ފްރޭންކްފާޓާ އެއްވަރުވެ ބަޔާން އުނދަގޫ ޙާލަތަކަށް

ޖަރުމަނު ލީގުގައި އައިންޓްރަކްޓް ފްރޭންކްފާޓާއާ ދެކޮޅަށް ކުޅުނު މެޗުން ވެސް އެންމެ ފަހުގެ ޗެމްޕިއަން ބަޔާން މިއުނިކް 1-1 އިން އެއްވަރުވެއްޖެ އެވެ.

މިއީ ފީފާ ވޯލްޑް ކަޕް ބްރޭކަށްފަހު ލީގުގައި ބަޔާނުން ކުޅުނު ތިން ވަނަ މެޗެވެ. އެ ޓީމު ކުޅުނު ތިން މެޗު ވެސް ވަނީ އެއްވަރުވެފަ އެވެ. އެހެންކަމުން ބަޔާނާ ދެ ވަނައިގައި އޮތް ޔޫނިއަން ބާލިންއާ ދެމެދު މިހާރު އޮތީ ޕޮއިންޓެއްގެ ފަރަގެކެވެ. އެއް ވަނައިގައި ބަޔާން އޮތީ ކުޅުނު 18 މެޗުން 37 ޕޮއިންޓާއެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް ޔޫނިއަން ބާލިން އަށް ލިބެނީ 36 ޕޮއިންޓެވެ.

ބަޔާންގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި ފުރަތަމަ ލަނޑު ޖަހައި ލީޑު ނެގީ ވެސް އެ ޓީމުންނެވެ. މެޗުގެ 34 ވަނަ މިނެޓުގައި ބަޔާނަށް ލީޑު ނަގައިދިނީ ޖަރުމަނުގެ ވިންގް ލެރޯއި ސާނޭ އެވެ. އެއީ ތޯމަސް މުލާ ހުރަސްކޮށްދިން ބޯޅައެއް އެއްބަރުން ގޯލަށް ފޮނުވާލައިގެން އޭނާ ޖަހައިދިން ލަނޑެކެވެ. މެޗުގެ 69 ވަނަ މިނެޓުގައި ފްރާންސްގެ ރަންޑަލް ކޯލޯ މުއާނީ ވަނީ ފްރޭންކްފާޓަށް ނަތީޖާ ހަމަހަމަކޮށްދީފަ އެވެ. އެއީ ފްރޭންކްފާޓުގެ ޑައީޗީ ކަމާޑާ ދިން ބޯޅައެއް ގޯލަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ލީގުގައި ބަޔާނަށް ދެން އޮތީ އަންނަ މަހުގެ ފަސް ވަނަ ދުވަހު ވޮލްސްބާގާ ދެކޮޅަށް ކުޅޭ މެޗެވެ.