އަހަރެއްގެ ތެރޭގައި އަންހެން ޓީމަށް ބޮޑު ކުރިއެރުމެއް ލިބިއްޖެ: އަދީލް

ސެންޓްރަލް ޒޯން ވޮލީ މުބާރާތަކީ ދިވެހި ޤައުމީ އަންހެން ވޮލީ ޓީމަށް ކާމިޔާބު މުބާރާތެއްކަމަށާއި، ޓީމަށް އައިސްފައިވާ ކުރިއެރުމާއިމެދު ހިތްހަމަ ޖެހޭ ކަމަށް ދިވެހި ޤައުމީ ވޮލީ ޓީމްގެ ކޯޗް އަހުމަދު އަދީލް (ބޭބެ) ބުނެފި އެވެ.

އަންނަ އަހަރު އޮންނަ އަންހެން ވޮލީބޯޅަ ވޯލްޑް ޗެމްޕިއަންޝިޕްގެ ސެންޓްރަލް ޒޯން ކޮލިފައިން މެޗުތައް ނިންމާލުމަށް ފަހު ދިވެހި ޤައުމީ ވޮލީ ޓީމްގެ ކޯޗް އަދީލް ބުނީ ޖުމްލަކޮށް ދިވެހި ޓީމް މުބާރާތުގައި ދެއްކި ކުޅުމާ މެދު ހިތްހަމަޖެހޭ ކަމަށެވެ. ކުޅުންތެރިން މުޅި މުބާރާތުގައި ހިތްހަމަޖެހޭ ވަރަށް ކުޅުނު ކަމަށާއި، މިއީ ރަނގަޅު ތަޖުރިބާއެއް ކަމަށް އަދީލް ބުންޏެވެ. މުބާރާތުގެ ކުރިން ވާދަވެރި މެޗެއް ކުޅެލަން ނުލިބުމުން އެކަން އަބަދުވެސް ފާހަގަކުރި ކަމަށާއި، މުބާރާތުގެ ކުރިން މެޗުތަކެއް ކުޅެލަން ލިބުނުނަމަ ނަތީޖާ ތަފާތުވީސްކަން އަދީލް ފާހަގަކުރި އެވެ.

އަދީލް ބުނީ މިދިޔަ އަހަރުގެ ސައުތު އޭޝިއަން ގޭމްސްގެ ސެމީ ފައިނަލުން ޓީމް ޖާގަ ހޯދުމާ އެކު ދެން އަމާޒު ހިފީ ޓީމާ އެކު މެޑައްޔަކަށް ކަމަށާއި، މިއަދު އެކަން ހާސިލްވެއްޖެ ކަމަށެވެ. އަދި އެއް އަހަރުތެރޭ ޓީމަށް ލިބިފައިވާ ކުރިއެރުން ފާހަގަކުރާ ކަމަށާއި، މިއަށް ވުރެ ބޮޑު ކާމިޔާބީތަކެއް މި ޓީމާ އެކު ހޯދޭނެ ކަމަށް ވެސް އަދީލް ބުންޏެވެ.

ޤައުމީ ވޮލީ ޓީމްގެ ކޯޗު ބުނީ ފުރަތަމަ މެޗުގައި އީރާނާ ދެކޮޅަށް ކުޅެން ޖެހުނު ނަމަ މުބާރާތުގެ ނަތީޖާ ތަފާތުވީސް ކަމަށެވެ.

ސެންޓްރަލް ޒޯން ކޮލިފައިންގެ ތިންވަނަ ހޯދުމާ އެކު ރާއްޖެއަށް ވަނީ މުބާރާތުގެ ލޯ މެޑަލް ލިބިފަ އެވެ. މީ ބައިނަލްއަޤްވާމީ މުބާރާތަކުން ދިވެހި ޤައުމީ އަންހެން ވޮލީ ޓީމް ހޯދި ފުރަތަމަ މެޑައްޔެވެ.