ފީފާ އަށް ރެކޯޑް އާމްދަނީއެއް

ދުނިޔޭގެ ފުޓްބޯޅަ ޖަމިއްޔާ ފީފާގެ އާމްދަނީ ރެކޯޑް މިންވަރެއް ކަމަށްވާ 7.6 ބިލިއަން ޑޮލަރަށް އަރައިފި އެވެ.

2019އިން 2022 އަށް ފީފާއިން އަންދާޒާކުރި އާމްދަނީ އަށްވުރެ އިތުރަށް ފައިދާވެފައިވާއިރު އެ ޖަމާއަތުން ލަފާކުރަނީ މި އަހަރުން ފެށިގެން ކުރިއަށް އޮތް ހަތަރު އަހަރު ތެރޭގައި 11 ބިލިއަން ޑޮލަރުގެ އާމްދަނީ އެއް ލިބޭނެ ކަމަށެވެ.

ފީފާގެ ރައީސް ޖިއާނީ އިންފަންޓީނޯ ވިދާޅުވީ އެ ޖަމާއަތުގެ އާމްދަނީ އިތުރުވަމުންދާ މައިގަނޑު ސަބަބަކީ މާލީ ކަންކަމުގައި ގެންގުޅޭ ދެފުށްފެންނަ އުސޫލުތަކާއި ފީފާއިން ގެންގުޅޭ ހަރުދަނާ ސިޔާސަތުތައް ކަމަށެވެ.

އޭނާ ވިދާޅުވީ ކުރިމަގުގައި ކަންކަން ބައްޓަންކުރާނީ ފީފާގެ އަށް މާލީ ފައިދާ ވެސް އިތުރަށް ލިބޭނެ ގޮތްތަކަކަށް ކަމަށާއި ފީފާ ކުލަބު ވޯލްޑްކަޕުގެ އޮނިގަނޑަށް ގެނެވުނު ބަދަލަކީ ވެސް އޭގެ ފައިދާ ފެނިގެންދާނެ ކަމެއް ކަމަށެވެ.

ކުލަބު ވޯލްޑްކަޕް މިހާރު ބާއްވަން ނިންމާފައިވަނީ ބައްރުތަކުގެ ޓީމުތައް ކުޅޭގޮތަށް ފީފާ ވޯލްޑްކަޕުގެ ފޯމެޓަށެވެ.

ފީފާ އަށް ލިބޭ އާމްދަނީ މެންބަރު ގައުމުތަކަށާއި މުބާރާތްތަކަށާއި ޔޫތު ޑިވޮލޮޕްމަންޓް އަދި އަންހެނުންނާއި ކުޑަކުދިންގެ އިތުރުން އިޖްތިމާއީ ރައްކާތެރިކަމަށް ހޭދަކުރެ އެވެ. އަދި އެ ޖަމާއަތުންދޭ އެހީއާއެކު އިޖްތިމާއީ ތަފާތު ކެމްޕޭންތައް ހިންގުމަށް ފީފާއިން ދަނީ މެންބަރު ގައުމުތަކަށް ބާރުއަޅަމުންނެވެ. މީގެ އިތުރުން މެންބަރު ގައުމުތަކުގެ ފެޑަރޭޝަންތަކާއި ކުލަބުތަކުގެ ހިންގުން ހަރުދަނާކުރުމަށް މޮނިޓަރިން މެކޭނިޒަމެއް ތައާރަފްކޮށް އަހަރުން އަހަރަށްދަނީ ކަންކަން ހަރުދަނާކުރުމަށް ބާރުއަޅަމުންނެވެ.