17 އަހަރުން ދަށުގެ ސެމީ ފައިނަލްގައި ތާޖުއްދީން، އއ. އަތޮޅު ތައުލީމީ މަރުކަޒު، އިސްކަންދަރު އަދި ގުޅި

މިހާރު ކުރިއަށްދާ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުން ދަށުގެ އަންހެން ޑިވިޝަންގެ ސެމީ ފައިނަލްގައި ވާދަކުރާނެ ޓީމުތައް ޔަގީންވެއްޖެއެވެ.

ސެމީގައި ވާދަކުރާނެ ހަތަރު ޓީމު ޔަގީންވީ ހުކުރު ދުވަހުގެ ހަވީރާއި ރޭގަނޑު ކުޅުނު ކުއާޓަރ ފައިނަލްގެ މެޗުތަކުންނެވެ. ކުއާޓަރގެ ފުރަތަމަ މެޗުގައި ވާދަކުރީ ޖަމާލުއްދީން ސްކޫލާއި ތާޖުއްދީން ސްކޫލެވެ. ވާދަވެރި ކުޅުމަކަށްފަހު ތާޖުއްދީނުން މެޗު ކާމިޔާބުކުރީ 4-5ންނެވެ. މެޗުގެ މޮޅު ކުޅުންތެރިޔަކަށް ހޮވުނީ ތާޖުއްދީންގެ އައިނާ ލަތީފެވެ. ކުއާޓަރގެ ދެވަނަ މެޗުގައި އއ. އަތޮޅު ތައުލީމީ މަރުކަޒު (ރަސްދޫ)އިން ވަނީ ބޮޑު ތަފާތަކުން ޅ. އަތޮޅު ތައުލީމީ މަރުކަޒު (ހިންނަވަރު) ބަލިކޮށްފައެވެ. އެ މެޗު އއ. އަތޮޅު ތަޢުލީމީ މަރުކަޒުން ކާމިޔާބުކުރީ 20-9ންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެ ޓީމުގެ އާއިޝަތު އިނާ އާތިފެވެ.

ކުއާޓަރ ފައިނަލްގައި ތިންވަނަ މެޗުގައި ހުކުރު ދުވަހުގެ ރޭ ބައްދަލުކުރީ އިސްކަންދަރު ސްކޫލާއި ހުރާ ސްކޫލެވެ. މި މެޗު ފަސޭހަކަމާއެކު އިސްކަންދަރުން ކާމިޔާބުކުރީ 19-7ންނެވެ. މެޗުގެ މޮޅު ކުޅުންތެރިޔަކަށް ހޮވުނީ އިސްކަންދަރުގެ ފާތިމަތު ލީން ރިޝާދެވެ. ކުއާޓަރގެ ފަހު މެޗުގައި ގުޅީ ސްކޫލުން ވަނީ ޣާޒީ ސްކޫލް ބަލިކޮށްފައެވެ. ގުޅިން މެޗު ކާމިޔާބު ކުރީ 10-6ންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެ ޓީމުގެ އާއިޝަތު މަލަކާ އަޒީމެވެ.

މި ޑިވިޝަންގެ ސެމީ ފައިނަލް މެޗުތައް ކުޅުމަށް ހަމަޖެހިފައި އޮތީ އާދިއްތަ ދުވަހުގެ ހަވީރާއި ރޭގަނޑުއެވެ. މުބާރާތުގައި ހޮނިހިރު ދުވަހު ކުރިއަށް ދާނީ 15 އަހަރުން ދަށުގެ އަންހެން ޑިވިޝަންގެ ކުއާޓާ ފައިނަލް މެޗުތަކެވެ.