ތުރުކީ އާއި ސީރިއާ އަށް އައި ބިންހެލުމުގައި ލިބުނު ގެއްލުންތަކުގެ ސަބަބުން އިންސާނީ އެހީތެރިކަން ފޯރުކޮށްދިނުމުގެ ގޮތުން ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އެ ދެ ޤައުމަށް އެހީވުމަށް ނިންމައިފި އެވެ.
ފެބްރުވަރީ މަހުގެ ކުރީ ކޮޅު އައި ބިންހެލުމުގެ ސަބަބުން އެތައް އިމާރާތްތަކަކަށް ގެއްލުންވެފައިވާއިރު، އެތައް ހާސް ބަޔަކު ވަނީ މަރުވެފަ އެވެ. އޭގެ ތެރޭގައި ގާނާގެ ޤައުމީ ޓީމަށް ކުރިން ކުޅުނު ކްރިސްޓިއަން އަޓްސޫ ވެސް ހިމެނެ އެވެ. އެކަމުގެ ސަބަބުން ތުރުކީގެ ފުޓުބޯޅަ ފެޑެރޭޝަނުން ވަނީ އެ ޤައުމުގެ ފުޓުބޯޅަ ލީގު ވެސް މެދު ކަނޑާލުމަށް ނިންމައިފަ އެވެ.
އެކަމަށް އެހީތެރިވުމުގެ ގޮތުން ފީފާ އިން ވަނީ އެއް މިލިއަން އެމެރިކާ ޑޮލަރުގެ އެހީތެރިކަން ފޯރުކޮށްދިނުމަށް ނިންމާފައި ކަމަށް ބޭރުގެ މީޑިއާތަކުގައި ވަނީ ރިޕޯޓުކޮށްފަ އެވެ. އެގޮތުން އެ އިދާރާ އިން އެހީތެރިކަން ފޯރުކޮށްދެނީ ބިންހެލުމުގެ ސަބަބުން ހާލުގައި ޖެހުނު މީހުންނަށް ބޯހިޔާ ވަހިކަން ފޯރުކޮށްދިނުމާއި، އިންސާނީ އެހީތެރިކަން ފޯރުކޮށްދިނުމަށް ކަމަށް ވެސް ރިޕޯޓުކޮށްފައިވެ އެވެ. އެހީތެރިކަން ފޯރުކޮށްދިނުމުގެ މަޝްވަރާތައް ފީފާ އިން ވަނީ އެ ދެ ޤައުމުގެ އިސްވެރިންނާއި، އަދި ފުޓުބޯޅަ އިދާރާތަކުގެ އިސްވެރިންނާ ކޮށްފައި ކަމަށް ވެސް ރިޕޯޓުތައް ބުނެ އެވެ.
ތުރުކީ އާއި ސީރިއާ އަށް އައި ބިންހެލުމުގެ ސަބަބުން ފުޓުބޯޅައިގައި ހަރަކާތްތެރިވާ އެކި ފަރާތްތަކުން އަންނަނީ ހިތާމަ ފާޅުކޮށް، އެ ދެ ޤައުމަށް އެހީތެރިކަން ވެސް ފޯރުކޮށްދެމުންނެވެ. މީގެއިތުރުން ޔުއެފާ ޗެމްޕިއަންސް ލީގާއި، އެހެނިހެން ލީގު މެޗުތައް ފެށުމުގެ ކުރިން ހިމޭންކަމުގެ ސުކޫތު ކޮޅުތައް ވެސް އަންނަނީ ގެންނަމުންނެވެ.
