އދ.ން ދޭ މުސާރަ ކުޑަވެ، ފަލަސްތީނު ބޮޑު ހަޅުތާލަކަށް!

ހުޅަނގު އައްސޭރީގައި ސްކޫލްތަކާއި ކުލިނިކުތަކުގެ އިތުރުން ބައެއް މުނިސިޕަލް ޚިދުމަތްތައް މެދުކަނޑާލާފައި އޮންނަތާ ޖެނުއަރީ 25 ވީ ބުދަ ދުވަހަށް 3 ދުވަސްވީއެވެ. ސަބަބަކީ، މުވައްޒަފުންގެ މުސާރަ ހަމަޖައްސަމުން ދާ އދ.ގެ އިދާރާއަށް ފަންޑު ލިބުން ދަތިވެ، މާލީ ރިޒަރވް ހީނަރުވުމާއެކު މުވައްޒަފުން ހަޅުތާލު ފެށުމެވެ.

ހުޅަނގު އައްސޭރީގައި ކުރަމުންދާ ހަޅުތާލާ ގުޅުނު މަސައްކަތްތެރިންގެ އަދަދު 3700އަށް އަރައެވެ. މަސައްކަތްތެރިންގެ ޑިމާންޑްކުރަނީ ޔުނައިޓަޑް ނޭޝަންސް ރިލީފް އެންޑް ވަރކްސް އޭޖެންސީ (ޔޫއެންއާރްޑަބްލިއުއޭ) މެދުވެރިކޮށް މަހެއްގެ މައްޗަށް ލިބޭ އާމްދަނީއަށް 200 ޖޯޑޭނިއަން ދީނާރު ނުވަތަ 281.81 ޑޮލަރު އިތުރު ކުރުމަށެވެ.

މަސައްކަތްތެރިންގެ އިއްތިހާދުގެ ފަރާތުން ހަޅުތާލުގެ ކަންކަމުގައި އެންމެ އިސްކޮށް އުޅޭ ޖަމާލް އަބްދުﷲ ބުނިގޮތުގައި، ޔޫއެންއާރްޑަބްލިއުއޭއިން ޑިމާންޑްތައް ބަލައިގަންނަންދެން ހަޅުތާލުތައް ކުރިއަށްދާނެއެވެ.

ކަން މިހެން އޮތްއިރު، ޖެނުއަރީ 26 ވަނަ ދުވަހު، ޔޫއެންއާރްޑަބްލިއުއޭއިން ވަނީ 1.6 ބިލިއަން ޑޮލަރުގެ ފަންޑަކަށް އެދި ގޮވާލާފައެވެ. އެއީ އަރަބިންނާއި އިޒްރޭލުންގެ ކޯޅުމަށްފަހު، ރެފިއުޖީންގެ ގޮތުގައި ދިރިއުޅޭ ގިނަ އަދަދެއްގެ ބަޔަކު ވަޒަންވެރިވެގެން އުޅޭ ލުބްނާން، ސޫރިޔާ އަދި އުރުދުންގެ އިތުރުން ފަލަސްތީނުގެ ހުޅަނގު އައްސޭރިއާއި ޣައްޒާއަށް ބޭނުންވާ އެހީއާއި ސިއްހީ ފަރުވާގެ އިތުރުން ސްކޫލްތައް ހިންގަން ބޭނުންވާ ފައިސާއެވެ.

ހުޅަނގު އައްސޭރީގެ ރަށްވެހިންނަކީ މިހާރުވެސް އިންތިހާ ތަކުލީފުތަކާއެކު ދިރިއުޅުމުގެ ދުވަސްތައް ކަޑައްތުކުރަމުންދާ ބަޔަކަށް ވާއިރު، މަސައްކަތްތެރިންގެ ހަޅުތާލާއެކު އިތުރު ވޭނެއް އުފުލަން މި ވަނީ މަޖުބޫރުވެފައެވެ. ސިއްހީ ފަރުވާދޭ ކުލިނިކުތަކުގައި ބަންދު ބޯޑު އަޅުވާފައި ވާއިރު، ބައި ލައްކައެއްހާ ދަރިވަރުން ދާނެ ސްކޫލެއް ނެތެވެ. މަގުތައް މަތީގައި ކުނިބުނި ވަނީ ފުނިޖެހިފައެވެ.

ކޭމްޕެއްގެ ތެރެއަށް ވަދެއްޖެނަމަ، އެއްކޮޅުން އަނެއް ކޮޅަށް ހިނގާ ނުލެވޭ ވަރަށް ކުނިތައް ވަނީ ގިނަވެފައެވެ.

ހުރިހާ ކޮޅަކުން ފިއްތާލާފައި އޮތް ޣައްޒާގެ ހާލަތުވެސް އިންތިހާއަށް ގޯހެވެ. ޣައްޒާގެ ރެފިއުޖީންނަކީ ބަނޑުފުރާ މުއްތިކުރުމަށްވެސް އެހީއަށް ބަރޯސާވާ ބަޔަކަށްވާއިރު، އިންސާނީ އެހީގެ މަސައްކަތަށްވެސް ހުރަސްތަކާ ވަނީ ކުރިމަތިވެފައެވެ.

ޢުމުރުން 63 އަހަރުގެ ނާހިދު އަބޫ އަމީރާގެ 24 މެންބަރުންގެ އާއިލާއަކީ ދިރިއުޅުމަށްޓަކައި ޔޫއެންއާރްޑަބްލިއުއޭގެ އެހީއަށް މުޅިން ބަރޯސާވެފައި އޮތް އާއިލާއެކެވެ.

ދުނިޔެއަށް މިއަދު ކުރިމަތިލާން ޖެހިފައިވާ އެކި ކަހަލަ ކާރިސާތަކުގެ އިތުރުން، ބާޒާރުތަކުގައި ތަކެތީގެ އަގުތައް އުފުލުމާއި، ސަޕްލައި ޗޭނުތަކަށް ބުރޫއެރުމާއެކު އދ.ގެ އިދާރާއަށް އެހީގެ ގޮތުގައި ލިބޭ އެއްޗެއްވެސް ވަނީ ވަރަށް ބޮޑަށް ދަށްވެފައެވެ. އަވަސް ފުރުސަތެއްގައި ހެޔޮ ގޮތެއް ވެދާނެކަމުގެ އިޝާރާތެއް ނެތެވެ.