ރާއްޖޭގެ އަންހެން ގައުމީ ހާފް މެރެތަން ރެކޯޑު އުމުރުން 41 އަހަރުގައި މަޝްހޫރު ކަސްރަތު އިންސްޓްރަކްޓަރު މަރިޔަމް އަބްދުލްކަރީމް (މަރީ) މުގުރާލައިފި އެވެ.

ހާފް މެރަތަން ރެކޯޑް މަރީ މުގުރާލީ އޮސްޓްރޭލިއާގެ ގޯލްޑްކޯސްޓް މެރަތަންގައި ދުވެގެންނެވެ. އޭނާ ވަނީ މި ރޭސް 1 ގަޑި 34 މިނެޓު 48 ސިކުންތުން ނިންމާފައެވެ. މި ރެކޯޑު މީގެކުރިން އޮތީ ކާމިޔާބު ދުވުންތެރިޔާ ސަމްހާ އަހުމަދު އަތުގައެވެ. އޭނާ ރެކޯޑު ހެދީ 1 ގަޑި 42 މިނެޓުން ރޭސް ނިންމައިގެންނެވެ. އެގޮތުން އޭނާ ރެކޯޑު ހެދީ 8 މިނެޓު 48 ސިކުންތުގެ ތަފާތަކުންނެވެ.

މީގެއިތުރުން މަރީ ވަނީ 10 ކިލޯ މީޓަރު ދުވުމުގެ ރެކޯޑްވެސް އާކޮށްފައެވެ. މި ރެކޯޑު މީގެކުރިންވެސް އޮތީ އޭނާ އަތުގައެވެ. ރޯޑް ރޭސްގައި އޭނާ 10 ކިލޯ މީޓަރު ރޭސް 44:18 މިނެޓުން ރޭސް ނިންމާފައިވާއިރު، އޮސްޓްރޭލިއަން ގޯލްޑްކޯސްޓް މެރަތަންގައި އޭނާ ރެކޯޑު އާކުރީ 44:07 މިނެޓުންނެވެ.

މިދިޔަ އަހަރުގެ ގައުމީ މުބާރާތުގައި 5000 މީޓަރު ދުވުމުގައި ވާދަކޮށް މަރީ ވަނީ 21 މިނެޓު 52 ސިކުންތުން ރޭސް ނިންމާފައެވެ. މިއީ އަންހެން ދުވުންތެރިޔަކު މި އިވެންޓް ނިންމި އެންމެ އަވަސް ވަގުތެވެ.

މީގެއިތުރުން މަރީ ވަނީ މިދިޔަ އަހަރުގެ ގައުމީ މުބާރާތުގައި ވާދަކޮށް ތިން ރަން މެޑަލް ހޯދާފައެވެ.