ސުޕަ ކަޕާއެކު ބާސެލޯނާ އަށް ހަމެޖެހުމެއް އަންނާނެ ކަމަށް ޒަވީ ޤަބޫލު ކުރޭ

ސްޕެނިޝް ސުޕަ ކަޕާއެކު ބާސެލޯނާ އަށް ހަމަޖެހުމެއް އަންނާނެ ކަމަށް ޤަބޫލު ކުރެވޭ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.

މި ސީޒަންގެ ސްޕެނިޝް ސުޕަ ކަޕްގެ ފައިނަލްގައި ބާސެލޯނާ އިން ވަނީ ވާދަވެރި ރެއާލް މެޑްރިޑު ބަލިކުރުމަށްފަހު ތަށި އުފުލާލައިފަ އެވެ. މިއީ ބާސެލޯނާގެ ކޯޗުކަމާ ޒަވީ ހަވާލުވި ފަހުން އެ ޓީމަށް ކާމިޔާބު ކުރެވުނު ފުރަތަމަ ތައްޓެވެ. މެޗަށްފަހު ވާހަކަ ދައްކަމުން ޒަވީ ބުނީ އާޖެންޓީނާގެ ކެޕްޓަން ލިއޮނަލް މެސީ ދޫކޮށްލަން ބާސެލޯނާ އަށް ޖެހި، ޓީމު ދިޔައީ މާލީ ގޮތުން ވަރަަށް ބޮޑު ދަށް ކަމެއްގެ ތެރެއަށް ކަމަށެވެ. އޭނާ ބުނީ ދިމާވި މާލީ މައްސަލައިގެ ސަބަބުން ބާސެލޯނާ އަށް ވަރަށް ބޮޑު ނުތަނަވަސްކަމެއް ވެސް ކުރިމަތިވި ކަމަށެވެ. އެހެންކަމުން އަލުން ޓީމަށް ރަނގަޅު ރޫޙެއް ގެނައުމަކީ ވެސް ފަސޭހަކަމެއް ނޫން ކަމަށެވެ. ޒަވީ ބުނީ ލިބުނު ކާމިޔާބީގެ ސަބަބުން ބާސެލޯނާ އަށް ކޮންމެ ވެސް ވަރެއްގެ ހަމަޖެހުމެއް ލިބޭނެ ކަމަށް އުންމީދު ކުރާ ކަމަށެވެ. އެގޮތުން އެންމެ ފުރަތަމަ ދުވަހުން ފެށިގެން ބާސެލޯނާ އިން މަސައްކަތް ކުރަމުން އައީ ދިމާވި ކަންކަމުން އަރައި ގަތުމަށް ކަމަށާއި، ކުރިއަށް އޮތް ތަނުގައި ވެސް އެ މަސައްކަތް ކުރަން ޖެހޭނެ ކަމަށެވެ.

ކުރިން ކުޅުންތެރިޔެއްގެ ގޮތުގައި ބާސެލޯނާގެ ކެޕްޓަން ބޭންޑު އަޅައިގެން ގިނަ ކާމިޔާބީތަކެއް ހޯދި ޒަވީ ބުނީ، ކޯޗެއްގެ ގޮތުގައި ތައްޓެއް ކާމިޔާބު ކުރެވުމުން ވެސް އުފާވާ ކަމަށެވެ. ޒަވީ ބުނީ ކުރިއަށް އޮތީ ބުރަ މަސައްކަތެއް ކަމަށެވެ. އެގޮތުން ސްޕެނިޝް ލީގުގެ އެއް ވަނައިގައި މިވަގުތު ބާސެލޯނާ އޮތްއިރު، އެ މަޤާމު ދަމަހައްޓަން ވަރަށް މަސައްކަތް ކުރަން ޖެހޭނެ ކަމަށް ޒަވީ ބުންޏެވެ.

މީގެ އިތުރުން ބާސެލޯނާގެ ކެޕްޓަން ސާޖިއޯ ބުސްކެޓްސް ބުނީ، ބާސެލޯނާގައި ކޮންމެ މީހެއްގެ ވެސް އަމާޒަކަށް ވާނީ މޮޅުވުން ކަމަށެވެ. އޭނާ ބުނީ ޒަވީ ބާސެލޯނާގެ ކޯޗުކަމާ ހަވާލުވި ހިސާބުން އެކަން ކަމަށް ވާސިލްވެވޭނެކަން އެނގުނު ކަމަށާއި، އެންމެ ފަހުން އެ ހިސާބަށް އާދެވިއްޖެ ކަމަށެވެ. އަދި ޒަވީ އާއެކު ބާސެލޯނާ އަށް ކުރިއަށް ދެވޭނެކަން ޔަގީން ކުރާ ކަމަށާއި، ޓީމުގެ ކުޅުންތެރިން ވެސް ތިބީ ޒަވީ އަށް ދޭންޖެހޭ އެހީތެރިކަމެއް އެންމެ ފުރިހަމަ އަށް ދޭން ކަމަށެވެ.

ކުޅުންތެރިޔެއްގެ ގޮތުގައި ޒަވީ ވަނީ ބާސެލޯނާއާއެކު 25 ތައްޓެއް ކާމިޔާބުކޮށްފަ އެވެ.