17 އަހަރުން ދަށުގެ ކުއާޓާ ފައިނަލްގައި ޖަމާލުއްދީން، ތާޖުއްދީން، ރަސްދޫ، ހިންނަވަރު، އިސްކަންދަރު، ހުރާ، ޣާޒީ އަދި ގުޅި
23 ފެބުރުއަރީ 2023 | ބުރާސްފަތި 05:16މި ބައިގެ ކުއާޓާ ފަައިނަލް މެޗުތައް ފެށުމަށް ހަމަޖެހިފައި ވަނީ ހުކުރު ދުވަހުގެ ހަވީރު
އިންޓަ ސްކޫލް ހޭންޑް ބޯޅަ މުބާރާތުގެ 17 އަހަރުން ދަށުގެ އަންހެން ބައިގެ މެޗެއްގެ ތެރެއިން
މިހާރު ކުރިއަށްދާ އިންޓަ ސްކޫލް ހޭންޑް ބޯޅަ މުބާރާތުގެ 17 އަހަރުން ދަށުގެ އަންހެން ކެޓަގަރީގެ ކުއާޓާ ފައިނަލްގައި ވާދަކުރާނެ ޓީމުތައް ޔަޤީންވެއްޖެ އެވެ.
މުބާރާތުގެ ކުއާޓާ ފައިނަލުން ޖާގަ ލިބުނީ ހަތަރު ގްރޫޕްގެ މެދުގައި ކުޅުނު ގްރޫޕް ސްޓޭޖު މެޗުތަކަށް ފަހު އެވެ. ކޮންމެ ގްރޫޕަކުން ވެސް އެއް ވަނަ ޓީމާއި ދެ ވަނަ ޓީމަށް ކުއާޓާގެ ޖާގަ ލިބެ އެވެ. ގްރޫޕް އޭ އިން އެއް ވަނައިގައި ޖަމާލުއްދީން ސްކޫލް އެއް ވަނައިގައި ދިޔަ އިރު، ދެ ވަނައިގައި ދިޔައީ ހުރާ ސްކޫލް އެވެ. ޖަމާލުއްދީނުން ކުޅުނު ހަތަރު މެޗުން ވެސް މޮޅުވި އެވެ. ހުރާ ވަނީ އެއް މެޗުން ބަލިވެފަ އެވެ. ކުޅުނު ހުރިހާ މެޗަކުން މޮޅުވެގެން ގްރޫޕް ބީގެ އެއް ވަނަ ލިބެނީ އއ.އަތޮޅު ތަޢުލީމީ މަރުކަޒު (ރަސްދޫ) އަށެވެ. އެއް މެޗުން ބަލިވެ ދެ ވަނަ ލިބެނީ ގުޅީ ސްކޫލް އަށެވެ. ގްރޫޕް ސީގެ އެއް ވަނަ އިސްކަންދަރު ސްކޫލް އިން ހޯދިއިރު، ދެ ވަނަ ލިބެނީ ތާޖުއްދީން ސްކޫލަށެވެ. މި ގްރޫޕްގައި އޮތީ ހަ ޓީމެވެ. ގްރޫޕް ޑީ ގައި ވެސް އޮތީ ހަ ޓީމެވެ. މި ގްރޫޕްގައި ކުޅުނު ފަސް މެޗު ވެސް ކާމިޔާބުކޮށްގެން އެއް ވަނަ ހޯދީ ޣާޒީ ސްކޫލް އެވެ. ދެ ވަނަ ލިބެނީ ޅ.އަތޮޅު ތަޢުލީމީ މަރުކަޒު (ހިންނަވަރު) ށެވެ.
މި ބައިގެ ކުއާޓާ ފަައިނަލް މެޗުތައް ފެށުމަށް ހަމަޖެހިފައި ވަނީ ހުކުރު ދުވަހުގެ ހަވީރު އެވެ. ކުއާޓާ ފައިނަލްގެ ފުރަތަމަ މެޗުގައި ޖަމާލުއްދީން ސްކޫލް ނުކުންނާނީ ތާޖުއްދީން ސްކޫލާ ދެކޮޅަށެވެ. ދެ ވަނަ މެޗުގައި ރަސްދޫ އިން ނިކުންނާނީ ހިންނަވަރާ ދެކޮޅަށެވެ. ތިން ވަނަ މެޗުގައި އެރޭ އިސްކަންދަރު ނިކުންނާނީ ހުރާ ސްކޫލާ ދެކޮޅަށެވެ. މި ބައިގެ ކުއާޓާ ފައިނަލްގެ ފަހު މެޗުގައި ޣާޒީ ސްކޫލް ނިކުންނާނީ ގުޅީ ސްކޫލާ ދެކޮޅަށެވެ.
މި ބައިގެ ސެމީ ފައިނަލް މެޗުތައް ފެށުމަށް ހަމަޖެހިފައި ވަނީ އާދިއްތަ ދުވަހު އެވެ.
