ޚާމިސް ކަނބުރު: "ނެތި ހިނގައިދާނެ" ކަމުގެ ބިރު ހީވެފައިވާ ޚަޒާނާއެއް!

ފަލަސްޠީނުގެ ރާމައްލާގައި ހުޅުވާފައި ހުރި ކަނބުރު ގޭތެރެއިން ޙަސަން ޚާމިސް މުޅިންހެންވެސް ފެންނާނީ އޭނާގެ ކާފައާއި ބައްޕަ ގޮތަށް، މަރުތޭލެއް ހިފައިގެން އުޅެނިކޮށެވެ. އިންތިހާ ޝަޢުޤުވެރިކަމާއެކު ޚާމިސް މަޝްހޫލުވެ އުޅޭނީ، އިހު އެވޭލާ ޒަމާނުގައި ބޭނުންކޮށް އުޅުނު ޒާތުގެ އެކި ކަހަލަ ޢާލާތްތައް އުފެއްދުމުގެ މަސައްކަތުގައެވެ.

މިހާރު ޢުމުރުން 74 އަހަރު ފުރިފައިވާ ޚާމިސް، ކަނބުރުވެރި މަސައްކަތުގެ ވިޔަފާރީގައި އުޅެން ފެށީ އޭނާގެ ވަރަށް ޅަ ޢުމުރުގައެވެ. އޭރު އެއީ ކުޑަ ފިރިހެން ކުއްޖެކެވެ. އެ ފަންނުވެރިކަމާއި ހުނަރަކީ، ޢީލާގެ އެތައް ޖީލަކުން އޭނާއަށް ވާރުތަވެފައިވާ ހުނަރުވެރިކަމަކާއި ފަންނުވެރިކަމެކޭވެސް ދެންނެވިދާނެއެވެ.

މަސައްކަތުގެ މައިދާނުގައި ޚާމިސް އަދިވެސް ބޭނުން ކުރަނީ އެންމެ އިހު ޒަމާނުގެ އުކުޅުތަކެވެ. ޚާމިސް ބުނާ ގޮތުގައި، އޭނާއަށް އޮންނަ މަސައްކަތުގެ ބުރަކަން މިހާރު ވަނީ ވަރަށް ބޮޑުތަން ކުޑަވެފައެވެ. ސަބަބަކީ، ކަސްޓަމަރުންގެ ފަރާތުން އޮންނަ ޑިމާންޑް ދަށްވުމެވެ. ކަސްޓަމަރުން ބޮޑަށް ބުރަ ވަނީ، ޒަމާނީ ޓެކްނޮލޮޖީ ބޭނުންކޮށްގެން، ހެޔޮ އަގުގައި އިންތިހާ ހަލުވި މިނުގައި އޯޑަރުތައް ތައްޔާރުކޮށްދޭ ކަނބުރުންނެވެ.

އެކަމަކު، މިއީ ޚާމިސްގެ ފަރާތުން ޢާންމުކޮށް ޚިދުމަތް ހޯދާ ކަސްޓަމަރުންގެ ތެރޭގައި ހިމެނޭ ޢަބްދުލް ޖަވާދް ހަލައިކާގެ ގޮތެއް ނޫނެވެ. ޢާއިލީ ގޮތުން ވާރުތަކޮށްފައި ހުރި އަގުބޮޑު ތަރިކަ މުދަލުގެ ކަންކަން ބެލެހެއްޓުމުގައި ހަލައިކާގެ ފުރިހަމަ އިތުބާރު، ޚާމިސްއަށް އޮވެއެވެ. ހަލައިކާ ބުނާ ގޮތުގައި ޚާމިސްއަކީ ފަލަސްޠީނުގެ ޚަޒާނާތަކުގެ ތެރެއިން ޚަޒާނާއެކެވެ.

ފަލަސްޠީނަކީ ތާރީޚާއި ތަރިކައިގެ ގޮތުން އަގު ހުރި އެތައް ވަޞީލަތެއް ހުރި ބިމެއް ނަމަވެސް، ޔަހޫދީ އިޒްރޭލުގެ ހަރުކަށި ފިއްތުންތަކާއެކު، އެފަދަ ކަންކަމަށް ދުނިޔޭގެ މާބޮޑު ސަމާލުކަމެއް ލިބޭގޮތް އޮންނަނީ ނުވެފައެވެ.