ސަޕޯޓަރުންގެ އެހީއާ އެކު ކިރިގިސްތާން ބަލި ކުރެވޭނެ: ސާޖިދު

އަމިއްލަ ފަސްގަނޑުގައި މުބާރާތެއް ކުޅެން ލިބުމަކީ ހުރިހާ ގޮތަކުން ވެސް ފައިދާތަކެއް ޓީމަށް ކުރާނެ ކަމެއް ކަމަށާއި އެހެން ކަމުން ސަޕޯޓަރުންގެ އެހީއާ އެކު މުބާރާތުގެ ފުރަތަމަ މެޗުގައި ވާދަކުރާ ކިރިގިސްތާން ޓީމު ބަލިކުރެވޭނެ ކަމަށް ގައުމީ ވޮލީ ޓީމުގެ އެސިސްޓެންޓް ކޯޗު މުހައްމަދު ސާޖިދު (ކާއްޓޭ) ބުނެފި އެވެ.

ބުދަ ދުވަހު ހަވީރު ޒުވާނުންގެ މަރުކަޒު އެތެރޭ ކޯޓުގައި ފެށުމަށް ހަމަޖެހިފައިވާ އޭޝިއަން މެންސް ސެންޓްރަލް ޒޯން ވޮލީބޯލް ޗެމްޕިއަންޝިޕްގެ ފުރަތަމަ މެޗުގައި ކިރިގިސްތާނާ ދެކޮޅަށް ނުކުތުމުގެ ކުރިން މީޑިއާތަކަށް މައުލޫމާތު ދެމުން ސާޖިދު ބުނީ ހަތަރު ގައުމު ވާދަކުރާ މި މުބާރާތުގެ ކޮންމެ މެޗަކީ ވެސް މުހިންމު ވާނެ މެޗުތަކެއް ކަމަށެވެ.

ސާޖިދު ބުނީ ކިރިގިސްތާން ޓީމަކީ މީގެ ކުރިން ބަންގްލަދޭޝްގައި ކުރިއަށްދިޔަ މުބާރާތެއްގައި ބަލިކޮށްފައިވާ ޓީމެއް ކަމަށާއި އެހެން ކަމުން ރާއްޖޭގައި މި މުބާރާތް ކުރިއަށްދާއިރު އެޓީމު ބަލި ނުކުރެވެންވީ އެއްވެސް ސަބަބެއް ނެތް ކަމަށެވެ.

ޓީމަށް މިފަހަރު އަލަށް ގުޅުނު ކުޅުންތެރިންނަށް އަލިއަޅުވާލަމުން ސާޖިދު ބުނީ އެ ކުޅުންތެރިންނާއެކު ޓީމަށް ގިނަ ކުރިއެރުންތަކެއް ލިބިގެން ހިނގައްޖެ ކަމަށާއި އެގޮތުން މުޅި ޓީމުން ވެސް ތަފާތު ފެނިގެންދާނެ ކަމަށެވެ.

މުބާރާތުގައި ވާދަކުރާ ޓީމުތަކުގެ ކުޅުމަށް އިޝާރާތް ކުރަމުން ސާޖިދު ބުނީ އެހެން ހުރިހާ ޓީމުތަކާ އަޅާ ބަލާއިރު، ރާއްޖޭގެ ޓީމަކީ މި ސަރަހައްދުގެ އެހެން ޓީމުތަކަށް ވުރެ އެޓޭކްތައް ވަރުގަދަ ޓީމެއް ކަމަށެވެ. އަދި ކިރިގިސްތާން ޓީމަކީ ރަނގަޅު ޑިފެންސެއްކޮށް ހަލުވި ކުޅުމެއް ކުޅޭ ޓީމެއް ކަމަށް ސާޖިދު ބުންޏެވެ.

ސާޖިދު ބުނީ ކިރިގިސްތާނާ ދެކޮޅަށް ކުޅޭއިރު ރާއްޖެއިން އެންމެ ބޮޑު އިސްކަމެއްދޭނީ ރަނގަޅު ސާވިސްތަކަކާއި ރިސީވްތަކެއް ކޮށް އެޓޭކްތައް ވަރުގަދަ ކުރުމަށް ކަމަށެވެ.

ރާއްޖެއިން ވަނީ މީގެ ކުރިން މި މުބާރާތުގެ ދެވަނަ އަދި މިދިޔަ އަހަރު މުބާރާތުގެ ތިންވަނަ ހޯދާފަ އެވެ. އެހެން ކަމުން އަމިއްލަ ފަސްގަނޑުގައި މުބާރާތް ކުރިއަށްދާއިރު މިއީ ދިވެހިންގެ ފަހަރު ކަމަށް ހެދުމަށް ވޮލީ ޓީމުގެ ކުޅުންތެރިންނާއި ކޯޗިން ސްޓާފުން ތިބީ ކެތްމަދުވެފަ އެވެ.

ރާއްޖެ އާއި ކިރިގިސްތާން ބައްދަލުކުރާ މެޗު ކުޅުމަށް ހަމަޖެހިފައި ވަނީ ބުދަ ދުވަހުގެ ހަވީރު 16:00 ގައި ޒުވާނުންގެ މަރުކަޒު އެތެރޭ ކޯޓުގަ އެވެ.