ކްރިމިނަލް ކޯޓު ހިންގަމުންދާ އިމާރާތް ބަދަލުކުރުމަށް އަންގައިފި

ކްރިމިނަލް ކޯޓް ހިންގަމުންދާ އިމާރާތަކީ ބޭނުންކުރުމަށް އެއްވެސް މިންވަރަކަށް ރައްކާތެރިކަމެއް ނޫންކަމަށް ކަމާބެހޭ ފަންނީ މާހިރުން އިރުޝާދު ދެއްވާފައިވާތީ ކްރިމިނިލް ކޯޓު ވަގުތީ ގޮތުން އެހެން އިމާރާތަކަށް ބަދަލުކުރުމަށް ޖުޑީޝަލް ސަރވިސް ކޮމިޝަން (ޖޭއެސްސީ)ން ނިންމައިފިއެވެ.

އެކަމާއި ގުޅިގެން ޖޭއެސްސީން ނެރުނު ބަޔާނެއްގައި ބުނެފައިވަނީ ކްރިމިނަލް ކޯޓު ހިންގަމުންދާ ހަތަރު ބުރީގެ އިމާރާތް ވަރަށް ބޮޑަށް ބައުވެފައިވާ ތަނަކަށްވެ ވަރަށް ބޮޑަށް އެއިމާރާތް ހަލާކުވެފައިވާތީ ކަމާބެހޭ މާހިރުން ލައްވާ ބުދަ ދުވަހު ވަނީ އިންސްޕެކްޝަނެއް ހަދާފައިކަމަށެވެ. ހެދި އިންސްޕެކްޝަނަށްފަހު، އެއިމާރާތް އިތުރަށް ބޭނުންކުރުމަކީ އެއްވެސް މިންވަރަކަށް ރައްކާތެރި ކަމެއް ނޫންކަމަށް ކަމާބެހޭ ފަންނީ މާހިރުން ވަނީ އިރުޝާދު ދެއްވާފައިކަމަށް ޖޭއެސްސީން ބުނެއެވެ.

އެހެންކަމުން، ކްރިމިނަލް ކޯޓް ވަގުތީ ގޮތުން އެހެން އިމާރާތަކަށް ބަދަލުކުރުމަށް ކުރަން ޖެހޭ މަސައްކަތްތައް ނިމެންދެން ކޯޓުގެ މުވައްޒަފުންނާއި ހިދުމަތް ހޯދާ އެންމެހައި ފަރާތްތަކުގެ ސަލާމަތަށްޓަކައި، ތިރީގައިވާ ގޮތުގެ މަތިން އަމަލުކުރުމަށް ކޮމިޝަނުން ވަނީ ނިންމާފައެވެ. އެގޮތުން ނިންމާފައިވަނީ:

ކްރިމިނަލް ކޯޓަކީ ގާތްގަނޑަކަށް 100 އެއްހައި މުވައްޒަފުންނާއި ކޯޓުގެ ގާޒީން އެކުގައި މަސައްކަތް ކުރައްވާ ތަނެކެވެ. އެގޮތުން މީގެ ކުރިން ޕްލޭނިންގ މިނިސްޓްރީންވެސް ކޯޓުގެ އެސެސްމަންޓެއް ހަދާފައިވާއިރު، ވީހާވެސް އަވަހަށް އެތަން ހުސްކުރަން ޖެހޭކަމަށް މިނިސްޓްރީންވެސް ބުނެފައިވެއެވެ.

ކޯޓު އިމާރަތް ބާވުމާއި، އިމާރާތުގެ ޝަރީއަތްކުރާ މާލަންތަކުގެ ފާރުތަކުގައި ބޮޑެތި ރެނދުތައް ލާފައިހުރުމާއި ގުޅިގެން ބައެއް މަރާމާތުތައްވެސް ވަނީ ކުރަން ޖެހިފައެވެ.

ކްރިމިނަލް ކޯޓުގެ 4 ބުރީގެ އިމާރަތް ބާވެ އަރިއަޅާލާފައިވާތީ ބޭރުން ހުންނަނީ ދަގަނޑުތައް ވިއްދާފައެވެ. ސިޑިގޮޅިތަކަށް ފެން ފޭބުމާއި، ޝީޓުތައް ބާވުމުގެ ސަބަބުން ބޮޑެތި ބާގަނޑުތައް ހެދިފައިވާއިރު، މޫސުން ގޯސް ދުވަސްވަރެއް ނަމަ، ގާޒީން ތިއްބަވާ ކޮޓަރިކޮޅުތަކަށްވެސް ވާރޭ ވެހޭކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ. އެގޮތުން ބައެއް ގާޒީން ތިއްބަވާ ކޮޓަރިކޮޅުތަކުގެ ސީލިންގާއި ޝީޓުތައް ޙަލާކުވެފައި ހުރުމުގެ ސަބަބުން މޫސުން ގޯސް ދުވަސްވަރެއްނަމަ އެތަނުގައި ޝަރީއަތްތައް ކުރިއަށް ގެންދެވޭނެ ގޮތެއް ނޯވެއެވެ.

މީގެއިތުރުން، ކޯޓުގެ ބައެއް ފާޚާނާތަކުގެ ސީލިންގތައް ނެއްޓިފައިވުމާއި، ސީލިންގ ގެ ބެރިތައް ހަލާކުވެފައި ހުރުމުގެ ސަބަބުން ފާޚާނާތައްވެސް ބޭނުން ނުކުރެވޭ ޙާލަތަށް ދާން ކައިރިވެފަވެއެވެ. މިމަހުގެ ތެރޭގައިވެސް ކްރިމިނަލް ކޯޓުގެ އެތެރޭގައި ހުރި ތަނބެއް ވަނީ ވެއްޓިފައެވެ.

 ކޯޓަށް ދިމާވެފައިވާ އިމާރާތުގެ ދަތިކަމުގެ މައްސަލައަކީ ގިނަ ދުވަސްތަކެއް ވަންދެން ޙައްލުނުވެ ދިގުލަމުންދާ މައްސަލައެކެވެ.