މޮނާކޯ އަށް ކުޅެމުން އަންނަ ފްރާންސްގެ ސްޓްރައިކަރު ކީލިއަން އެމްބަޕޭ ހޯދުމަށް ޕެރިސް ސެއިންޓް ޖާމަން (ޕީއެސްޖީ) އިން ރެކޯޑު ފީއެއް ހުށަހަޅައިފި ކަމަށް ރިޕޯޓްތައް ބުނެފި އެވެ.

މަޝްހޫރު ކުޅިވަރު ނޫހެއް ކަމަށްވާ ގޯލްޑޮޓްކޮމް އިން ބުނީ އެމްބަޕޭ ހޯދުމަށް ޕީއެސްޖީން 135 މިލިއަން ޔޫރޯއަށްވުރެ އަގުހުރި ބިޑެއް ހުށަހަޅާފައިވާ ކަމަށާއި، އެގޮތުން ޕީއެސްޖީގެ ސްޕޯޓިން ޑިރެކްޓަރު އެންޓެރޯ ހެންރިކް ދެފަހަރެއްގެ މަތިން އެމްބަޕޭގެ ބައްޕައާ ބައްދަލުކޮށް ޓްރާންސްފާއާ ބެހޭގޮތުން ވާހަކަ ދައްކާފައިވާކަމަށެވެ.

ޕީއެސްޖީގެ އިތުރުން އެމްބަޕޭ ހޯދުމަށް ރެއާލް މެޑްރިޑް އަދި އާސެނަލް އިން ވެސް އަންނަނީ މަސައްކަތްކުރަމުންނެވެ. އެގޮތުން ރެއާލް އިން އެމްބަޕޭ ހޯދުމަށް 100 މިލިއަނަށްވުރެ އަގުހުރި ބިޑެއް ހުށަހަޅަން އުޅޭކަމަށް ރިޕޯޓްތައް ބުނެއެވެ.

އެގޮތުން މިދިޔަ އަހަރު މޮނާކޯއާއެކު ތިން އަހަރު ދުވަހުގެ އެއްބަސްވުމެއް ހަދާފައިވާ އެމްބަޕޭ ޓްރާންސްފާ ބާޒާރުގައި ކްލަބް ބަދަލުކުރާނެ ކަމަށް ވަނީ ބެލެވިފައެވެ. އެހެންނަމަވެސް އޭނާ ބަދަލުވާނީ ކޮން ކްލަބަކަށް ކަން އަދި ކަށަވަރެއް ނުވެއެވެ.

އުމުރުން 18 އަހަރުގެ އެމްބަޕޭ މޮނާކޯއާއެކު އޭނާގެ ސީނިއާ ކެރިޔަރު ފަށާފައިވާއިރު، މިވީތަނަށް އޭނާ ވަނީ އެޓީމާއެކު ހޭދަކުރި ދެ ސީޒަނުގައި ކުޅުނު 58 މެޗުގައި 27 ލަނޑު ކާމިޔާބުކޮށްފައެވެ. މީގެއިތުރުން އޭނާ ވަނީ އެޓީމާއެކު މި ސީޒަނުގައި ލީގުވެސް ކާމިޔާބުކޮށްފައެވެ.

ފްރާންސްގެ ސީނިއާ ޓީމަށް ހަތަރު މެޗު ކުޅެފައިވާ އެމްބަޕޭ ވަނީ ފްރާންސްގެ 19 އަހަރުން ދަށުގެ ޓީމާއެކު މިދިޔަ އަހަރު 19 އަހަރުން ދަށޫގެ ޔޫރޯ ފުޓުބޯޅަ މުބާރާތްވެސް ކާމިޔާބުކޮށްފައެވެ. އޭނާ ވަނީ މިދިޔަ ސީޒަނުގެ ފްރާންސްގެ އެންމެ ޒުވާން ކުޅުންތެރިޔާގެ މަގާމުވެސް ހޯދާފައެވެ.