މިއަހަރު ބާއްވާ ރިޔާސީ އިންތިޚާބުގައި ޖުމްހޫރީ ޕާޓީ (ޖޭޕީ) އިން ވަކިން ވާދަކުރުމަށް އެ ޕާޓީގެ ކައުންސިލަށް ލަފާ ދިނުމަށް ނިންމައިފިއެވެ.

މިގޮތަށް ނިންމާފައިވަނީ ހަފުތާ ބަންދުގައި ކުރިއަށްގެންދިޔަ ޖޭޕީގެ ޤައުމީ ކޮންފަރެންސްގައެވެ. އެގޮތުން، ރިޔާސީ އިންތިޚާބުގެ ފުރަތަމަ ބުރުގައި ޖޭޕީގެ ރިޔާސީ ކެނޑިޑޭޓެއް ވާދަކުރުމަށް ނުވަތަ އެ ޕާޓީ އިސްވެ އުފައްދާ ކޯލިޝަނަކުން ރިޔާސީ އިންތިޚާބުގައި ވާދަކުރުމަށް ގޮވާލައި ރައްޔިތުންގެ މަޖިލީހުގެ ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ އަހުމަދު ހުށަހެޅުއްވި ގަރާރަށް ހޮނިހިރު ދުވަހުގެ ރޭ ވަނީ ބަހުސްކޮށް ވޯޓު ނަގައިފައެވެ.

މި ގަރާރަށް ބަހުސްކުރުމަށް ހުޅުވާލި ރިޔާސަތު ބެލެހެއްޓެވީ ޖޭޕީގެ ލީޑަރު ޤާސިމް އިބްރާހީމެވެ. ގަޑިއެއްހާއިރަށް ދެމިގެންދިޔަ މިބަހުސްގައި ވާހަކަފުޅު ދެއްކެވި ގިިނަ މެންބަރުން ވަނީ ޖުމްހޫރީ ޕާޓީގެ ކެނޑިޑޭޓެއް ރިޔާސީ އިންތިޚާބުގައި ވާދަކުރުމަށް ތާޢީދުކުރައްވާ ވާހަކަފުޅު ދައްކަވާފައެވެ.

މި ގަރާރު އެޕާޓީގެ ކޮންގްރެސް އިން ފާސްކުރީ ވޯޓުގައި ބައިވެރިވެވަޑައިގެންނެވި 416 މެންބަރުންގެ އިއްތިފާގުންނެވެ.

އަބްދުﷲ އަހުމަދު ހުށަހެޅުއްވި މި ގަރާރުގައި ބުނެފައިވަނީ 2013 ވަނަ އަހަރުގެ ރިޔާސީ އިންތިހާބުގައި ޖުމްހޫރީ ޕާޓީން ފުރަތަމަ ބުރުގައި ވާދަކޮށް، ދެވަނަ ބުރަށް ނުދިޔައީ ކުޑަ ފަރަގަކުން ކަމަށާއި ޕާޓީގެ ސިޔާސަތުތައް ބައްޓަންކޮށްފައިވަނީ، ރައްޔިތުންނަށް ފައިދާ ހުރި ގޮތްތަކަށް ކަމަށެވެ. އަދި ޖުމްހޫރީ ޕާޓީއަށް، ރާއްޖޭގެ ސިޔާސީ މަސްރަހު މި ވަގުތު ތަރުތީބު ވެފައި އޮތް ގޮތުން، ކުރިއަށް އޮތް ރިޔާސީ އިންތިހާބުގައި ވެރިކަމެއް ގާއިމުކޮށް، ރައްޔިތުންނަށް ހިދުމަތްކުރުމަށް ފަހި ފުރުސަތެއް ލިބިގެންދާނެ ކަމަށް ވެސް ގަރާރުގައި ވަނީ ބުނެފައެވެ.

ރިޔާސީ އިންތިޚާބާ މެދު ޖޭޕީން އަމަލު ކުރާނެ ގޮތް ނިންމާނީ އެ ޕާޓީގެ ގައުމީ ކޮންފަރެންސް އިން އިންތިޚާބުކުރާ އައު ކައުންސިލުންނެވެ.

ޖޭޕީއަކީ މިހާރު އޮތް ސަރުކާރުގެ ކޯލިޝަން ބައިވެރިއެކެވެ. އަދި ނައިބު ރައީސް ފައިސަލް ނަސީމަކީ އެ ޕާޓީގެ ބޭފުޅެކެވެ. ސަރުކާރުގެ އިސް މަގާމުތަކުގައި ވެސް އެ ޕާޓީގެ ބޭފުޅުން ތިއްބަވައެވެ.