މާނޭގެ އަނިޔާ ސީރިއަސްވެ ލިވަޕޫލް ކޯޗަށް ހާސްކަމެއް

ލިވަޕޫލްގެ ކުރިއަށް ކުޅެމުން އަންނަ ސެނެގަލްގެ ސެޑިއޯ މާނޭއަށް އެވަޓަންއާ ދެކޮޅަށް ކުޅުނު މެޗުގައި ކުރިމަތިވި އަނިޔާގެ މައްސަލަ ސީރިއަސްވެ އެކުލަބުގެ ކޯޗު ޔާގެން ކްލޮޕް އަށް ނުތަނަވަސްކަން ގެނެސްފިއެވެ.

މިދިޔަ ހޮނިހިރު ދުވަހު ލިވަޕޫލްގެ އަމިއްލަ ދަނޑުގައި އެވަޓަންއާ ދެކޮޅަށް ކުޅުނު މެޗުގައި މާނޭއަށް އަނިޔާވި ނަމަވެސް މެޗަށް ފަހު ނޫސްވެރިންނާ ވާހަކަ ދައްކަމުން ލިވަޕޫލްގެ ކޯޗު ކްލޮޕް ބުނެފައި ވަނީ މާނޭގެ އަނިޔާ އެހާ ސީރިއަސް ނޫން ކަމަށެވެ.

ކޯޗްގެ އެވާހަކަތަކާއި ގުޅިގެން ބޯންމައުތާ ދެކޮޅަށް ކުޅެން ޖެހޭ މެޗުގައި ފިޔަވައި އެހެން މެޗުތަކުގައި މާނޭ ފެންނާނެ ކަމަށް އޮތީ ބެލެވިފައެވެ.

އެވަޓަން އަތުން 3-1 ގެ ނަތީޖާ އަކުން، ލިވަޕޫލް މޮޅުވި މެޗުގައި މާނޭއަށް އަނިޔާވެފައިވަނީ އޭނާގެ ކަކުލަށެވެ. އަދި ފަރުވާ ހޯދުމަށް ސްކޭނެއް ހެނދިނަމަވެސް ކަކުލުގައި ދުޅަ ހުރުމުގެ ސަބަބުން ލިބިފައިވާ އަނިޔާގެ އެއްވެސް ތަފްސީލެއް ނޭނގެއެވެ.

އެވަޓަންގެ ލައިޓަން ބެއިންސް ކުރި ފައުލަ ގުޅިގެން މާނޭ ބޭލުމަށްފަހު ކުޅެން އަރުވާފައިވަނީ ޑިވޯކް އޮރީގީ އެވެ.

ލިވަޕޫލަށް ބާކީ 8 މެޗު އޮތްއިރު، މާނޭ ނެތި އެންމެ މެޗަކަށް ނުކުތުމަކީ ވެސް އެކުލަބަށް ކުރިމަތިވާނެ ގޮންޖެހުމެކެވެ.

ލިވަޕޫލްގައި ރަނގަޅު ކުޅުމެއް ދައްކަމުން އަންނަ މާނޭ ނެތްތައް ފޫބެއްދުމަށް ކުރިއަށް ހުރި މެޗުތަކުގައި ކޯޗް ކްލޮޕް ބޭނުންކުރަނީ އޮރީގީ ކަމަށް ބެލެވެއެވެ.

އެފްރިކަން ކަޕް އޮފް ނޭޝަންގައި، ސެނާގޯލް ޓީމާއެކު މާނޭ ދިޔުމުންވެސް ލިވަޕޫލްއަށް ވަނީ އެތަން ދައްކާފައެވެ. އަދި މި އަނިޔާގެ ސަބަބުން ދިގުމުއްދަތަކަށް ކުޅުމާއި ދުރުގައި ހުންނަން މާނޭއަށް ޖެހިދާނެއެވެ.