ޕާކިސްތާނުގައި ހިނގި ދެ ހާދިސާއެއްގައި 51 މީހުން މަރުވެއްޖެ

އާދީއްތަ ދުވަހު ޕާކިސްތާނުގައި ހިނގި ދެ ހާދިސާއެއްގައި 51 މީހުން މަރުވެއްޖެއެވެ.

އެ ޤައުމުގެ އޮފިޝަލުންނާ ހަވާލާދީ ރޮއިޓަރސްއިން ރިޕޯޓްކޮށްފައިވާ ގޮތުގައި ފުރަތަމަ ހާދިސާ ހިނގާފައިވަނީ ޕާކިސްތާނުގެ ހުޅަނގު ދެކުނުގެ ބަލޮޗިސްތާން ޕްރޮވިންސުގައެވެ. އެ ޕްރޮވިންސުގައި ބްރިޖެއްގެ މަތިން ބަހެއް ވެއްޓުނު ހާދިސާގައި 41 މީހަކު ވަނީ މަރުވެފައެވެ.

މި ހާދިސާގައި މަރުވި މީހުންގެ ތެރެއިން ބައެއް މީހުންގެ ހަށިތައް ވަނީ ކާކުކަން ނޭނގޭވަރަށް އަނދާފައެވެ. އެހެންކަމުން އެ މީހުން ދެނެގަތުމަށް ޑީއެންއޭ ހެދުމުގެ މަސައްކަތް ދަނީ ކުރަމުންނެވެ. މި ހާދިސާގައި މަރުވި މީހުންގެ ތެރޭގައި ކުޑަކުދިން ވެސް ހިމެނެއެވެ.

މި ހާދިސާ ހިނގަން މެދުވެރިވީ، ރޭގަނޑުގައި ދުއްވާފައި ދިޔަ ބަހުގެ ޑްރައިވަރަށް ނިދިޖެހި، ބަހުގެ ކޮންޓްރޯލު ގެއްލުމުން ކަމަށް ބެލެވޭ ކަމުގައި މި ހާދިސާ ތަހުޤީޤު ކުރަމުންދާ ފަރާތްތަކުން ބުނެއެވެ. އަދި ބުރިޖުން ތިރިއަށް ބަސް ވެއްޓުނީ ބުރިޖުގެ ތަނބެއްގައި ޖެހުމަށް ފަހު ކަމުގައި ވެސް އޮފިޝަލުން ބުނެއެވެ.

ދެވަނަ ހާދިސާ ހިނގާފައި ވަނީ ހުޅަނގުއުތުރުގައިވާ ޚައިބަރ ޕަޚްތުންޚްވާ ޕްރޮވިންސުގައެވެ. އެގޮތުން އެ ސަރަޙައްދުގެ ސްކޫލެއްގެ ދަރިވަރުން ގޮވައިގެން ދަތުރުކުރި ބޯޓެއް ބަންޑުން ޖަހާލައި 10 ކުދިން ވަނީ މަރުވެފައެވެ. މި ހާދިސާގައި މަރުވި ހުރިހާ ކުދިންނަކީ ވެސް ހަތް އަހަރާއި 12 އަހަރާ ދެމެދުގެ ސްކޫލް ކުދިންނެވެ.

މި ހާދިސާގައި އިތުރު ދަރިވަރުންތަކެއް ވެސް ވަނީ ގެއްލިފައެވެ. އެ ކުދިން ހޯދުމުގެ މަސައްކަތް އެ ޤައުމުގެ އޮފިޝަލުން ދަނީ ކުރަމުންނެވެ. އެ ޤައުމުގެ ކޯހަޓް ޑިސްޓްރިކްޓުގެ ކޮމިޝަނަރު މަހުމޫދު އަސްލަމް ރޮއިޓަރސް އަށް މައުލޫމާތު ދީފައިވާ ގޮތުގައި އެ ކުދިން ބޯޓުގައި ދަތުރު ކުރީ ޕިކްނިކްދިއުމުގެ ތެރޭގައެވެ. ބޯޓުގައި އެވަގުތު 25 ދަރިވަރުން ތިބިކަމަށް އޭނާ ވަނީ ވިދާޅުުވެފައެވެ.