ޖުމްހޫރީ ޕާޓީގެ ހަތަރު ވަނަ ގައުމީ ކޮންފަރެންސް ފެބްރުއަރީ 24ން 25ށް އޮންނާނެކަމަށް އެޕާޓީން ބުނެފިއެވެ.

ދަރުބާރުގޭގައި ކުރިޔަށްގެންދިޔުމަށް ހަމަޖެހިފައިވާ ގައުމީ ކޮންފަރެންސްގައި ނިންމާ މުހިންމު ނިންމުންތަކުގެ ތެރޭގައި ޖޭޕީގެ އަސާސީ ގަވާއިދުގެ ދަށުން ކޮންފަރެންސުން އިންތިޚާބުކުރަންޖެހޭ މެންބަރުން އިންތިޚާބުކުރުމާއި ކުރިޔަށް އޮތް ރިޔާސީ އިންތިޚާބާމެދު ގޮތެއް ނިންމުން ހިމެނެއެވެ.

އައު ދައުރަކަށް ފަސް ޑެޕިއުޓީ ލީޑަރުންނާއި ކައުންސިލަށް 25 މެންބަރުން ހޮވާނެއެވެ. އެޕާޓީގެ ޑެޕިޔުޓީ ފަސް ލީޑަރުންގެ މަގާމަށް 12 ބޭފުޅަކު ކުރިމަތިލައްވާފައިވެއެވެ. އަދި ކައުންސިލުގެ 25 މަގާމަށް 65 މެންބަރަކު ކުރިމަތިލެއްވިއެވެ. ޖުމްހޫރީ ޕާޓީގެ ލީޑަރުގެ މަގާމަށް ވާދަކުރައްވަނީ ލީޑަރުގެ މަގާމުގައި މިހާރުވެސް ހުންނެވި ގާސިމް އިބްރާހީމެވެ. ނަމަވެސް އެ މަގާމަށް އެ މަނިކުފާނު އިންތިހާބު ވާނީ ޕާޓީގެ އަސާސީ ގަވާއިދަށް ހުށަހަޅައިފައިވާ އިސްލާހުތައް ފާސްވުމުން ކަމަށް އެ ޕާޓީގެ ސެކެޓްރީ ޖެނެރަލް، އަލީ އާރިފް ވަނީ "ރާއްޖެއެމްވީ" އަށް މައުލޫމާތު ދެއްވަމުންވިދާޅުވެފައެވެ.

ކޮންފަރެންސް ފެށުމަށްފަހު އެންމެ ފުރަތަމަ ކުރާ ކަމެއްގެ ގޮތުގައި އެޖެންޑާކޮށްފައިވަނީ އަސާސީ ގަވާއިދަށް ގެންނަން ޖޭޕީގެ ކައުންސިލުން އެންޑޯޒްކޮށްފައިވާ އިސްލާހުތަކާމެދު ގޮތެއް ނިންމުމެވެ.

ކުރިޔަށް އޮތް ރިޔާސީ އިންތިޚާބާމެދު ޖޭޕީން ގޮތެއް ނިންމުން އޮތީ ހޮނިހިރު ދުވަހުއެވެ. އެދުވަހު މެންދުރު ކުރިޔަށްދާ ދަންފަޅިއަށް ރިޔާސީ އިންތިޚާބާމެދު ޖުމްހޫރީ ޕާޓީން ގޮތެއް ނިންމުމާއި ބެހޭ ގޮތުން އަބްދުﷲ އަހުމަދު ހުށަހަޅުއްވާ ގަރާރަށް ބަހުސްކޮށް ވޯޓަށް އަހާނެއެވެ.

ކުރިޔަށް އޮތް ރިޔާސީ އިންތިޚާބާއި ގުޅިގެން އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހުގެ ފަރާތުންނާއި ރައީސް މުހައްމަދު ނަޝީދުގެ ފިކުރެއްގެ ދިރުން ޓީމުގެ މަންދޫބުން ވަނީ ޖޭޕީގެ ލީޑަރު ގާސިމް އިބްރާހީމާއި ބައްދަލުކޮށްފައެވެ. ޖޭޕީއަކީ މިސަރުކާރުގެ ގުޅިފައިވާ ކޯލިޝަންގެ ޕާޓީއެއްވެސްމެއެވެ.

ޖޭޕީގެ ޤައުމީ ކޮންގްރެސްގައި 900ށްވުރެ ގިނަ މީހުން ބައިވެރިވާނެކަމަށްވެސް އެޕާޓީން ބުނެއެވެ.