ޕާކިސްތާންގެ މިސްކިތެއްގައި ޖާނުން ފިދާވެގެންދިން ބޮމުގެ ހަމަލާއެއްގައި 30ށް ވުރެ ގިނަ މީހުން މަރުވެއްޖެ
ހަމަލާދިން އިރު މިސްކިތުގައި 260 މީހުން ތިބި
ޕާކިސްތާންގެ މިސްކިތެއްގައި މީހަކު ޖާނުން ފިދާވެގެން ބޮމުގެ ހަމަލާއެއް ދިނުން
ޕާކިސްތާންގައި މީހަކު ޖާނުން ފިދާވެގެންދިން ބޮމުގެ ހަމަލާއެއްގައި 30ށް ވުރެ ގިނަ މީހުން މަރުވެއްޖެއެވެ.
މީޑިއާ ރިޕޯޓުތައް ބުނާގޮތުން، ހޯމަ ދުވަހު، ޕާކިސްތާންގެ ޕެޝާވަރްގެ މިސްކިތެއްގައި މެންދުރު ނަމާދު ވަގުތުގައި މީހަކު ވަނީ ޖާނުން ފިދާވެގެން ބޮމުގެ ހަމަލާއެއް ދީފައެވެ. މިއީ އެސަރަހައްދުގައި ހަރަކާތްތެރިވާ އިސްލާމިސްޓް ހަނގުރާމަވެރިންނަށް އަމާޒުކޮށް ދިން ހަމަލާއެއް ކަމަށްވެސް ރިޕޯޓުތައް ފާހަގަކުރެއެވެ.
މިބޮމުގެ ހަމަލާގައި މިހާތަނަށް 32 މީހުން މަރުވެފައިވާކަމަށް ރިޕޯޓުތައް ބުނެއެވެ.
ވީޑިއޯ ފުޓޭޖް ދައްކާގޮތުން ހަމަލާދިން އިރު އެސަރަހައްދުގައި ގިނަ އަދަދެއްގެ ބައެއް ދިޔައީ ހަރަކާތްތެރިވަމުންނެވެ. އެގޮތުން ހަމަލާދިން އިރު މިސްކިތުގައި 260 މީހުން ތިބި ކަމަށް ފުލުހުން ބުނެއެވެ.
މިހާތަނަށް އައިރު މިހަމަލާގެ ޒިންމާ އެއްވެސް ބަޔަކު ނަގާފައެއް ނުވެއެވެ.
މިހަމަލާއަކީ މިދިޔަ އަހަރުގެ މާޗު މަހު މީހަކު ޖާނުން ފިދާވެގެންދިން މިފަދަ ބޮމުގެ ހަމަލާއަށް ފަހު އެގައުމުގައި ދިން މިފަދަ އެންމެ ނުރައްކާތެރި ހަމަލާކަމަށް ބޮޑުވަޒީރު ޝަހްބާޒް ޝަރީފް ވަނީ ވިދާޅުވެފައެވެ.
