ޖުމްހޫރީ ޕާޓީގެ ލީޑަރުގެ މަގާމަށް އަނެއްކާ ވެސް ގާސިމް އިބްރާހިމް އިންތިހާބުކޮށްފިއެވެ.
ޖޭޕީގެ ލީޑަރުގެ މަގާމަށް ގާސިމް އިންތިހާބު ވެފައިވާކަން އިއުލާން ކޮށްފައި ވަނީ މިހާރު ކުރިއަށްދާ އެ ޕާޓީގެ ހަތަރުވަނަ ގައުމީ ކޮންގްރެސްގައެވެ. ޖޭޕީގެ ލީޑަރުގެ މަގާމަށް ގާސިމް އިންތިހާބުވީ އެ މަގާމަށް ގާސިމްގެ އިތުރުން އެހެން އެއްވެސް ފަރާތަކުން ކުރިމަތިިލައްވައިފައި ނުވާތީ އެވެ.
ޖޭޕީ އުފެދުނީއްސުރެ ވެސް އެ ޕާޓީގެ ލީޑަރުގެ މަގާމު ފުރުއްވަމުން ގެންދަވަނީ ގާސިމެވެ. މިއީ އޭނާ މި މަގާމަށް އިންތިހާބުވީ ހަތަރުވަނަ ފަހަރެވެ.
މީގެ އިތުރުން ވެސް، ޖުމްހޫރީ ޕާޓީގެ ގައުމީ މަޖިލީހުގައި ހޮވަން ނިންމައިފައިވާ މަގާމުތަކުގެ ތެރެއިން އެންމެ މީހަކު ކުރިމަތިލައިފައިވާތީ ވޯޓަކާނުލައި އިތުރު ތިން މަގާމަކަށް މެމްބަރުން ވަނީ އިންތިޙާބު ވެފައެވެ. އެއީ އެ ޕާޓީގެ ޒުވާނުންގެ ލީގުގެ ރައީސްގެ މަގާމާއި ޒުވާނުންގެ ލީގުގެ ނައިބު ރައީސްގެ މަގާމާއި އަންހެނުންގެ ލީގުގެ ސެކްރެޓަރީގެ މަގާމެވެ. ޒުވާނުންގެ ލީގުގެ ރައީސަކަށް އަބްދުﷲ ޔާމީން އިންތިހާބުވީއިރު، ޒުވާނުންގެ ލީގުގެ ނައިބު ރައީސްގެ މަގާމަށް ހޮވިފައިވަނީ ޝުއައިބު ޝިފާޒް ޝަރީފެވެ. އަދި އަންހެނުންގެ ލީގުގެ ސެކްރެޓަރީއަކަށް ހޮވިފައިވަނީ އައިޝަތު ޝޫޒާ އަހްމަދެވެ.
ޖުމްހޫރީ ޕާޓީގެ ލީޑަރުކަމަށް ގާސިމް ހޮވިފައިވާއިރު، އެ ޕާޓީގެ ނައިބު ލީޑަރުކަމުގެ މަގާމަށް 12 ބޭފުޅަކު ވަނީ ކުރިމަތިލައްވައިފައެވެ. އޭގެ ތެރޭގައި ގާސިމުގެ އަނބިކަނބަލުން އަދި ޓްރާންސްޕޯޓް މިނިސްޓަރު އައިޝަތު ނަހުލާ ވެސް ހިމެނިވަޑައިގަންނަވައެވެ.
