ގޮސްފައިވާ ކަމަށެވެ. މިދިޔަ ޑިސެމްބަރު މަހު އިގްތިސާދުގައި ހުރި ޖުމްލަ ފައިސާ އިތުރުވެފައިވާ ކަމަށް އެމްއެމްއޭއިން ބުނެއެވެ. އެހެން ނަމަވެސް އިތުރުވެފައިވަނީ ކިހާވަރެއް ކަމެއް އެމްއެމްއޭ އިން ހާމަކޮށްފައެއް ނުވެއެވެ.

މީގެ މައިގަނޑު ސަބަބަކީ ބޭންކިންގް ނިޒާމުގެ ނެޓް ފޮރިން އެސެޓްސް ދަށްވެފައިވީ ނަމަވެސް ނެޓް ޑޮމެސްޓިކް އެސެޓްސް އިތުރުވެފައިވުން ކަމަށް އެމްއެމްއޭ އިން ބުނެއެވެ.

އަހަރުން އަހަރަށް ބަލާއިރު، ބޭންކިންގް ނިޒާމުގެ ނެޓް ފޮރިން އެސެޓްސް ދަށް ވެފައިވަނީ އެމްއެމްއޭ އަދި ވިޔަފާރި ބޭންކުތަކުގެ ނެޓް ފޮރިން އެސެޓްސް ދަށްވުމާ ގުޅިގެން ކަމަށް އެމްއެމްއޭ އިން ބުނެ އެވެ.

ބޭންކިންގް ނިޒާމުގެ ނެޓް ޑޮމެސްޓިކް އެސެޓްސް އިތުރުވި މައިގަނޑު ސަބަބަކީ ބެންކިންގް ދާއިރާއިން ސެކިއުރިޓީސްގައި އިންވެސްޓްކޮށްފައިވާ އަދަދު އިތުރުވެފައިވާތީ ކަމަށް ވެސް އެމްއެމްއޭ އިން ހާމަކުރެ އެވެ.