ލަންޑަންގެ ޕްރައިވެޓް ސްކޫލެއްގައި ދަރިވަރުންނަށް ހުސް "އޭ" ގްރޭޑް ދީފައިވާ މައްސަލައެއް ބަލަނީ

މުއްސަނދިންގެ ދަރިން ގިނައިން ދާ ލަންޑަންގެ ޚާއްސަ ޕްރައިވެޓް ސްކޫލަކުން 2021 ވަނަ އަހަރު އޭލެވެލް ހެދި ހުރިހާ ކުދިންނަށް އޭ-ސްޓާރ ނުވަތަ އޭ ގްރޭޑް ދީފައިވާތީ، އެކަން ހިނގި ގޮތެއް ބަލަމުން ދާކަމަށް ޚަބަރު ލިބެއެވެ. ޕެންޑަމިކާ ގުޅިގެން އެ އަހަރުގެ ރަސްމީ ހުރިހާ އިމްތިހާނެއް ވަނީ އިނގިރޭސި ސަރުކާރުން ކެންސަލްކޮށްފައެވެ. އެހެންކަމުން ކުދިންގެ ފެންވަރު ބަލާފައިވަނީ ޓީޗަރުން ކުދިންގެ ފެންވަރު ވަކިވަކިން އެސެސްކޮށްގެންނެވެ.

ނޯތު ލަންޑަން ކޮލޭޖިއޭޓް ސްކޫލް (އެންއެލްސީއެސް) އަކީ އަންހެންކުދިންނަށް ޚާއްސަ، އަގުބޮޑު ސްކޫލެކެވެ. މިގޮތުން އެސްކޫލުން ކިޔެވުމަށް ކުއްޖަކު އަހަރަކު 22،000 ޕައުންޑް ދައްކަންޖެހެއެވެ.

2021 ވަނަ އަހަރުގެ އޭލެވެލް އިމްތިހާނުގައި ކުދިންގެ ފެންވަރު އެސެސްކޮށް ގްރޭޑް ދެވިފައިވަނީ އުސޫލްތަކާ ޚިލާފަށް ކަމަށް ބުނެ ކުރެވުނު ރިޕޯޓްތަކާ ގުޅިގެން، ސްކޫލްގެ އެތައް އޮފިޝަލުންނާއި ޓީޗަރުންނާ ދަނީ ސުވާލުކުރަމުންނެވެ.

"ދަ ގާޑިއަން"އިން ރިޕޯޓްކޮށްފައިވާގޮތުގައި، ވިއްސަށްވުރެ ގިނަ މައްސަލަ ވަނީ އެގްޒެމިނޭޝަން ބޯޑަށް ހުށަހަޅާފައެވެ. އަދި ކޮމިޓީން ވަނީ ސިއްރު އަޑުއެހުންތަކެއް ބާއްވާފައެވެ. މެލް ޕްރެކްޓިސް ނުވަތަ އުސޫލުން ބޭރުން ކަންކަން ކުރާކަމަށް ރިޕޯޓެއް ލިބިއްޖެނަމަ ވަރަށް ސީރިއަސްކޮށް މައްސަލަ ބަލާނެކަމަށް އެގްޒެމިނޭޝަން ބޯޑުން ބުނެފައިވެއެވެ. ނަމަވެސް ބަލަމުން ދަނީ ނޯތު ލަންޑަން ކޮލޭޖިއޭޓް ސްކޫލްގެ ކިތައް ކުދިންގެ މައްސަލަ ކަމެއް އޮފިޝަލުން ހާމައެއްނުކުރެއެވެ.