ޕީއެސްޖީގައި އޮތީ މޮޅުވުމުގެ ރޫހު

ފްރާންސް ލީގުގައި އެންޖާސްއާ ދެކޮޅަށް ނިކުންނައިރު، ޕެރިސް ސެއިންޓް ޖާމަން (ޕީއެސްޖީ)ގައި އޮތީ މޮޅުވުމުގެ ރޫހުކަމަށް އެ ޓީމުގެ ކޯޗު ކްރިސްޓޮފާ ގަލްޓިއޭ ބުނެފިއެވެ.

ލީގުގައި ޕީއެސްޖީން އެންމެ ފަހުން ލެންސްއާ ދެކޮޅަށް ކުޅުނު މެޗުން ވަނީ ބަލިވެފައެވެ. އެއީ މި ސީޒަންގެ ފްރާންސް ލީގުގައި އެ ޓީމުގެ ފުރަތަމަ ބައްޔެވެ. އެ މެޗުގެ ފަހުން ފްރެންޗް ކަޕްގައި ކުޅުނު މެޗުން ޕީއެސްޖީ ވަނީ މޮޅުވެފައެވެ. ލީގުގައި އެންޖާސްއާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަދައްކަމުން ގަލްޓިއޭ ބުނީ، ޓީމުގެ ސްކޮޑު އޮތީ އެންމެ ފުރިހަމަ ގޮތުގައި ނޫންކަމަށާއި، ނަމަވެސް ކުރީ ހަފުތާއަށްވުރެ ރަނގަޅު ކަމަށެވެ. ގަލްޓިއޭ ބުނީ ޓީމުގައި އަނިޔާގެ މައްސަލަތަކެއް އުޅޭ ކަމަށެވެ. އަދި އެންމެ ފަހުން ފްރެންޗް ކަޕްގައި ކުޅުނު މެޗުގައި އެ ޓީމުގެ ފަރާތުން ރަނގަޅު ކަންކަން ފެނުނު ކަމަށާއި، ނަަމަވެސް އެއީ މުޅިން ތަފާތު މުބާރާތެއް ކަމަށެވެ.

އެންޖާސްއާ ގުޅޭގޮތުން ވާހަކަދައްކަމުން ގަލްޓިއޭ ބުނީ އެ ޓީމަކީ މިހާރަަކަށް އައިސް ވަރަށް ނުރައްކާތެރި، ވަރުގަދަ ޓީމެއް ކަމަށެވެ. އޭނާ ބުނީ އެންޖާސްއިން ވަނީ ފްރެންޗު ކަޕުން ސްޓްރަސްބާގް ކަޓުވާލާފައި ކަމަށާއި، އެ ޓީމުގެ ކޯޗު ބަދަލުވި ފަހުން އެމީހުން އަންނަނީ މޮޅަށް ކުޅެމުން ކަމަށެވެ. ގަލްޓިއޭ ބުނީ ޕީއެސްޖީން މަސައްކަތްކުރާނީ މެޗުގެ ކޮންޓްރޯލް ނަގައި، ނުރައްކާތެރި ހަމަލާ އުފައްދައި، މެޗުން މޮޅުވާން ކަމަށެވެ. މުޅި ޓީމު އޮތީ މޮޅުވުމުގެ ރޫހުގައިކަން ފާހަގަކޮށް ގަލްޓިއޭ ބުނީ، އެންޖާސް މެޗަކީ މުހިންމު މެޗެއް ކަމަށެވެ.

ފްރާންސް ލީގުގައި ޕީއެސްޖީން އެންޖާސްއާ ދެކޮޅަށް ކުޅޭނީ ބުދަ ދުވަހުގެ ރޭ ރާއްޖެ ގަޑިން ދަންވަރު އެކެއް ޖަހާއިރުއެވެ.