22 ވަނަ އޭޝިއަން ޗެމްޕިއަންޝިޕްގައި ވާދަކުރާ ރާއްޖޭގެ ގައުމީ އެތްލެޓިކްސް ޓީމަށް އިންޑިއާ ސަރުކާރުން އެހީވާން ނިންމައިފިއެވެ.

އިންޑީއާ ސަރުކާރުގެ ފަރާތުން ރާއްޖޭގެ ޓީމަށް އެހީތެރިކަން ފޯރުކޮށްދިނުމަށް ނިންމާފައި ވާކަން އިއުލާން ކޮށްފައިވަނީ، އާދިއްތަ ދުވަހުގެ ރޭ ރާއްޖޭގެ އެތްލެޓިކްސް ޓީމާއި، ރައްޖެއަށް އިންޑިއާއިން ކަނޑައަޅުއްވާފައި ހުންނަވާ ސަފީރު އަލިކޭޝް މިޝްރާ އާއި އެކު ބޭއްވި ހާއްސަ ބައްދަލުވުމެއްގައެވެ.

މި ބައްދަލުވުމުގައި އިންޑިއާގެ ސަފީރު ވަނީ، މުބާރާތުގެ ކުރިން ރާއްޖޭގެ ޓީމަށް އިންޑިއާގެ ބެންގަލޫރުގައި ހާއްސަ ފަރިތަކުރުންތަކެއް ކުރުމުގެ ފުރުސަތު ދެއްވާފައެވެ. އެގޮތުން މި ހާއްސަ ތަމްރީން ތަށް ފުރިހަމަ ކުރުމަށް އަންނަ ބުރާސްފަތި ދުވަހު ޓީމު އިންޑިއާއަށް ފުރުމަށް ވަނީ ހަމަޖެހިފައެވެ.

މިފަހަރުގެ އޭޝިއަން ޗެމްޕިއަންޝިޕް އޮތީ ޖުލައި މަހުގެ 6 އިން 9 އަށް އިންޑިއާގެ ބުބްނެސްވަރު ގައެވެ. އެހަންކަމުން ތީމް އެނބުރި މާލެ އަންނާނީ މުބާރާތަށް ފަހުގައެވެ.

މިފަހަރުގެ މުބާރާތުގައި 10 އެތްލީޓަކު ރާއްޖެ ތަމްސީލް ކުރާނެއެވެ. އެއީ ފިރިހެން 7 އެތްލީޓުންނާއި އަންހެން 3 އެތްލީޓުންނެވެ.