ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ކެނޑިޑޭޓަކު ވާދަކުރުމާމެދު ގޮތެއް ނިންމުމަށް މިހާރު ކުރިއަށް ގެންދާ އެ ޕާޓީގެ ގައުމީ ކޮންފަރެންސަށް ހުށަހަޅާފައިވާ ގަރާރަށް ބަހުސްކުރުމަށް، އިސްމަގާމުތަކަށް މީހުން ހޮވުމަށް ކުރިއަށް ގެންދިޔަ އިންތިހާބުގެ ވޯޓުގުނުން މެދުކަނޑާލައިފިއެވެ.

އެންމެ ފުރަތަމަ ތާވަލު ކުރެވިފައި އޮތް ގޮތުން ހޮނިހިރު ދުވަހުގެ ރޭ 20:45ގައި ބޭއްވުމަށް ހަމަޖެހިފައި އޮތީ ކޮންފަރެންސް ނިންމާ ޖަލްސާއެވެ. ނަމަވެސް ހުކުރު ދުވަހުގެ ރޭ ބާއްވަން އޮތް އިންތިހާބު ވަނީ ފަސްވެފައެވެ. ވޯޓުލުން ފަސްކުރި އެއް ސަބަބަކީ، އެއިންތިހާބަކީ ގިނަ ބަޔަކު ވާދަކުރާ އިންތިހާބެއްނަމަވެސް ވޯޓު ކަރުދާހުގައި ކެނޑިޑޭޓުންގެ ފޮޓޯ ޖަހާފައި ނެތުމެވެ. އަދި ޕާޓީގެ ލީޑަރޝިޕުގައި ކުރީގެ ޕީޕީއެމްގެ ލީޑަރޝިޕުގެ ބައެއް މެންބަރުން ހިމެނުމަކީވެސް ކޮންފަރެންސްގެ ގިނަ ބައިވެރިންގެ ކަަންބޮޑުވުމެކެވެ. މި ޝަކުވާތަކާ ގުޅިގެން އެ ޕާޓީން ނިންމީ ވޯޓުލުމުގެ ކަންކަން މިއަދު ހެނދުނު ދަންފަޅީގައި ކުރިއަށް ގެންދިއުމަށެވެ.

މިހާރު ނިންމާފައިވަނީ ވޯޓު ގުނުން މެދުކަނޑާލުމަށްފަހު 21:30ގައި ގަރާރަށް ބަހުސްްކުރަން ފެށުމަށެވެ. އެ ޕާޓީން ރިޔާސީ އިންތިހާބުގައި ކުރިއަށްްދާނެ ގޮތެއް ނިންމުމާއި، އެކަމާ ގުޅިގެން ކައުންސިލުގައި ހިމެނޭ މެންބަރުން ބަހުސްކުރުމަށް ވަނީ ނިންމާފައެވެ.

ވޯޓުލުން ނިންމައި، ނަތީޖާ އިއުލާނުކުރުން ހޮނިހިރު ދުވަހުގެ 15:00އާ ހަމައަށް ތާވަލުކުރެވިފައި އޮތް ނަމަވެސް، އެކި ސަބަަބުތަކާާހުރެ ވޯޓުލުން ހަވީރު 16:30އާ ހަަމައަށް ދެމިގެން ދިޔައެވެ. ޖޭޕީން މައުލޫމާތު ދޭ ގޮތުގައި އިންތިހާބުގައި ވޯޓުލާން ރަޖިސްޓްރީކުރީ 741 މެމްބަރުނެވެ. އޭގެތެރެއިން 680 މެންބަރުން ވޯޓުލާފައިވެއެވެ.

ވޯޓުލުން ކުރިއަށް ގެންދިޔަ އެންމެ އިސް މަގާމުކަމަަށްވާ ނައިބު ލީޑަރުންގެ މަގާމަށް 12 ބޭފުޅަކު ކުރިމަތިލެއްވިއެވެ.

ޖުމްހޫރީ ޕާޓީގެ ލީޑަރުގެ މަގާމަށްވެސް އިންތިހާބުގައި ވާާދަކުރުމަށް ހުޅުވާލި ނަމަވެސް އެއްވެސް ފަރާތަކުން ވާދަކޮށްފައި ނުވާތީ އެމަގާާމު ލިބިވަޑައިގަތީ މިހާރުވެސް ލީޑަރު، މާމިގިލީ ދާއިރާގެ މެންބަރު ގާސިމް އިބްްރާހީމަށެވެ.