އާރްބީ ލެޕްޒިންގް އަށް ކުޅެމުން އައި ނަބީ ކެއިޓާ ލިވަޕޫލްގެ ރެކޯޑް ފީއެއްގެ ދަށުން އެ ކްލަބަށް ސޮއިކޮށްފި އެވެ.

ފަސް އަހަރު ދުވަހުގެ އެއްބަސްވުމެއްގެ ދަށުން ކެއިޓާ ލިވަޕޫލްއަށް ސޮއިކޮށްފައިވަނީ 48 މިލިއަން ޕައުންޑަށެވެ. އެގޮތުން ކެއިޓާ ވެގެންގޮސްފައިވަނީ ލިވަޕޫލް އަށް އެންމެ އަގުބޮޑުކޮށް ގެނައި ކުޅުންތެރިޔާއަށެވެ.

އުމުރުން 22 އަހަރުގެ ކެއިޓާ ލިވަޕޫލްއާ އެކު މެޑިކަލް ފުރިހަމަކޮށްފައިވާއިރު، އޭނާ އެ ކްލަބާއެކު ސޮއިކުރި އެއްބަސްވުމުގެ ދަށުން އެއްބަސްވުން "އިފެކްޓިވް" ވާނީ އަންނަ އަހަރުގެ ޖުލައި މަހުގެ އެއްވަނަ ދުވަހުއެވެ.

ލިވަޕޫލް އަށް ސޮއިކުރުމަށްފަހު ކެއިޓާ ބުނީ ކުރިޔަށް އޮތް ސީޒަނުން ފެށިގެން ނަމަވެސް ލިވަޕޫލްއަށް ބަދަލުވާން ފުރުސަތު ލިބުމުން އުފާވާ ކަމަށާއި، ލިވަޕޫލް އަށް ކާމިޔާބީ ހޯދައިދިނުމުގެ މަސައްކަތުގައި ބައިވެރިވާނެ ކަމަށެވެ.

ކެއިޓާ ބުނީ ކުރިޔަށް އޮތް ސީޒަނުގައި ލިވަޕޫލް އަށް ބަދަލުވާން ނިންމާ އެއްބަސްވުން ހެދިފައިވުމަކީ ފައިދާއެއް ކަމަށާއި، އޭގެ ސަބަބުން މިހާރުގެ ކްލަބް ލެޕްޒިންގް އަށް ކާމިޔާބު ހޯދައިދިނުމަށް އިތުރަށް ފޯކަސް ކުރެވޭނެ ކަމަށެވެ.

ލިވަޕޫލް އިން އެންމެ އަގުބޮޑުކޮށް ކުޅުންތެރިޔަކު ގެނައީ މި ސީޒަނަށެވެ. އެއީ ރޯމާ އަށް ކުޅެމުން އައި މިސްރުގެ މުހައްމަދު ސަލާހް އެވެ. އޭނާ އެ ކްލަބުން ގެނައީ 36.9 މިލިއަން ޕައުންޑަށެވެ.

ލިވަޕޫލް އިން އަންނަނީ މޮނާކޯގެ ތޯމަސް ލެމާ ހޯދުމަށްވެސް މަސައްކަތްކުރަމުންނެވެ. އެގޮތުން އޭނާ ހޯދުމަށް އެ ކްލަބުން 70 މިލިއަން ޕައުންޑަށްވުރެ އަގުހުރި ހުށަހެޅުމެއް ތައްޔާރުކުރަމުން އަންނަ ކަމަށްވެސް ރިޕޯޓްތައް ބުނެއެވެ.