އިނގިރޭސި ލީގު ކަޕުން ސިޓީ ކަޓުވާލައިފި

އިނގިރޭސި ލީގު ކަޕުން މެންޗެސްޓަރ ސިޓީ ކަޓައިފިއެވެ. ލީގު ކަޕުން މެންޗެސްޓަރ ސިޓީ ކަޓުވާލީ ސައުތްހެމްޓަންއެވެ.

ކުއާޓާ ފައިނަލްގައި ސިޓީގެ މައްޗަށް ސައުތްހެމްޓަނުން ކުރި ހޯދީ 2-0 ނެވެ. ޢާއްމުކޮށް ސިޓީގެ ފުރަތަމަ އެގާރައިގައި ކުޅޭ ކުޅުންތެރިންނަށް ބަދަލުތަކެއް ގެނެސްފައިވީ ނަމަވެސް ސިޓީން މެޗަށް ނެރުނީ ވަރުގަދަ އެގާރައެކެވެ. ކުރިއަށް ކުޅުނީ ފިލް ފޮޑެންއާއި ޖެކް ގްރީލިޝްއާއި އަލްވާރޭޒްއެވެ. ދެވަނަ ހާފުގެ ކުރީކޮޅު ހާލާންޑްވެސް ނެރުނެވެ. އަދި ދެވަނަ ހާފު ފަށައިގެން ފުރަތަމަ މިނެޓުގައި ކެވިން ޑެ ބުރޭނާވެސް ކުޅެން ނެރުނެވެ. އެކަމަކު ގޯލެއް ޖެހުމުގައި ސިޓީއަށް ކާމިޔާބެއް ނުހޯދުނެވެ. ސައުތްހެމްޓަންއިން ސިޓީ ކޮޅަށް ދެ ގޯލް ޖެހީ ފުރަތަމަ ހާފުގައި, ފަސް މިނެޓުގެ ތެރޭގައެވެ. ފުރަތަމަ ލަނޑު 23 ވަނަ މިނެޓުގައި ޖެހީ މާރާއެވެ. ދެވަނަ ގޯލް 28 ވަނަ މިނެޓުގައި ޖެހީ މޯސާ ޖެނެޕޯއެވެ. މިމޮޅާއެކު ފެވަރިޓުންގެ ތެރޭގައި ހިމެނޭ ސިޓީ ކަޓުވާލުމަށްފަހު ސައުތްހެމްޓަން ވަނީ މުބާރާތުގެ ސެމީފައިނަލުން ޖާގަ ހޯދާފައެވެ.

ޕެނަލްޓީގައި ވުލްވުސް ބަލިކޮށް, ނޮޓިންގހަމް ފޮރެސްޓްވެސް ވަނީ ސެމީފައިނަލުން ޖާގަ ހޯދާފައެވެ. އެއީ މެޗުގެ ނަތީޖާ 1-1 ން އެއްވަރުވެ, ޕެނަލްޓީގައި 4-3 ން ކުރި ހޯދައިގެންނެވެ. މިއީ 31 އަހަރުގެ ތެރޭގައި ނޮޓިންގހަމް ފޮރެސްޓް ލީގު ކަޕްގެ ސެމީއަށް ދަތުރުކުރި ފުރަތަމަ ފަހަރެވެ. ސެމީފައިނަލްގައި އެޓީމް ވާދަކުރަން ޖެހޭނީ މެންޗެސްޓަރ ޔުނައިޓެޑާއެވެ.