ޖޭޕީގެ ކޮންފަރެންސް ނިންމާ، ލީޑަރުގެ ސްޕެޝަލް އެޑްވައިޒަރަކަށް ޖިހާދު

ޖުމްހޫރި ޕާޓީގެ ކޮންފަރެންސް ނިންމުގެ ރަސްމިއްޔާތު އާދިއްތަ ދުވަހުގެ ރޭ ބާއްވައިފިއެވެ.

މި ކޮންފަރެންސްގެ ތެރެއިން ލީޑަރުގެ ސްޕެޝަލް އެޑްވައިޒަރުގެ މަގާމަށް ދިވެހިރާއްޖޭގެ ކުރީގެ ނައިބު ރައީސް، އަބްދުﷲ ޖިހާދު ވަނީ އައްޔަންކޮށްފައެވެ.

ލީޑަރުގެ އެޑްވައިޒަރުކަމަށް އަލަށް އައްޔަނު ކޮށްފައިވަނީ:

ޖުމްހޫރީ ޕާޓީގެ މި ދައުރުގެ ގައުމީ ކޮންފަރެންސް ބާއްވާފައިވަނީ މި މަހުގެ 24 ވަނަ ދުވަހުން 26 ވަނަ ދުވަހުގެ ނިޔަލަށެވެ. ކޮންފަރެންސްގައި ބޭއްވި އިންތިޚާބުން ޕާޓީގެ ކައުންސިލަށް 25 މެމްބަރުން ވެސް ވަނީ އިންތިޚާބު ކޮށްފައެވެ.

25 ކައުންސިލް މެމްބަރުންގެ އިތުރުން އިންތިޚާބުގައި، ޕާޓީގެ ފަސް ޑެޕިއުޓީ ލީޑަރުންނާއި، ޕާޓީގެ ލީގުތަކުގެ މެމްބަރުންނާއި، ރައީސުން އަދި ނައިބު ރައީސުންގެ އިތުރުން ސެކްރެޓަރީ ޖެނެރަލުން އިންތިޚާބުކޮށްފައިވެއެވެ.

މީގެއިތުރުން މިއަހަރު ބާއްވާ ރިޔާސީ އިންތިޚާބުގައި ޖުމްހޫރީ ޕާޓީ އިން ވަކިން ވާދަކުރުމަށް އެ ޕާޓީގެ ކައުންސިލަށް ލަފާ ދިނުމަށް ވެސް ނިންމާފައިވެއެވެ. ރިޔާސީ އިންތިޚާބާ މެދު ޖޭޕީން އަމަލު ކުރާނެ ގޮތް ނިންމާނީ އެ ޕާޓީގެ ގައުމީ ކޮންފަރެންސް އިން އިންތިޚާބުކުރާ އައު ކައުންސިލުންނެވެ. ޖޭޕީއަކީ މިހާރު އޮތް ސަރުކާރުގެ ކޯލިޝަން ބައިވެރިއެކެވެ. އަދި ނައިބު ރައީސް ފައިސަލް ނަސީމަކީ އެ ޕާޓީގެ ބޭފުޅެކެވެ. ސަރުކާރުގެ އިސް މަގާމުތަކުގައި ވެސް އެ ޕާޓީގެ ބޭފުޅުން ތިއްބަވައެވެ.

މިދިޔަ ހުކުރު ދުވަހު ރަސްމީކޮށް ފެށި ޖުމްހޫރީ ޕާޓީގެ ހަތަރުވަނަ ގައުމީ ކޮންފަރެންސްގައި، ގާތްގަނޑަކަށް 700ށްވުރެ ގިނަ މަންދޫބުންނާއި ޕާޓީގެ މެމްބަރުން ބައިވެރިވެފައިވެއެވެ. މި ކޮންފަރެންސްގެ ތެރޭގައި، ޕާޓީގެ އަސާސީ ގަވައިދަށް ހުށަހެޅުނު ބައެއް އިސްލާހުތައް ފާސްކޮށް، ޕާޓީގެ ކުރިމަގާ ގުޅުންހުރި ނިންމުންތަކެއް ވެސް ވަނީ ނިންމާފައެވެ.