ރޮނާލްޑޯ ބެންޗުގައި ބެއިންދުމުން ފެލިކްސް އަށް ލިބުނީ ހައިރާން ކަމެއް

މިދިޔަ އަހަރު ޤަތަރުގައި ނިމުނު ފީފާ ވޯލްޑް ކަޕްގައި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބެންޗުގައި ބައިންދަން ނިންމުމުން ލިބުނީ ހައިރާން ކަމެއް ކަމަށް އެ ޓީމަށް ކުޅެމުން އަންނަ ޒުވާން ކުޅުންތެެރިޔާ ޔާއޯ ފެލިކްސް ބުނެފި އެވެ.

ވޯލްޑް ކަޕްގައި ޕޯޗުގަލަށް އިރުޝާދު ދިން ކޯޗު ފެނާންޑޯ ސަންޓޯސް ވަނީ ރޮނާލްޑޯ ބެންޗުގައި ބައިންދައިފަ އެވެ. ރޮނާލްޑޯގެ ބަދަލު ސަންޓޯސް ވަނީ ގޮންޒާލޯ ރާމޯސް އަށް ފުރުސަތު ދީފަ އެވެ. އެ މެޗުގައި އޭނާ ވަނީ މޮޅު ކުޅުމެއް ދައްކައި ހެޓްރިކް ހަދައިފަ އެވެ. އޭގެ ފަހުން މޮރޮކޯއާ ދެކޮޅަށް ކުޅުނު މެޗުގައި ރޮނާލްޑޯ އެރުވީ ބަދަލު ކުޅުންތެރިޔެއްގެ ގޮތުގަ އެވެ. އެކަމާ ގުޅިގެން ވާހަކަ ދައްކަމުން ފެލިކްސް ބުނީ، އޭނާ އާއި ޓީމުގެ ކުޅުންތެރިން ތިބީ ބޮޑު ހައިރާން ކަމެއްގެ ތެރޭގައި ކަމަށެވެ. އެއީ ރޮނާލްޑޯ ބެންޗުގައި އިނުމަކީ އެމީހުންނަށް ފެންނަ މަންޒަރެއް ނޫން ކަމަށާއި، އެހެންކަމުން އެ މެޗުގައި އެގޮތަށް ކަންތައްވުމުން ހައިރާންވީ ކަމަށެވެ. ނަމަވެސް އެއީ ކޯޗުގެ ނިންމުމެއް ކަމަށާއި، އެކަންކަމުގެ ގޮތް ނިންމުން އޮންނަނީ ކޯޗުގެ އަތް މަތީގައި ކަމަށެވެ. ފެލިކްސް ބުނީ ބެންޗުގައި ބެއިންދުމުން ވެސް ރޮނާލްޑޯގެ އަމަލުތައް ހުރީ ވަރަށް ރީއްޗަށް ކަމަށާއި، ޓީމުގެ ކުޅުންތެރިން ތެރޭގައި އޮތީ ވެސް ރަނގަޅު ރޫޙެއް ކަމަށެވެ.

މީގެ އިތުރުން ފެލިކްސް ބުނީ ރޮނާލްޑޯގެ ފަރާތުން ޓީމުގެ އެހެން ކުޅުންތެރިންނަށް ފެނުނީ ރަނގަޅު މިސާލެއް ކަމަށާއި، ރޮނާލްޑޯގެ ސަބަބުން ޓީމަށް އިތުރު ހިތްވަރަކާއި، އެކުވެރިކަމެއް ލިބުނު ކަމަށެވެ. އޭނާ ބުނީ ރޮނާލްޑޯގެ ފަރާތުން އަބަދު ވެސް ޓީމަށް ލިބެނީ އެހީތެރިކަން ކަމަށާއި، އެގޮތުގައި އެކަން އޮންނާތީ ޓީމުގެ ކުޅުންތެރިން ތިބެނީ ވަރަށް ހިތްހަމަޖެހިގެން ކަމަށެވެ. ފެލިކްސް ވަނީ ރޮނާލްޑޯ ސައުދީ އަރަބިއާގެ އަލް ނަޞްރަށް ބަދަލުވުމާ ގުޅޭ ގޮތުން ވެސް ވާހަކަ ދައްކައިފަ އެވެ. އޭނާ ބުނީ ރޮނާލްޑޯ އަލް ނަޞްރަށް ބަދަލުވުމުން އޭނާ އަށް ހައިރާންކަމެއް ނުލިބޭ ކަމަށާއި، ސަބަބަކީ ޔޫރަޕުގައި ރޮނާލްޑޯ އަށް ޙާސިލް ނުކުރެވޭ އެއްވެސް އެއްޗެއް ނެތުމުން ކަމަށެވެ. އަދި ޔޫރަޕުގެ ތާރީޚުގައި ރޮނާލްޑޯގެ ނަން އޮތީ ލިޔެވިފައި ކަމަށާއި، އޭނާގެ ނަން ސައުދީގެ ތާރީޚުގައި ވެސް ލިޔެވޭނެ ކަމަށެވެ.

ރޮނާލްޑޯއާއެކު ޕޯޗުގަލްގެ އަމާޒަކީ އަންނަ އަހަރު އޮންނަ ޔޫރޯ ފުޓުބޯޅަ މުބާރާތެވެ.