ރައީސް އެދިވަޑައިގެންނެވީ ވާދަވެރި ކެންޑިޑޭޓަށް ދޭންވާ އިހްތިރާމާއި ލޯތްބާއި ގަދަރު ދެއްވުމަށް

އެމްޑީޕީގެ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި ވާދަކުރައްވާ، ކުރީގެ ރައީސް އަދި އެމްޑީޕީގެ ރައީސް، ރައީސް މުހައްމަދު ނަޝީދަށް ދެއްވަންވާ އިހްތިރާމާއި ލޯތްބާއި ގަދަރު ދެއްވުމަށް އެމަނިކުފާނު އެދިވަޑައިގެންފިއެވެ.

އަންނަ ހޮނިހިރު ދުވަހު ބާއްވާ އެމްޑީޕީގެ ރިޔާސީ ޕްރައިމަރީގެ ކެމްޕޭނަށް އއ. މާޅޮހަށް ވަޑައިގެން ރައީސް ޞާލިހުގެ ސަޕޯޓަރުންނާއި ބައްދަލުކުރައްވާ ވާހަކަފުޅުދައްކަވަމުން ރައީސް ވިދާޅުވީ، މާޅޮހުގައި ހުންނަވާ މި ވާހަކަ ދައްކާއިރުގައި އެމަނިކުފާނަކީ ކާކުތޯ އަދި އެމަނިކުފާނުގެ ވާދަވެރި ކެންޑިޑޭޓަކީ ކާކުތޯ ވަރަށް ސާފުކޮށް އެރަށުގެ ރައްޔިތުންނަށް އެނގިވަޑައިގަންނަވާނެ ކަމަށެވެ. ދެފަރާތުގައި ވެސް މިތިބީ ހަމަ ގާތް އާއިލީ ބޭފުޅުން ކަމަށާއި، މިއީ އެކުވެރިން ރަހުމަތްތެރިން ކަމަށެވެ.

އެއްވެސް ހާލެއްގައި އެމަނިކުފާނު ނުކުމެ އުޅުއްވަނީ ވަކި މީހަކާ ދެކޮޅަކަށް ނޫން ކަމަށާއި، އެހެން ކަމުން އެމަނިކުފާނުގެ ވާދަވެރި ކެންޑިޑޭޓަށް ވެސް ދޭންވާ އިހްތިރާމާއި ލޯތްބާއި ގަދަރު ދެއްވުމަށް އެދިވަޑައިގެންނެވިއެވެ.

މަތިވެރި ދާއިރާއަށް ކޮށްދެއްވާނެ ކަންކަމަށް އަލިއަޅުއްވާލައްވާ ރައީސް ވިދާޅުވީ މަތިވެރި ބަނދަރު އަދި ބިންހިއްކުން މި ދައުރުގެ ތެރޭގައި ކުރެވޭތަން މަތިވެރީގެ ރައްޔިތުންނަށް ފެނިގެންދާނެ ކަމަށެވެ. މިއީ އެމަނިކުފާނުގެ ސަރުކާރުން ކޮށްދޭނެކަމެއް ކަމަށައި، މަތިވެރި ފިނޮޅާ ދޭތެރޭގައި އެންމެ ފަހުގެ ނިންމުން އެމަނިކުފާނު ވާނީ ނިންމަވާފައި ކަމަށެވެ.

ރައީސް ވިދާޅުވި އަންނަ ހަފްތާގައި ބޭއްވޭ އިކޮނަމިކް ކައުންސިލްގައި، ރައްޔިތުން އެދިވަޑައިގެންނެވި ގޮތަށް މަތިވެރި ފިނޮޅު ރައްޔިތުންނަށް ހަވާލުކުރުމުގެ ނިންމުން ނިންމަވާނެ ކަމަށެވެ. އަދި އޭގެ ފައިދާ މި ހިސާބުގަނޑުގެ ހުރިހާ ރަށަކަށް ލިބިގެންދާނެ ކަމަށް ރައީސް ވިދާޅުވިއެވެ.

މީގެ އިތުރުން ބޮޑުފުޅަދޫ ބިން ހިއްކުން ވަނީ ޕްލޭން ކުރެވިފައި ކަމަށާއި، ހިމަންދޫ ގިރާ ސަރަހައްދު ހިމާޔަތްކުރުމާއި، ފެރިދޫ ބަނދަރުގެ މަސައްކަތް އޮތީ ސޮއިކޮށްފައި ކަމަށް ރައީސް ވިދާޅުވިއެވެ. ދެން އޮތީ ސޮއިކޮށްފައި ކުރިއަށް ގެންދިއުން ކަމަށާއި، އިރާދަކުރެއްވިއްޔާ މިހެން ކަންތައްތައް ކުރިއަށްގެންދާނެކަމުގެ ޔަގީންކަން ދެއްވާ ކަމަށް ރައީސް ވިދާޅުވިއެވެ.

އަދި ހިމަންދޫ ގިރާ ސަރަހައްދުގެ މަސައްކަތް ފައްޓަވައިދެއްވާނެ ކަމަށާއި، އެ ސަރަހައްދުގައި ސިއްހީ ހިދުމަތް އެ 5 ރަށަށް ފަސޭހައިން ލިބޭނެ ގޮތަށް އޭ ކެޓަގަރީގެ ހޮސްޕިޓަލެއް އަޅުއްވައިދެއްވާނެ ކަމަށް ރައީސް ވިދާޅުވިއެވެ.