ރެއާލް މެޑްރިޑަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަށް އެއްމާބަނޑު ދެކުދިން ލިބިއްޖެއެވެ.
ރޮނާލްޑޯ ފޭސްބުކްގައި ކުރި ޕޯސްޓެއްގައި ބުނީ އޭނާ ގައުމީ ޓީމާއެކު ރަޝިއާގައި ކޮންފެޑެރޭޝަންސް ކަޕް ކުޅުމަށް ހުއްޓާ ދެ ކުދިން އުފަންވެފައިވާ ކަމަށާއި، އެކަމާ އޭނާ ވަރަށް އުފަލުން ހުރި ކަމަށެވެ.
ރޮނާލްޑޯ އާއި އޭނާ ލޯބީގެ ގޮތުން ގުޅިގެން އުޅޭ ޖޯޖިނާ ރޮޑްރިގޭޒް އަށް އެއްމާބަނޑު ދެކުދިން ލިބިފައިވާއިރު އެ ކުދިންނަކީވެސް ފިރިހެން ދެ ކުދިން ކަމަށް ޕޯޗުގަލްގެ ރިޕޯޓްތައް ބުނެއެވެ. އެގޮތުން އެ ދެ ކުދިންނަށް ކިޔަނީ މަޓިއޯ އަދި އިވާ ކަމަށްވެސް ރިޕޯޓްތައް ބުނެއެވެ.
ރޮނާލްޑޯގެ ލޯބިވެރިޔާ ޖޯޖިނާ ބަނޑުބޮޑުކަމަށް ރިޕޯޓްތައް ބުނަމުން އަންނަތާ ދުވަސްކޮޅެއްވެއްޖެއެވެ. އެގޮތުން އެ ދެމީހުންނަށް ލިބެނީ އެއްމާބަނޑު ދެކުދިންކަމަށްވެސް ރިޕޯޓްތައް ބުނިއެވެ. އެހެންނަމަވެސް ރޮނާލްޑޯއެކަން ކަށަވަރުކޮށްދިނީ ބުރާސްފަތި ދުވަހު އެވެ.
ކޮންފެޑެރޭޝަންސްކަޕްގެ ސެމީފައިނަލުން ބަލިވެ ފައިނަލަށް ނުގޮސް ޕޯޗުގަލް ކަޓާފައިވާއިރު، މުބާރާތުގެ ތިންވަނަ ހޮވާ މެޗުގައި ރޮނާލްޑޯ ބައިވެރިނުވާނެކަމަށް ރިޕޯޓްތައް ބުނެއެވެ. އެގޮތުން އޭނާ ދަތުރުކުރާނީ އަލަށް ލިބުނު ދެކުދިން ބެލުމަށްކަމަށްވެސް ރިޕޯޓްތައްބުނެވެ.
ރޮނާލްޑޯގެ ދޮށީ ދަރި ރޮނާލްޑޯ ޖޭއާރް އަށް މި މަހު ހަތް އަހަރު ފުރިފައިވާއިރު، އެ ކުއްޖާގެ މަންމަ އަކީ ކާކުކަން އަދިވެސް ނޭގެއެވެ. އެހެންނަމަވެސް ރޮނާލްޑޯއާ ބެހޭގޮތުން ހެދި ޑޮކިއުމެންޓްރީއަކަށް ދިން އިންޓަވިއުއެއްގައި އޭނާ ބުނީ ކޮންމެވެސް ދުވަހަކުން ދަރިފުޅަށް އެކުއްޖާގެ މަންމަ އަކީ ކާކުކަން ކިޔާދޭނެކަމަށެވެ.
ރޮނާލްޑޯ ވަނީ މި ސީޒަނުގައި މޮޅު ކުޅުމެއް ދައްކާފައެވެ. އެގޮތުން އޭނާ ވަނީ މި ސީޒަނުގައި ރެއާލްއާއެކު ސްޕެނިޝް ލީގު އަދި ޔުއެފާ ޗެމްޕިއަންސް ލީގުވެސް ކާމިޔާބުކޮށްފައެވެ. މީގެއިތުރުން މިއަހަރުވެސް ދުނިޔޭގެ އެންމެ މޮޅު ކުޅުންތެރިޔަކަށް ހޮވޭނީ ރޮނާލްޑޯކަމަށް ގިނަ ބަޔަކު އަންނަނީ ބުނަމުންނެވެ.
