އެމްއެންޔޫގެ ދެވަނަ ފަހި ސުފުރާ - ފުޑް ފެސްޓިވަލް އަންނަ މަހު

ދިވެހިރާއްޖޭގެ ޤައުމީ ޔުނިވަރސިޓީއިން އިންތިޒާމްކޮށްގެން ހިންގާ ކާބޯތަކެތީގެ މައުރަޒު "އެމް.އެން.ޔޫ ފަހި ސުފުރާ" 2 ވަނަ ފެސްޓިވަލް އަންނަ މަހު ބާއްވަން ނިންމައިފިއެވެ.

މިކަމާއި ގުޅޭގޮތުން އެމްއެންޔޫއިން ބުނީ މި ފެސްޓިވަލް ކުރިއަށް ދާނީ މާޗް 1ން 2ށް ކޮންމެ ދުވަހަކު ހެނދުނު 10:00ން ރޭގަނޑު 10:00ށް ދިވެހިރާއްޖޭގެ ޤައުމީ ޔުނިވަރސިޓީގެ އިދާރީ މަރުކަޒުގައެވެ.

ތަފާތު އެކި ވިޔަފާރިތަކުންނާއި އަމިއްލަ ބައެއް ފަރާތްތައް ހިމެނޭ ގޮތަށް 17 ފަރާތަކުން ވަނީ މި ފެސްޓިވަލްގައި ބައިވެރި ވެފައެވެ. އަދި މި ފެސްޓިވަލް އިން 300އަށް ވުރެ ގިނަ ވައްތަރުތަކުގެ ކާބޯތަކެތި ލިބިގެންދާނެއެވެ. އެމް.އެން.ޔޫ ފަހި ސުފުރާ / އެމް.އެން.ޔޫ ފުޑް ފެސްޓިވަލަށް ވަނުމުގެ ފުރުސަތު ވަނީ ހުރިހާ އާންމުންނަށް ހިލޭ ހުޅުވާލެވިފައިވެއެވެ.

ދިވެހިރާއްޖޭގެ ޤައުމީ ޔުނިވަރސިޓީން ބާއްވާ އެމް.އެން.ޔޫ ފަހި ސުފުރާގެ މައިގަނޑު މަޤްޞަދުތަކުގެ ތެރޭގައި ދިވެހީންގެ ތެރޭގައި ތިބި ކާބޯތަކެތި އުފެއްދުންތެރިން އެ ފަރާތްތަކުގެ ހުނަރު އާންމުންނަށް ދައްކާލެވޭނޭ ފުރުޞަތު ތަނަވަސްކޮށްދިނުން ހިމެނެއެވެ. އަދި ކާބޯތަކެތި ވިއްކުމަށް ބޭނުންވާ ފަރާތްތަކަށް އެފުރުސަތު ފަހި ކޮށްދީ އެފަދަ މާޙައުލެއް އުފެއްދުމަކީވެސް މި ބާޒާރުގެ މަޤްޞަދެއް ކަމަށް އެމްއެންޔޫއިން ބުނެއެވެ.

ޔުނިވަރސިޓީގެ ސްޓާފުންނާއި ދަރިވަރުންގެ ސްޓޯލްތަކެއްވެސް މި ފެސްޓިވަލްގައި ހިމެނިގެން ދާނެއެވެ. އަދި އޭގެ އިތުރުން ކުޑަކުދިންގެ ހަވީރެއްވެސް ހަވީރު 4:00ން 6:00ށް މި ދެ ދުވަހުގައި ކުރިއަށްދާނެއެވެ.