މާނޭ ބަޔާންގެ ޓްރެއިނިންތަކަށް، ނަމަވެސް ޕީއެސްޖީއާ ދެކޮޅަށް ނުކުޅެވޭނެ

ބަޔާން މިއުނިކްގެ ޓްރެއިނިންގައި ސެނެގާލްގެ ސަޑިއޯ މާނޭ ބައިވެރިވާން ފަށާފައިވާ ކަމަށާއި، ނަމަވެސް ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށް ނުކުޅެވޭނެ ކަމަށް އެ ޓީމުގެ ކޯޗު ހޫލިއަން ނާގަލްސްމަން ބުނެފި އެވެ.

މާނޭ އަށް އަނިޔާވެފައިވަނީ މިިދިޔަ އަހަރުގެ ނޮވެމްބަރު މަހުގެ ތެރޭގައި ބަޔާނުން ކުޅުނު މެޗެއްގަ އެވެ. އެ އަނިޔާގެ ސަބަބުން މާނޭ އަށް މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތް ވެސް ވަނީ ގެއްލިފަ އެވެ. ނާގަލްސްމަން ބުނީ މިހާރު މާނޭ އަންނަނީ އެކަނި ޓްރެއިނިންތައް ކުރިއަށް ގެންދަމުން ކަމަށެވެ. އަދި ދުވަހަކަށްފަހު ދުވަހެއް ކުރިއެރުން ފެންނަމުންދާ ކަމަށާއި، މިހާރު މާނޭ އަންނަނީ ބޯޅައާއެކު ޓެރެއިނިން ހަދަމުން ކަމަށެވެ. ނާގަލްސްމަން ބުނީ އޭނާ އަށް އުންމީދު ކުރެވޭ ގޮތުގައި މާނޭ އަށް ޓީމާ ގުޅެވޭ ވަރު ވަނީ ފެބްރުވަރީ މަހުގެ މެދަށްފަހު ކަމަށެވެ. އެގޮތުން ޔުއެފާ ޗެމްޕިއަންސް ލީގުގެ ގަދަ 16 ގެ ފުރަތަމަ ލެގުގައި ޕީއެސްޖީއާ ދެކޮޅަށް ކުޅޭ މެޗު ކުޅެވޭ ވަރު ނުވާނެ ކަމަށެވެ. މާނޭ ސީދާ ޓީމާއެކު ފަރިތަކުރެވޭ ދުވަހަކު ގުޅޭ ގޮތުން ނާގަލްސްމަން ބުނީ މި މަހުގެ 21 ވަނަ ދުވަހަށް އުންމީދު ކުރެވޭ ކަމަށެވެ.

މީގެ އިތުރުން ނާގަލްސްމަން ބުނީ ރިއަން ގްރަންވެންބާޗް އަށް ކަކުލުގެ އަނިޔާއެއް ލިބިފައިވާ ކަމަށާއި، ފަރިތަކުރުންތަކުގައި އޭނާ ދައްކާ ކުޅުމަކަށް ބަލާނެ ކަމަށެވެ. އިތުރަށް އޭނާ ވަނީ ބަޔާންގެ ބައެއް ކުޅުންތެރިން އެކި ވަރުގެ އަނިޔާގެ ސަބަބުން ކުޅުމާ ދުރުގައި ތިބިކަން ވެސް ފާހަގަކޮށްފަ އެވެ. ނަމަވެސް އޭގެ ތެރެއިން ގިނަ ކުޅުންތެރިން ވަރަށް އަވަހަށް ޓީމާ ގުޅޭނެ ކަމުގެ އުންމީދު ބޮޑު ކަމަށެވެ.

ލިވަޕޫލް ދޫކޮށް މާނޭ ބަޔާނަށް ބަދަލުވީ މިދިޔަ އަހަރު އެވެ. ބަޔާނަށް ބަދަލުވެފައި ވެސް އޭނާ ވަނީ މޮޅު ކުޅުމެއް ދައްކައިފަ އެވެ. އެ ޓީމަށް މިހާތަނަށް ކުޅެދިން 23 މެޗުގައި އޭނާ ވަނީ 11 ލަނޑު ޖަހައިދީފަ އެވެ.