130 ކިލޯ ޑްރަގް ކޭސް: ހެކިން ހާޒިރު ނުކުރެވިގެން ކުރިއަށް ނުގެންދެވުނު
22 ފެބުރުއަރީ 2023 | ބުދަ 09:39އެ އެންމެންވެސް ވަނީ ދައުވާތަކަށް އިންކާރު ކޮށްފައި
ކަނޑުމަގުން ރާއްޖެއަށް އެތެރެކުރި 130 ކިލޯގެ މަސްތުވާތަކެތީގެ މައްސަލައިގައި އިސްކޮށް އުޅުނުކަމުގެ ތުހުމަތުވާ ޝަހީބު އިބްރާހިމް
130 ކިލޯގެ މަސްތުވާތަކެތީގެ މައްސަލައިގައި ދައުލަތުން އުފުލާފައިވާ ދައުވާތަކުގެ ޝަރީއަތުގެ އަޑުއެހުން ކެންސަލްވެއްޖެއެވެ.
މި މައްސަލައިގައި އިސްކޮށް އުޅުނުކަމުގެ ތުހުމަތުކޮށް، އެކަމާއި ގުޅޭ ދައުވާ އުފުލާފައިވަނީ ގއ. ވިލިނގިލި، ލައިޓްހައުސް، ޝަހީބް އިބްރާހިމްއާއި، ހއ. ހޯރަފުށި، ވައިލެޓްވިލާ އަހުމަދު މޫސާގެ މައްޗަށެވެ.
އޭގެ އިތުރުން، އަސީލް މާހިރު، އަނަސް ހުސައިން އަދި ބަންގްލަދޭޝްގެ ރައްޔިތުންތަކެއްކަމަށްވާ އިޤްބާލްއާއި މުހައްމަދު ރިޔާދުގެ މައްޗަށްވެސް މި މައްސަލައިގައި ދައުވާތައް އުފުލާފައިވެއެވެ.
ކްރިމިނަލް ކޯޓުގައި މި މައްސަލަ ބައްލަވަނީ އެކޯޓުގެ އިސްގާޒީ އަހުމަދު ޝަކީލެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 25 ޖެނުއަރީ 2023 ގައެވެ. އެ ދުވަހުގެ އަޑުއެހުމުގައި އެންމެ ފުރަތަމަ ދައުލަތުން ވަނީ ދައުވާލިބޭ ފަރާތްތަކާ ގުޅިގެން ވަކިވަކިން އިފްތިތާޙީ ބަޔާން އިއްވާފައެވެ. މި މައްސަލައިގައި ޖުމުލަ ގޮތެއްގައި ދައުލަތުން ހުށަހަޅާފައިވަނީ އެއް ހެކިތަކެކެވެ.
އެ ހަ މީހުންގެ މައްޗަށް ޕްރޮސެކިއުޓާ ޖެނެރަލް (ޕީޖީ) އޮފީހުން ތިން ދައުވާއެއް އުފުލާފައިވެއެވެ. އެއީ މަސްތުވާތަކެތީގެ ގާނޫނުގެ ޖަދުވަލު 1 ގައިވާ މަސްތުވާއެއްޗެއް ރާއްޖެ އެތެެރެކުރުމުގެ ކުށުގެ ދައުވާއަކާއި ޖަދުވަލް 1 ގައިވާ މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާއަކާއި އަދި ޑައިމޯފިން ޓްރެފިކްކުރުމުގެ ކުށުގެ ދައުވާއެއް ހިމެނެއެވެ.
އެއަށްފަހު ދައުވާލިބޭ ފަރާތްތަކުންވެސް އިފްތިތާޙީ ބަޔާން އިއްވާފައިވާއިރު، އެ އެންމެންވެސް ވަނީ ދައުވާތަކަށް އިންކާރު ކޮށްފައެވެ.
މި މައްސަލައިގައި ބުދަ ދުވަހު ތާވަލު ކުރެވިފައި އޮތީ ހެކިބަސް ނެގުމުގެ އަޑުއެހުމެކެވެ. އެހެންނަމަވެސް، ހެކިން ހާޒިރު ނުކުރެވިގެން މި އަޑުއެހުން ކުރިއަށް ގެންދެވިފައެއް ނުވެއެވެ.
