ވިކްޓަރީގެ އަމާޒު ފުރަތަމަ ޑިވިޝަނާއި އެފްއޭކަޕަށް
14 ފެބުރުއަރީ 2023 | އަންގާރަ 07:08ބިދޭސީ މޮޅު ހަތަރު ކުޅުންތެރިން ވެސް ގެންނާނެ
ވިކްޓަރީ 2009 ވަނަ އަހަރުގެ އެފްއޭކަޕް ތައްޓާއެކު. މި އަހަރުގެ އެފްއޭކަޕް ތައްޓަށް ވާދަކުރާނެ
ދެ ވަނަ ޑިވިޝަނުގައި އޮތް ވިކްޓަރީގެ މި އަހަރުގެ އަމާޒަކީ ފުރަތަމަ ޑިވިޝަނަށް ކޮލިފައިވުމާއި އެފްއޭކަޕް ކާމިޔާބުކުރުން ކަމަށް އެ ކުލަބުން ބުނެފި އެވެ.
ދިވެހި ފުޓްބޯޅައިގެ އެންމެ މަތީ ހަރުފަތުގައި ބައިގަރުނު ހޭދަކުރި ކުލަބު މާލީ މައްސަލަތައް ދިމާވެ، މެޗުތައް ނުކުޅެ ދޫކޮށްލުމުން ދެ ވަނަ ޑިވިޝަނަށް ރެލިގޭޓްވީ 2019 ވަނަ އަހަރު އެވެ. އޭގެ ފަހުން އަލުން ފުރަތަމަ ޑިވިޝަނަށް ކޮލިފައިވުމަށް ވިކްޓަރީ މަސައްކަތް ފެށީ މިދިޔަ އަހަރު އެވެ. އެކަން ނާކާމިޔާވުމަށްފަހު މި އަހަރަށް ޓީމު ވަރުގަދަ ކުރަން ފެށުން ރޭ ދައްކާލީ ތަޖުރިބާކާރު ދެ ކުޅުންތެރިން ކަމަށްވާ މުހައްމަދު އުމޭރާއި ގައުމީ ކެޕްޓަން އަކްރަމް އަބްދުލްޣަނީ ސޮއި ހޯދައި ކޯޗަކަށް ސޮބާހް މުހައްމަދު ހަމަޖައްސައިގެންނެވެ.
ދެ ވަނަ ޑިވިޝަނަށް މިދިޔަ އަހަރު ނިއުރޭޑިއަންޓް ކޮލިފައިކޮށްދިނުމަށް މަސައްކަތްކުރި ސޮބާހް ރޭ ބުނީ ވިކްޓަރީގެ ޓާގެޓް ދެ ކަމަށް ހުރި ކަމަށެވެ. ފުރަތަމަ ޓާގެޓަކީ ދެ ވަނަ ޑިވިޝަނުގައި ކުޅެ ފުރަތަމަ ޑިވިޝަނުން ޖާގަ ހޯދުމެވެ. ދެ ވަނަ ކަމަކީ އެފް.އޭކަޕް ކާމިޔާބު ކުރުމަށް ވަރުގަދަ ޓީމެއް އެކުލަވާލުމެވެ. މި މަސައްކަތުގަތުގައި ވިކްޓަރީގެ ފުލް ޕްލޭން ހާމަ ކުރަން އަދި އަވަސް ކަމަށް ވެސް ކުރީގެ ތަޖުރިބާކާރު ޑިފެންޑަރު ރޭ ފާހަގަ ކުރި އެވެ.
ވިކްޓަރީ އަކީ ރާއްޖޭގެ ފުޓްބޯޅައިގައި މުއްސަދި ތާރީހެއް ލިބިފައިވާ އަދި އެންމެ ކާމިޔާބު އެއް ކުލަބެވެ. އެންމެ ސަޕޯޓަރުން ވެސް ގިނަ އެއް ކުލަބެވެ. މިކަން ފާހަގަ ކުރަމުން ސޮބާ ބުނީ ވިކްޓަރީ ފުރަތަމަ ޑިވިޝަނުގައި އޮތުމަކީ ފުޓްބޯޅަ އަށް ވަރަށް މުހިންމު ކަމެއް ކަމަށާއި އޭނާގެ ފުޓްބޯޅަ ހަޔާތް ފަށައިދިނީ ވިކްޓަރީ ކަމަށްވުމުން އެކުލަބުން އަލުން ކޮޅަށް ޖަހަން އެހީތެރިވާންޖެހޭ ކަމަށް ގަބޫލުކުރާ ކަމަށެވެ.
