ޗައިނާގައި ހުރި އެންމެ "ލޯބި" ޓީޗަރަށް ދަރިވަރުން ކިޔަނީ ބައްޕަ، ސަބަބެއް ނެތިއެއްވެސް ނޫން!
ދަރިވަރުންނާ އެހާ ގާތް ގުޅުމެއް ބަދަހި ކުރެވުމުގެ އެންމެ ބޮޑު އެއް ސިއްރަކީ، ކޮންމެ ދުވަހަކުވެސް އެ ދަރިވަރުންނާ ބައްދަލުކޮށް، ސްކޫލަށް މަރުޙަބާ ކިއާ ކިއުން
ގުއާންއަކީ، އޭނާއާ އެކުގައި މަސައްކަތް ކުރާ އެހެން ޓީޗަރުންގެ ތަކުލީފުތަކަށް ތަސައްލީ ހޯދާ ދިނުމުގައިވެސް ނަމޫނާ ބައިވެރިއެއް
ޗައިނާގެ ޝެންޑޮންގް ޕްރޮވިންސްގެ އިރުމަތީ ސިޓީއެއް ކަމަށް ގިންގްޑާއޯގެ ކިންޑަގަރޓެންއަށް ކިޔަވާދޭ ގުއާން ޔަންވޭއަކީ މި ހިނގާ 2022 ވަނަ އަހަރު ޗައިނާގައި ހުރި އެންމެ ކާމިޔާބު ޓީޗަރެވެ. ގުއާން ވަނީ ޗައިނާގައި ޓީޗަރުންގެ ދުވަހާ ގުޅުވައިގެން ހޮވާ "މޯސްޓް ބިއުޓިފުލް ޓީޗަރ" ލަޤަބުގެ މިއަހަރުގެ ޓައިޓަލް ކަށަވަރު ކޮށްފައެވެ.
2002 ވަނަ އަހަރު ގުއާން ދަސްވެނިވީ އާދައިގެ ސްކޫލަކުންނެވެ. ޕްރައިމަރީ ޓީޗަރެއްގެގޮތުގައި 6 އަހަރު ދުވަހު ޚިދުމަތް ކުރުމަށްފަހު ޖިމިޔާ ސެންޓްރަލް ކިންޑަގަރޓެންއަށް އޭނާ ބަދަލު ކުރިއެވެ. އެއީ ގިންގްޑާއޯ ސަރަހައްދުގައި ހިންގާ އެފަދަ އެންމެ ކުޑަ ސްކޫލެވެ.
ގުއާން އަކީ އެ ސްކޫލާ ގުޅުނު އެފަދަ ފުރަތަމަ ފިރިހެން ޓީޗަރެވެ. ކިންޑަގަރޓެން ނުވަތަ އެލްކޭޖީ-ޔޫކޭޖީ ދަރިވަރުންނަށް ތައުލީމު ދިނުމުގެ މައިދާނުގައި މުޅިންހެންވެސް ފެންނަނީ އަންހެން ޓީޗަރުން ކަމާ މެދު ދެބަސްވާނެ މީހަކު މަދުވާނެއެވެ. އެފަދަ ބޮޑު ޗެލެންޖަކާ ގުއާން ކުރިމަތިލީ ވަރުގަދަ ޢަޒުމަކާވެސް އެކުގައެވެ. ގުއާން ވަނީ އަރލީ ޗައިލްޑްހުޑް އެޑިއުކޭޝަންގެ ރޮނގުން ގިނަ މައުލޫމާތުތަކެއް އެއްކޮށްފައެވެ. އަދި ބަފައެއްގެ ހައިސިއްޔަތުން އޭނާއަށް ލިބިފައިވާ ތަޖުރިބާތަކުގެ ބޭނުން، ކުލާސް ދަރިވަރުން ގެންގުޅުމުގައިވެސް ގުއާން ހިފައެވެ.
މިއަދު އެ ސްކޫލްގެ ދަރިވަރުން ގުއާންއާ މުޚާޠަބު ކުރަނީ "ޕްރިންސިޕަލް ބައްޕަ"ގެ ނަމުންނެވެ. ގުއާން ބުނި ގޮތުގައި، އޭނާގެ ދަރިވަރުންނާ އެހާ ގާތް ގުޅުމެއް ބަދަހި ކުރެވުމުގެ ފަހަތުގައި އޮތް އެންމެ ބޮޑު އެއް ސިއްރަކީ، ކޮންމެ ދުވަހަކުވެސް އެ ދަރިވަރުންނާ ބައްދަލުކޮށް، ސްކޫލަށް މަރުޙަބާ ކިއާ ކިއުން ކަމަށެވެ.
ގުއާންއަކީ ތަޢުލީމީ މައިދާނަކީ ރައްކާތެރި އަދި ސަލާމަތްތެރިކަން ކަށަވަރު ކުރެވޭ މާޙައުލަކަށް ހެދުމަށްވެސް ހާއްސަ ސަމާލުކަމެއް ދޭ ޓީޗަރެކެވެ. އެކަން ކަށަވަރު ކުރުމަށް އޭނާ ވަނީ ރައްކާތެރި އަދި ސަލާމަތްތެރި ވެއްޓެއްގައި އިލްމު ފޯރުކޮށްދިނުމާ ބެހޭ ތަމްރީނު ސެޝަންތަކުގައި ބައިވެރިވެފައެވެ. އަދި އެ ސެޝަންތަކުން އޭނާއަށް ދަސްވި އެއްޗެއް، އެހެން ޓީޗަރުންނަށް ބުނެދެއެވެ. އޭގެ އިތުރުން، ބިންހެލުންތަކާއި އަލިފާނުގެ ހާދިޘާތަކުގައި ކަން ކުރާނެ ގޮތް ދަސްކޮށްދިނުމަށް، އެކި ކަހަލަ ކުޅިވަރުތައް އިންތިޒާމް ކުރުމުގައި ގުއާންގެ މަސައްކަތަށް ތަޢުރީފު ޙައްޤެވެ.
ސްކޫލްގެ ލޮޖިސްޓިކްސް ކަންކަން ބެލެހެއްޓުމުގެ އެންމެ ކުރީގައިވެސް ހުރީ ގުއާންއެވެ. މަސައްކަތަށް އޮންނަ ހާއްސަ ލޯތްބެއްގެ ސަބަބުން، ގުއާންއަކީ، އޭނާއާ އެކުގައި މަސައްކަތް ކުރާ އެހެން ޓީޗަރުންގެ ތަކުލީފުތަކަށް ތަސައްލީ ހޯދާ ދިނުމުގައިވެސް ނަމޫނާ ބައިވެރިއެކެވެ.
މި ހުރިހާ ޚިދުމަތަކާއެކު ގުއާން މި އަހަރު ކަށަވަރު ކުރި، އަހަރުގެ އެންމެ "ލޯބި" ޓީޗަރުގެ އެވޯޑަކީ، ޗައިނާގެ ވެރިކަން ކުރާ ކޮމިއުނިސްޓް ޕާޓީ (ސީޕީސީ)ގެ މަރުކަޒީ ކޮމިޓީގެ ޕަބްލިސިޓީ ޑިޕަރޓްމަންޓްއާއި އެ ޤައުމުގެ ތައުލީމާ ބެހޭ ވުޒާރާއިން ދޭ އެވޯޑެކެވެ.
